1 तिमथ्या 5

विश्वासीइ बाप्तिम जाबाबदारी

1 कोडा डाया माहुंहूं मा गाई देही, पोन तियाहा आब्हू जांइत समजाड़ी दे, आन जुवान्याहां पाही जांइत कोइत समजाड़; 2 डायी बोईंहीं आयही जांइत कोइत; आन जुवान बोईंहीं पुरा सोका मोनो वाअहीं बोअह्हीं जांइत कोइत समजाड़ी दे.

3 जे बायहीं खोरीज रोंडाअली होय, तियींइं आदर कोअ. 4 जर रोंडाअली बायीइ पोऱ्ये नेत पोऱ्याआ पोऱ्ये ओय, ताहां तें पुरो कुटूंबोज विश्वासोम सोताआ जबाबदारी पुरी कोअहूं, आन सोताआ आयहीन आब्हाआ आन वोडाब्हा आन वोडी याह्हीही तियांआं हक्क आपुहूं जोवे, काहाके ओ देवोहो गोमेहें. 5 जे बाय खोराखोर रोंडोअ होय, आन तियीइ कोडोज कायनाहां, ते देवो पोअ आशा मिकेहे; आन रातेन दिही विनंती आन प्रार्थना मेहें लागीत रोहे; 6 पोन जे लालसो मेहें पोड़ीत गोयी, ते जिवताइज मोइत गोयीही. 7 यीं गोठीइ बी आदेश आपतू ले के ते निर्दुस रोअहूं जोवे. 8 पोन जर एखू सोताआ माअहुंउं आन खास कोइत तियाआ सोताआ कुटूंबाअ कालजी ने कोए, ताहां तो विश्वासोमरोत सोब मुअडीत लेदीही आन बिगरविश्वासीइ रोत बी उत्यार बोणीत गोयुहू.

9 जे साठ वोरह्यों रोत वादार ओय तियींज रोंडोअ बायीइ नाव टिपाअहूं जोवे, आन तेबी एकाज माट्योअ लाडी रोयीय ताहां, 10 आन हाजा कामोम नावासी ओय, जियी पोर्‍याहां वारुहूं वेंडार्‍ये ओय; पावणाआं सेवा कोअयी ओय, पवित्र माअहुंउं गुडा तुवया ओय, दुखी माअहुंउं मदत कोअयी ओय, आन हारेक हाजा कामोमेहें मोन लागाड़्यो ओय.

11 पोन जुवान रोंडोअ बायहींइं नावे मा लेखही. काहाके जाहां ते ख्रिस्ताआ विरोध कोइत लालसोमेहें पोड़ीत जातिही ताहां वेहवाल कोअहूं होदतीही, 12 आन दोशी ठरतीही, काहाके तियीं पेल्लुउ विश्वास सोड़ी देदुहू. 13 तेहेलीहीज ते कोओं कोओं फिरीत कोइत आलह्यी टेवात जातीही, आन तेतोज नाहां, पोन विण इसाबेज साड़ी कोअती फिरतीही, आन बिहीराअ कामोम आथ बी टाक्ती फिरतीही आन खाराब गोठी गोगतीही. 14 तियाहा काजे माआं ए इश्शा होय के जुवान रोंडोअ बायहीं वेहवाल कोइत लेअहूं जोवे, आन पोर्‍याहां जल्म आपुहूं जोवे, आन कोअबाआ सांबालुहूं जोवे, आन कोडा विरोद कोअनाराहा निंदा कोइलोअ सान्सो ने आपुहूं जोवे. 15 काहाके थोड़ीक तोम भटकीत कोइत सैतानोअ फासाड़ी लागीत गोयीही. 16 जर एखा विश्वासीइहीं रोंडोअ बाय ओय, ताहां तोंज तियींइं मदत कोअहूं जोवे, काहाके मंडड़ी पोअ वोजू ने पोड़ुहूं जोवे, मोन्ज्ये मंडड़ी जे खोरीज रोंडाअली होय एहली बायहींइं मदत कोइत सेके.

17 जे डायहां हाजे कामे कोअताहा, खास कोइत जे वसन उनाड़ीइलामेहें आन सिकाड़ीइलामेहें मेहेंनत कोअताहा ते बेन भाग आदरोअ लायक होय. 18 काहाके वसन एहें कोहे के, "मोलनारा बोलदोअ सोबीज मुंहको मा बांदही," काहाके "मोजुर तियाआ मोजरीइ हक्कदार होय." 19 एखू गुनू एखा डायापोअ लागे, ताहां बेन नेताहां तीन साक्शीदारो सिवाय तियाहा मा उनाअही. 20 पाप कोअनाराहा आखाआ सामने हेकाटी दे, के फाशे बिहरे बी बिइहूं जोवे.

21 देव आन ख्रिस्त ईसु आन निवड़ीइल्या देवदुतोहो हजर जांइत कोइत आंय ताहूं कोतापोहो के तू बेफिकऱ्यु यीं गोठीही मान्या कोअ, आन कोड्लोज काम भेदभावो वाअहीं मा कोअही. 22 देवोअ सेवाआ कोअते कोडापोअ उतवाल आथ मा मेकीहीं, आन बिहीराअ पापोमेहें मा पेलाअही; सोताआ जिवन पवित्र मिक.

23 आवनारा दिहोम निस्तु पाईं एतोज पिनारु मा रोही, पोन ताआ पेटोअ काजे आन ताल-ताल बिमार पोडीइलाअ वाखरी थोड़-थोडू दाराक्शाआ रोह बी पिया कोअजी.

24 थोड़हा माहुंउं पाप देखाइत जाताहा आन न्यायनिवाड़ाआ काजे आगाड़ीज पोतीत जाताहा, पोन थोड़हाआ पाप फासाड़ी रोत मुंदू जाहे. 25 तेहेंज कोइत थोड़ेक हाजे कामे बी देखाअतेहे; आन जें एहेलेहे नाहां रोते, तें बी निकाइत नाहां सेक्ते.