1 तिमथ्या 1

1 पौलुसोअ तरफ रोत जो आपाअ तारनारु देव आन आपाआ आशाआ आधारो वाईं ख्रिस्त ईसुउ आदेशो वाअहीं प्रेशित होय,

2 तिमथ्याआ नावसे जो विश्वासो मेहें माआं खोरलु बेटुह्हू होय: देव बाह्हू, आन आपाअ प्रभु ख्रिस्त ईसु पोअ रोत ताहूं मेरवानी, दया आन होक मिलतू रोये.

ठोगोअ शिक्शणोअ विरुद्दाम सेतावणी

3 जेहें कोइत आंय मकिदुनिया जाअलोअ वेले ताहूं समजाड़्योतो, के इफिसोमेहें रोत कोइत थोड़ाक माअहुंहूं आदेश आप के आलांग जातीइ‍ शिक्शण ने आपुहूं जोवे. 4 आन तियीं काईं आन पिढीन पिढ़ीइ पारवाड़ी पोअ मोन ने लागाड़े तेहें, जियां वाअहीं बिगर कामोंअ भान्गड़ी ओवतिही, आन देवोअ तियी योजनाअ अनुसार नाहां, जे विश्वासोअ आधारो पोअ होय. तेहेंज कोइत फाश्यु बी कोहो. 5 आदेशोअ उद्देश ओ होय के, सोको मोन आन हाजी बुद्दी, आन खोरा विश्वासोअ मेरे वाअहीं सेकलाअहूं जोवे. 6 यां हाजा गुणोहों सोड़ीत कोइत केतेहे माअहें फालतू गोठीम लागीत गोयेहे, 7 आन तियांआं कायदाअ मास्तर बोणिइलोअ इश्शा ते होय, पोन जे गोठी कोतेहे आन हिम्मत काडीत गोगतेहे, ते गोठी तियांहांज नाहां समजाअती.

8 पोन आमुहूं मुंदू होय के जर एखो कायदाहा बोराबर कामोम वापरे ताहां तो हाजो होय. 9 ओं होमजीत के कायदु हाजा माहुंउं काजे नाहां, पोन कायदाअ तोडनारा, गुनू कोअनारा, विणभक्तीवाला, एठे कामे कोअनारा, देवोअ गोठी ने माननारा, आन पापी, आयहीन- आब्हाहा माअनारा, खुन कोअनारा, 10 सिनाल, माट्योअरी माटीज राखाअनारा, माहुंहूं वेसीत खानारा, ठोगनारा, ठोगोअ शप्पोत खानारा, आन याअ रोत बी खोरा शिक्शणोअ विरोध कोअनाराअ काजेहे ठरवाअयुहू. 11 एज वोडी हाजाम हाजी हिकवोण देवोअ महिमाअ तियी हाजी बातमीइ इसाबोवाअहीं होय जे माहूं होप्यीही.

देवोअ दयाअ काजेहे आभार

12 आंय आपाअ प्रभु ख्रिस्त ईसुउ जिये माहूं ताकत आप्यीही, आभार मानोहों के तिये माहूं इमानदार समजीत तियाआ सेवाआ काजेहे ठरव्युहू. 13 आंय तोम पेल रोवा कोअनारु*1:13 रोवा कोअनारु निंदा कोअनारु, आन तारास देनारु, अपमान कोअनारु ओतू; तेबी देवोअ दया मापोअ ओवयीही, काहाके आंय बिगर विश्वासोअ दशामेहें विण जांअयेंज एं कामे कोअयेते. 14 आन आपाअ प्रभुउ मेरवानी तिया विश्वासोअ आन मेरे वाईं जे ख्रिस्त ईसु मेहें होय, जाअखीलिही ओयी. 15 ए गोठी खोरीज मानुहूं जोगिही आन विश्वास कोअहूं जोगीही होय के, ख्रिस्त ईसु पापी माहुंउं सुटका कोइलोअ काजेहे दुन्यामेहें आयू, जिहींमेहें आखाम रोत वोडू पापी आंयज होय. 16 पोन मापोअ एताआ काजे दया ओवीही के, माआं सारका आखाम रोत वोडा पाप्योमेहें ईसु ख्रिस्त सोताआ पुरी सहनसेक्ती देखाड़ीत सेके, काहाके आगाड़ी जें माअहें तियापोअ अमर जिवनोअ कोअते विश्वास मिके, तियांआं काजे आंय एक नमुनू बोणित सेको. 17 ओमे सनातन राजा मोन्ज्ये अमर, ने देखाअनारा, एक्काज देवोअ आदर आन महिमा पिढ़ीन पिढ़ी ओवती रोअहूं जोवे! आमेन.

18 ए माआं पोर्‍या तिमथ्या, आंय ओ आदेश भविश्यवाणीइ शब्दाआ परमाणे होपोहो, जो पेल ताआ बाप्तिमेहें आप्युतो, के तू तियां शब्दाआ आथ्यारोअ होस हाजी लढ़ायीमेहें वापर कोअहूं जोवे. 19 आन विश्वास आन तियी हाजी ओकलेहे मजबुत मिक, जियीही सेटे कोइलो वाअहीं केताहा जोंओंअ विश्वास खुटात गोयुहू. 20 तियांज मेर्‍याआ हुमिनयुस आन अलेक्झान्डर होय, जियांहां आंय डोंड भोगेतेहें काजे सैतानोअ आथोम होपी देदाहा, के ते देवोअ निंदा कोइलोअ बंद कोअहूं जोवे.