1 Cipaucai Boaz namdi rieki ga nghang cika ntumlu. Nah ainie, penui kibaume ma kepiebe pei de tetkah gwangla, pedwa Boaz pe ha rang kebam pei de. Nah pa rangdi, "Aika gwang ntum lulo." Cine pa nreu cailigwang ntumlu. 2 Pecai pa renam ga hangkiame mina hangkerei de qulu delwe rangdi, "Aika ntum lulo." Cine penui ntum bamlu.

3 Pecai Boaz pe kibaume pei dage rangdi, "Naomi, Moabme deu gade cailigwang dai kebambe pui de, anui sinabe pei Elimelek luh kesa zwadi neu bamlie. 4 Cine Ih cide ha ncu ranglia kera cetlu, iciu eh nang cide luulu neu liulu kerane. Nang cipau deude luu neucai hangkiamedung kebam gade liulu. Dede nang luu neu mecai, cu gage acu rangbeu lo, kedanemene cide liu kera Ih n cia kerabe delu."

Pecai minabe rangdi, "Ih cide luilu zie." * *

5 Pecai Boaz rangdi, "Nang cipau luh de Naomi ba gade lui kelu benai Moabme pui Ruth pe nahpei tsai kedibe puide de gum jüja zie, ciciu eh pe mabam gum kelu gade tsai kedime zi peu lalu kerane."

6 Ge pe kibaume pei rangdi, "Ih au lui daulak kedanemene a name cipau luh de gum laklu. A qwade nang lui lulo, kedanemene Ih au luu daulak delu." 7 Ndaa Israelme ting ga ainzwa makie keheibe de teimci lula, maabam lui mede rehiak kecu gade zwa kebeube pe picum lwaklwe pe zangbe de peu dila.* Iciu eh Israelme ainzwa samcak tei lula. 8 Cine pe kibaume pei Boaz dade rangdi, "Nang cide luilu," nah pa pe picum lwakdi.

9 Pecai Boaz hangkiamedung nah mina pelane dage rangdi, "Ih henai Elimelek gu ma pelane nah Kilion penai Mahlon gu ma pelane Naomi ba gade luilu delie de kecu nnui a zierangme delie. 10 Nah tsai kedibe Mahlon nau Moabme pui Ruth de Ih a nau dizie da. iciu eh tsai kedibe zi pe mabam reu bamlu zie, nah tsai kedibe zi peu pe sinamedung kak gade nah pe nam gade gahdi melu kerane. Henai nnui a zierangme delie."

11 Nah herieki ga mina kebamme pelane nah hangkiamedung rangdi, "Anui n zierangme delie. Peu RAMPAUBE de n ki ga gwang lai eh kebambe puide, peu Rachel penai Leah, Israel leuhme de teimdi kebeu nzwa lulo. Ephrathah ga herüt pung kelube teilo, nah Bethlehem ga ndu kelube teilo! 12 Peu RAMPAUBE de mipui kehena aipau puide dade ncu hena pwa kepeudung de peu, Tamar penai Judah napei Perez ki kelak nzwa kelube teilo."✝

13 Cine Boaz Ruth de luu pwa penau lu, nah pa pecu ngngwa nauhepei zai teidi. Pecai RAMPAUBE pecu peu tetlaklu, nah pa mipeina ge mnalu.✝

14 Pecai Bethlehemme mipuidung Naomi dage rangdi, "RAMPAUBE zi peu ndu lulo, pa henai n kibaume ma pie kerabe de ncu peuda. Peu pe zi Israel ga mlang kelube tei lulo! 15 Cu pa n teilung tei heci daibeu zie nah nang cing kedi caide ncu ngkwet beuzie. Kedanemene pa au n napei nau, ncu hung kelabe pui nah n napei hang hena swade yiki kecube pui napei lu."

16 Naomi ngiena de pwalu eh pe niepum gage kailu, nah pa pe ngkwetpui teidi. 17 Cine kidame puidung ranggai, "Naomi mipeina ge de mna luda." Nah penui pe zi Obed msiaklu. Obed au David pei, Jesse pei.✝

18 Aide Perez paupak ha, Perez be Hezron pei; 19 nah Hezron be Ram pei; Ram be Amminadab pei; 20 nah Amminadab be Nahshon pei; Nahshon be Salmon pei; 21 Salmon be Boaz pei; Boaz be Obed pei; 22 Obed be Jesse pei; nah Jesse be David pei.