1 पोर्‍या तुमू देवोमेहें तुमाआं आयहीन आब्हाआ गोठी माननारे बोणा, काहाके ओं हाजो होय. 2 "तु ताआ आयहीन आब्हाआ मानपान कोओ," ओ एहेलुहू पेहलुज आदेश होय जियाअरी आथवसन बी होये. 3 तों एताआ काजे के ताआ हाजो ओवुहूं जोवे आन ताहूं धरतीपोअ नांबो जिवन जोड़ुहूं जोवे.✝6:3 निर्ग 20:12; कायदा 5:16

4 ए पोर्‍यावाला, तुमाआं पोर्‍याहां मा खिजवाहा; पोन तियांहां प्रभुउ हिकवोण आन सुसना पालन कोइलोअ सिकाड़ते जावा.

5 ए पावरों, यी दुन्यामेहें जे तुमाआं मालिख होय, तियांआं जेहेंकोइत तुमू ख्रिस्ताआ बिक राखीत ख्रिस्ताआ गोठी मानताहा, तेहेंज कोइत तुमाआं मोनोअ इमानदारी वाईं मानपान आन कापता जात तियांआं गोठी माना. 6 माअहुंहूं खुस कोइलोअ काजे उपरसोल्यी देखाड़ीइलोअ सेवा मा कोअहा, पोन ख्रिस्ताआ सेवकोअ होस पुरा मोनोवाअहीं देवोअ इश्शाआ पुरमाणे साला. 7 ए माअहुंउं सेवा नाहां, पोन देवोअ सेवा जेहें समजीत खुसी वाअहीं कोआ. 8 काहाके, तुमुहूं ओं मुंदू होय के, तो गुलाम ओय नेत सुटलू ओय, जो कोडो हाजो काम कोए, तिया हारेक जोओंहों देवोअहीं रोत इलाम जोड़े.

9 मालख्यों, तुमू बी तुमाआं पावरोहों धमकी देअलोअ सोड़ीत तियांअरी हाजा वागा; काहाके तुमुहूं ओं मुंदू होय के, तुमाआं आन तियांआं बेनुउं देव होरगाम होय आन तो कोडाआ भेदभाव नाहां कोअतु.✝6:9 लुक 6:31; कायदा 10:17; 2 इति 19:7

10 तियाहाकोत, देवोमेहें आन तियाआ वोडी सेक्तीमेहें मजबुत बोणा. 11 सैतानोअ योजनाआ सामने उबे रोअलोअ काजे देवोअ आथ्यारे बांदीत ल्या. 12 काहाके आपाआ ए लड़ाय रक्ता-माहोंअरी नाहां, पोन राज कोअनारा जुगोमेर्‍याआ खाराब आत्मिक आधिकारीइरी, आज्याआ आंदारामेर्‍याआ दुन्याआ मुख्याअरी, आन जुगोमेऱ्याआं पुतोंअरी होय. 13 तियाहाकोत देवोअ आथ्यारे बांदीत ल्या के तुमू खाराब दिहोमेहें लड़ाय कोइत सेकहा, आन आखो पुरो कोइत वातड़े रोत सेकहा.

14 तियाहा कोत तुमाआं कंबर सत्यावाअही बांदा; सतीपणोअ लोखिंडाआ आंगड़ो पोवित ल्या, 15 आन गुडामेहें शांतीइ हाजी बातमीइं काजे तियारीइ बुटे पोवित ल्या, 16 आन यां आखाअरी विश्वासोअ ढाल आथोम तोआ आन उबे रोवा. यावाअहीं तुमू तियां आखा सैतानोअ पेटाअनारा बिलखाहा उलवित सेकहा. 17 आन तारणोअ टोपू, आत्माआं तारवाआ, जों देवोअ वसन होय तों लेत ल्या.✝6:17 यश 49:2; 59:17; इब्री 4:12 18 केती बी वेले आन केहें कोइत बी आत्मामेहें प्रार्थना, आन रावणी कोअते रोवा, आन आखा सोका माअहुंउं कोअते कायम प्रार्थना कोअते जात जागते रोवा. 19 माआं कोअते बी प्रार्थना कोआ, काहाके आंय जेहलाम गोगहीं, तेहलाम माहूं हाजी बातमी कोअलोअ काजे हाजे शब्दे जोड़ुहूं जोवे. 20 काहाके यी हाजी बातमीइं काजे आंय जेलेम केंडाअलु राजदुत होय, आन माहूं हिमते वाईं गोगता आवड़ुहूं जोवे कोत प्रार्थना कोआ.

21 मेरालू पाही आन प्रभुमेहें भरिवसाआ सेवक तुखिकुस ओ तुमुहूं आखो कोये के, माआं कि सालू होय तों तुमुहूं बी समजाय. 22 आमू हाजा होय, ओं तुमुहूं समजे आन ताहां तुमाआं मोनोमेहें होक आवे, तियाहाकोत आंय तियाहा तुमाआं जागे मोकल्युहू.

23 देव आब्हा आन प्रभु ईसु ख्रिस्ताप रोत आखा पाव्हीइलाहां होक आन विश्वासोअरी मेर जोड़ुहूं जोवे. 24 आपाआ प्रभु ईसु ख्रिस्तापोअ जें मेर कोअतेहे तियां आखापोअ देवोअ मेरवानी रोअहूं जोवे.