1 ✝ तिये तुमुहूं बी जिवाड़्ये जें सोताआ सुक आन पापोअ वाखरी मोइत रोयेते. 2 जियामेहें तुमू पेल यी दुन्याअ पद्दतीवाईं, आन जुगोमेऱ्याआ राज्याआ आधिकारी मोन्ज्ये तुमू तिया आत्माआं परमाणे सालतेते, जो ओमे बी आदेश ने माननारा माहूंमेहें काम कोअहे. 3 यामेहें आपू बी आखेज पेल आपाअ शरीरोअ लालसोमेहें दिही काटतेते, आन शरीरोअ आन मोनोअ इश्शा पुरी कोअतेते, आन बिहीरा माअहोंअ होस सोभावोज वाअहीं देवोहो खोत लागाड़नारे पोर्‍ये ओते.

4 पोन देव जो दयाआ मालिख होय, तियाआ तियी वोडी मेरेए वाखरी, जियी वाअहीं तिये आपापोअ मेर कोअयी, 5 जाहां आपू सुकीइ वाखरी मोल्ये ओते, ताहां आपुहूं ख्रिस्ताअरी जिवाड़्ये; मेरवानीज वाअहीं तुमाआं तारण ओवोहो.✝ 6 आन आपुहूं ख्रिस्त ईसुमेहें तियाअरी जिवाड़्ये आन होरगाआ जागाम तियाअरी बोहाड़्ये. 7 काहाके तो तियाआ तियी मेरवानी वाअहीं जे ख्रिस्त ईसुमेहें आपापोअ होय, आवनारा दिहोमेहें तियाआ वोडी मेरवानी देखाड़ीत सेके. 8 काहाके देवोअ मेरवानी वाअहींज विश्वासोअ वाखरी तुमू वासाअयेहे; आन ओं तुमा वाअहीं नाहां ओवो, पोन देवोअ भेट होय, 9 आन ओं नाहां आपाआ कामों वाअहीं, एहलोहो ने ओवुहूं जोवे के एखु वोडाय कोए. 10 काहाके आपू देवोअ बोणावल्ये होय, आन ख्रिस्त ईसुमेहें तियां हाजा कामोंअ काजे बोणायेहे, जियांहां देवे आपाआ काजे पेलुज रोत तियार कोअयेहे.

11 याअ काजे ओर कोआ के, तुमू एका गालाहा शारीरिक रितीवाअहीं बिगर यहुदी ओते, आन जियां माअहुंउं खतना शरीरोमेहें आथोवाअहीं ओवुतो, तें माअहें खतनावाले कोवाड़तेते, आन ते तुमुहूं बिगर खतनावाले कोत गोगाड़तेते. 12 तियी वेले तुमू ख्रिस्ताअरी रोत आलांग ओते, आन इस्राएलोअ माअहुंउं जागापोअ रोत आलांग कोअल्ये, आन शप्पतोअ आथवसनोअ भागीदार ने ओते, आन विण आशाआ आन दुन्यामेहें बिगर देवोअ ओते. 13 पोन तुमू जें पेल ख्रिस्त ईसु रोत सेटे ओते, ओमे ख्रिस्ताआ रक्तावाअहीं* आहने ओत गोयेहे. 14 काहाके ख्रिस्त आपाअ मिलवीइनारु होय, जिये यहुदी आन बिगर यहुदी बेनुहूं एक कोअये. तिये आलाग कोअनारा विसमेऱ्याआ पितड़ाहा ओदारीत टाक्यो. 15 ✝आन ते कायदा आन नियमोंअ रिती तिये सोताआ शरीरोवाईं रद्द कोअयी. तों याअकाजे के सोतामेहें बेनुहूं एक नोवो माहुंउं बोणावीत तियांहां मिलाड़ीत सेके. 16 ✝आन क्रुसोपोअ दुस्मोनीहीं आरवीत कोइत तियावाअहीं बेनुहूं एक शरीर बोणावीत देवोअरी मिलाड़ीत सेके. 17 ✝ ख्रिस्ते आवित कोइत जें सेटे ओते आन जें आहने ओते, तियां बेनुहूं जुड़वीइलाआ हाजी बातमी कोत आप्यी. 18 काहाके ख्रिस्ता वाअहीं आपा बेनुउं एका आत्मामेहें देव आब्हाआ जागे जाअलोअ लायकी जोड़ेहे.

19 तियाहाकोत तुमू परदेसी आन वाटारे कायनाहां, पोन पवित्र माअहोंअ हेंगात्ये खाजगी देसोवाले आन देवोअ कुटूंबामेर्‍येए ओत गोये. 20 आन तुमू ताम प्रेशित आन भविश्यवक्ताआं पायापोअ बांदल्यी आवाली होय, ख्रिस्त ईसु सोताहा तियी आवालीइ कोपराअ डोण होय. 21 पुरी आवाली तियावाईं जुड़ात रोयीही आन प्रभुमेहें एक पवित्र मंदिर बोणतो जाहे, 22 तिहींमेहें तुमू बी एकमेकाअरी आत्मावाअहीं देवोअ रोअलाअ ठिकाण बोणिइलोअ काजे एक्ठेज बांदाअते जातेहे.