1 ✝पौलुसोअहीं रोत, जो देवोअ इश्शा वाअहीं ख्रिस्त ईसुउ डायु खोबर्‍यू होय, इफिसोमेर्‍याआं विश्वासी माअहुंहूं, जें ख्रिस्त ईसुमेहें इमानदार होय:

2 आपाआ देव बाह्हू आन मालिख ईसु ख्रिस्त तुमुहूं मेरवानी आन शांती आपुहूं जोवे.

3 आपाअ मालिख ईसु ख्रिस्ताआ देव आन बाह्हाअ आभार ओवे, के तिये आपुहूं ख्रिस्तामेहें होरगामेर्‍याआ आखी जातीइ आत्मिक आशिर्वाद आप्याहा.

4 जेहलोहो देवे आपुहूं दुन्यांअ बोणीलोअ पेल ख्रिस्तामेहें निवड़ीत लेदेहे के आपू तियाआ सामने मेरेमेहें सोके आन निर्दुस रोअहूं जोवे. 5 देवे पेलूज रोत ठरवीइल्यो के ईसु ख्रिस्तावाअहीं तो आपुहूं तियाआ बेटेह्हे बोणावे एज तियाआ खुसी आन उद्देश. 6 के देवोअ तियी मेरवानीइं महिमाअ स्तुती ओवे, जे मेरवानी तिये आपुहूं मेराला बेटाह्हामेहें फुकट आप्यी. 7 ✝ईसु ख्रिस्ताआ रक्तावाअहीं आपुहूं सुटका मोन्ज्ये आपाआ पापोअ माफी मिल्यी. केतीही वोडी देवोअ मेरवानी,

8 जियाहा तिये आखी बुद्दी आन होमोजोंअरी आपापोअ भारपुर कोअयी. 9 देवे जो कोयो तो कोअयो, आन आपुहूं गुप्त्यी योजनाआ बाप्तिमेहें कोयो जो तिये पेल रोतुज ख्रिस्ता वाअहीं पुरो कोइलोअ ठरव्योतो, 10 के वेल पुरी ओवीइलोअ एहलीही योजना बोणे के जों किबी होरगामेहें होय, आन जों किबी धरतीपोअ होय, आखो बोठो देव ख्रिस्तामेहें एक्ठो कोए.

11 आखी वस्तू देवोअ योजनाआ काजे होय; आन देवे आपुहूं तियाआज योजनाआ काजे ख्रिस्ताअरी मिलीत तियाआ खाजगी माअहोंअ रुपोमेहें निवड़्ये ओं तिये पेलूज रोत ठरव्योतो. 12 के आपू, जियां पेलरोत ख्रिस्तापोअ आशा मेक्यीते, देवोअ महिमा स्तुतीइ कारण ओवे!

13 आन जेहेलाम तुमू खोरु संदेश उनाअये तेहेलाम तुमू बी देवोअ माअहें बोण्ये, ते हाजी बातमी जिहीं वाईं तुमुहूं सुटका जोड़्यी. तुमू ख्रिस्तापोअ विश्वास कोअयू, आन देवे तुमुहूं पवित्र आत्मा आपित कोइत खासगी हक्काआ कोत तुमापोअ तियाआ सिक्कु लागाड़्यु, जियाआ तिये आथवसन आप्योतो. 14 आत्मा जो होय तो तिये सोताआ माअहोंहों आपल्य आथवसन होय, यावाअहीं आपुहूं पाक्कू भरिवसू जोड़ेहे के देव तियाआ माअहोंहों पुरी सुटका आपे. आवा आपू तियाआ महिमाआं स्तुती कोअहूं!

15 तिहीं वाईं आंय बी प्रभु ईसुपोर्‍युउ तुमाआं विश्वासोअ उनाइत आन देवोअ माहूंपोर्‍यीइ तुमाआं मेर देखीत कोइत, 16 तुमाआं कोअते देवोहो आभार मानीइलोअ नाहां सोड़तू, आन माआं प्रार्थनामेहें तुमुहूं ओर कोअया कोअहो. 17 काहाके आपाअ प्रभु ईसु ख्रिस्ताआ देव जो महिमाआं बाह्हू होय, तुमुहूं तियाआ ओलखातीमेहें बुद्दी आन उजालाअ आत्मा आपे, 18 आन तुमाआं मोनोअ डोआ उजालावाला ओवे के तुमू जाइंत लेअहूं जोवे के तियाआ हादीइलोअ आशा कि होय, आन पवित्र माअहूंमेहें तियाआ वारसाआ महिमाआं धन केतोहो होय, 19 आन जें विश्वास कोअतेहे तियां आपामेहें तियाआ ताकत केतीही वोडी होय, तियाआ ताकतोअ जोर तियाआ कामोअ इसाबोवाअहीं समजीत लेअहूं जोवे, 20 ✝ तिये तों काम ख्रिस्तामेहें कोअयो के तियाहा मोल्यामेहें रोत जिवाड़ीत कोइत होरगाआ जागामेहें तियाआ हाजाड़्यी वोगेहे बोहाड़्यू. 21 आखी जातीइ राज, आधिकार, ताकत, राज सालाड़नारी ताकत, आन जों नाव फक्त यी धरतीपोअ एतोज नाहां, पोन आवनारा राजोमेहें बी तोंज नाव रोय, तियाहा बादा नावो रोत उसे बोहाड़्यू. 22 आन आक्खोज तियाआ गुडाआ थुड़ी कोई देदो; आन तियाहा आखी वस्तूपोअ मुख्य ठरवीत कोइते मंडड़ीही आपी देदू.✝ 23 मंडड़ी ख्रिस्ताआ शरीर होय, आन तियाआज भारपुरी होय, जो आखामेहें आक्खोज पुरो कोअहे.