1 ए गोठ खोरी होय के जो आदिक्श बोणुहूं होदेहे, तो हाजा कामोंअ इश्शा कोअहे. 2 ओं गरजेए होय के सेवक निर्दुस, आन एकीज बोईंइ माटी, संयमी, हाजो मोन, हाजो नाव, पावणाय तोअनारु, आन सिकाडीइलो मेहें पाक्कू हुशार जोवे. 3 साकल्यु नेत सुलाअनारु ने जोवे; पोन नरम रोअहूं जोवे, आन ने भान्गड्यु, आन ने पोशाअ लालसी जोवे. 4 तियाआ कोर्‍याआ माहुंउं हाजी देखबाल कोअनारु जोवे, आन तियाआ पोर्‍याहां हाजी हुतायी ताबाम मेकनारु जोवे. 5 जेहेलाम एखु कुटूंबाआ देखबाल हाजी हुतायी ने कोइत सेकतुय, ताहां देवोअ मंडड़ीइ माअहुंहूं केहें कोइत सांबलीत सेके? 6 फाश्यो ओं के नोवू विश्वासी ने जोवे, एहेलोह ने ओवुहूं जोवे के तो वोडाय कोइत सैतानोअ होस डोंड हाटवे. 7 आन बारथेए माहूंम बी तियाआ हाजो नाव जोवे, नाव खाराब कोइत सैतानोअ फांदाम फोसीत जाय एहलोहो ने ओवुहूं जोवे.

8 तेहेंज कोइत सेवकोअ बी सोभाव हाजू जोवे, आन बेन मुंड्यू ने जोवे, दाराक्शाआ रोह पित झिंगवाअनारु ने जोवे आन खाराब वाटेएहें रोत पोशा कामाविलाआ लालस ने जोवे; 9 पोन विश्वासोअ गोठीही सोका मोनो वाअहीं सांबालित मिकुहूं जोवे. 10 आन ए बी पेल फारकीत पालाअहूं जोवे, जाहां जर निर्दुस निहें, ताहां सेवकोअ काम कोअहूं जोवे. 11 एहेंज कोइत बोईं बी हाजा सोभावोअ रोअहूं जोवे; साड़ग्यी ने जोवे, पोन मस्तेए आन आखी गोठीम इमानदार जोवे. 12 सेवक एकुज लाडीवालू जोवे, आन तियाहा पोर्‍ये आन सोताआ परिवारोअ हाजी देखबाल कोइलाआ मुंदू जोवे. 13 काहाके जे सेवकोअ काम हाजीहुतायी कोइत सेकतेहे, तियांहां सोताआ काजे हाजू जागू आन ख्रिस्त ईसु पोऱ्याआ विश्वासो वाईं वोडी हिम्मत जोड़ेहे.

14 आंय ताआ जागे वेगु आविइलोअ आशा कोअहो तेबी ए गोठी ताहूं याअकाजे लेखोहो के, 15 तेबी जर माअ आविइला मेहें वाआ लागे, ताहां तू जाइंत लेजी जे जिवता देवोअ मंडड़ी होय आन जो सत्याआ खांबू आन पायू होय, तिया देवोअ कुटुंबामेहें केहें कोइत सालुहूं जोवे, ओं ताहूं समजाअहूं जोवे. 16 यामेहें किज फिकर कायनाहां के भक्तीइ दोडपाअली गोठ सादी कायनाहां, मोन्ज्ये,

तो जो माहुंउं बोणीत कोइत आयू,

आत्मामेहें धर्मी ठर्‍यु, देवदुतोहों देखाअयू,

देसो-देसोमेहें तियाआ परसार ओवू,

आन दुन्यामेहें तियापोअ विश्वास कोआयू

आन तो महिमामेहें उसे विसाइत गोयू.