1 तियाहा काजे आंय जो देवोअ सेवा कोअत्लू कोत जेलेम होय, तो तुमुहूं विनंती कोअहो: देवे तुमुहूं हाद्येहे तांहा तुमू तियाहा पोटे एहलोहो जिवन जिवा. 2 ✝कायम नम्र, हानाले रोवा, आन धिर तोइत रोवा, आन मेरेमेहें एकमेकाहा वेंडारीत ल्या. 3 आत्माआं एकी मिकीइलाआ कोअते ओवे तेती मेहेंनत कोआ. शांतीमेहें एकमेकाअरी जुड़ात रोवा. 4 जेहलेहे तुमुहूं बी एकुज आशाम भागीदार ओवे तेहें काजे हाद्येहे तेहेंज कोइत एक शरीर आन एकुज आत्मा होय. 5 एकुज प्रभु, एकुज विश्वास, एकुज बाप्तिस्मा*; 6 आखाआ एकुज देव आब्हू होय, जो आखाप रोत उसे, आखाआ विसमेहें आन आखाम रोत कोइत काम कोअहे.

7 पोन आपामेहें हारेक जोओंहों ख्रिस्ताआ दानोअ मापोअ पुरमाणे मेरवानी जोड़्यीही. 8 तियाहा काजे वसन एहें कोहे:

"जेहलामेहें तो आखाम रोत उसे गोयू,

आन तो वारुज जेलाऱ्याहां सोताअरी लेत गोयू,

आन तिये माअहुंहूं वरदान आप्यो."

9 ओमे, "तो उसे गोयू," याअ अर्थ कि? याअ अर्थ ओं के तो पेल तियी कोली धरतीइ आखाम रोत निसर्‍याआ जागामेहें उतर्‍यू.✝ 10 आन जो निसे उतर्‍यू तोज उसे जुगोम गोयू, आन तिया रोत बी उसे गोयुहू, जिहीं वाईं तो आखी गोठी पुरी कोइत सेके. 11 दान आपनारु तोज होय, आन तिये थोड़ाक जोओंहों प्रेशित कोत निवड़्याहा, आन थोड़ाक जोओंहों भविश्यवक्ता कोत, आन थोड़ाक जोओंहों सुवार्ता कोत आपनारा, आन थोड़ाक जोओंहों सेवक आन मास्तर कोत निवड़्याहा. 12 जिहीं वाअहीं देवोअ माअहें तियार ओत सेके आन सेवाआ काम कोअहूं जोवे आन ख्रिस्ताआ शरीर आत्माम वादतो जाअहूं जोवे. 13 जाअहूं जाआं आपू आखेज विश्वास आन देवोअ बेटाह्हाआ ओलखातीमेहें एक ने ओत जाहूं, आन एक समजदार माअहें ने ओत जाहूं, ताअहूं जाआं ख्रिस्ताआ होस बुद्दीमेहें एक ने ओत जाहूं . 14 तांहा ओमे रोत आगाड़ी आपू पोर्‍ये जेहें ने रोअहूं जोवे, जो माअहुंउं ठोग-हिकवोण आन हुशारी वाअहीं, तियांआं ठोगोअ गोठीइ हारेक हिकवोणो वाअहीं, फोला वाराअरी एहें-तेहें आलवाअनारा नावड़ाआ होस ने ओवुहूं जोवे. 15 पोन मेरेवाईं सत्य गोगुहूं जोवे आन आखी गोठीमेहें जो मुंड होय, मोन्ज्ये ख्रिस्तामेंहे वादते जाअहूं जोवे. 16 जिहींवाईं आखो शरीर, हारेक मुलोवाअहीं आरी मिलीत आन एक्ठे ओवीत, तिया प्रभावो वाअहीं जो शरीरोअ हारेक भाग ठीक ठीक काम कोअल्या वाअहीं तियामेहें रोहे, तेहेलोहो आपाआ डिलोअ भाग बी जिवज्योअ मेरेमेहें वादता जाताहा.

17 याअ कोअते प्रभुउ नावसे आंय रावणी कोअहो के, जेहलेहे बिगर विश्वासी माहें खाराब विसार लेत सालतेहे, तेहेलेहे तुमू ओमे आगाड़ी रोत मा सालहा. 18 काहाके तियांआं बुद्दी आंदारामेहें होय, तियांआं मोने कठीण ओत गोयेहे तियाहाकोत तें विण ओकल्ये बोणीत ते देवोअ जिवणा रोत पारके ओत गोयेहे. 19 आन तें आखी जातीइ खाराब कामे लालसोवाअहीं कोअया कोइलोअ काजे विणलाज्ये ओत कोइत लुसड़ायीइ कामोमेहें लागीत गोयेहे.

20 पोन तुमू ख्रिस्ताप रोत एहलिही हिकवोण नाहां हिकाअये. 21 जर तुमू तियाआ बाप्तिम उनाअयेय आन जेहलोहो ईसुमेहें सत्य होय, तेहलोहो तियाम सिकाअयेय, 22 ताहां तुमामेर्‍युउ जुनू सोभाव काडीत टाकुहूं जोवे, काहाके तो तुमाआं जुना जिवनोहो खाराब लालसोवाईं बिगाड़्याज कोअहे. 23 आन तुमू तुमाआं मोनोअ आत्मिक सोभावोमेहें नवे बोणते जाअहूं जोवे. 24 आन तुमू नोवू सोभाव पोवित लेअहूं जोवे, जो देवोअ होसऱ्योअ सत्य सतीपण आन सोको जिवन होय.

25 तियाहा कोत ठोगहा मा! हारेक जोओं एकमेकाअरी खोरो गोगुहूं जोवे, काहाके आपू आखे ख्रिस्ताआ शरीरोमेहें एकमेकाअरी जुड़ाअला भाग होय.✝ 26 खोत कोआ, पोन पाप मा कोअहा; दिही बुड्ताआ आगोदर तुमाआं खोत उलात जाअहूं जोवे. 27 सैतानोहो जागू मा आपहा. 28 सोरी कोअनारु फाशोअ सोरी ने कोअहूं जोवे, पोन उलटो हाजे कामे कोइलाआ काजे सोताआ आथोवाअहीं मेहेंनत कोअहूं जोवे; तों याआकाजे के जें गरीब होय तियांहां मदत कोइलोअ काजे तियांपोअ वाजिहीं सिल्लक रोअहूं जोवे. 29 तुमाआं सोबीम रोत तुमू उसक्ड़्ये शब्दे मा वापराहा, पोन गरज पोड़्यी ताहां हाजु सुधार ओवुहूं जोवे एहलेहे शब्देज वापरा, ताहां बिहीराहा बी उनात कोइत हाजो लागे. 30 देवोअ पवित्र आत्माहां दुखी मा कोअहा, काहाके तो तुमाआं सुटकाआ दिहोअ काजे तुमापोअ देवोअ हक्काआ सिक्कु लागाड़्युहू. 31 आखी जातीइ कड़वा विसार, खिजवाइलोअ, खोत कोइलोअ, जोराखा उठीइलो आन रोवा कोइलोअ, ओं आखी जातीइ खाराब तुमामेहें रोत काडीत टाका. 32 आन तुमू एकमेकापोअ मेर कोअनारे, आन माया कोअनारे ओवा; जेहेंकोइत देवे ख्रिस्तामेहें तुमाआं गुनां माफ कोअया, तेहेंज कोइत तुमू बी एकमेकाहा माफ कोआ.