1 तुमू देवोअ मेराले पोर्‍ये होय, तिहींवाईं तुमू तियाआज होस बोणुहूं जोवे. 2 जेहेंकोइत ख्रिस्ते आपापोअ मेर कोअयी तेहेंज कोइत तुमू बी मेरेवाईं वागा; तिये ताम देवोहो गोमे एहलोहो अर्पण आन गाराहा कोत सोताआ जिव आपाआ काजे आपी देदू.

3 जेहलोहो देवोअ माअहुंहूं ने होबे एहलोहो तुमामेहें सिनालो, आन कोड्ली बी जातीइ एठो काम नेत लालस कोइलोअ गोठी ने जोवे. 4 आन नेत विणलाज्यी बाशाआ वापर, नेत साड़गाय, नेत निंदा कोइलोअ, ए गोठी तुमाम ने जोवे, एहलिही गोठी होबा नाहां देती. तेताआ वोतीइ तुमू देवोअ धन्यवाद कोअहूं जोवे. 5 काहाके तुमू ओं जांअतेहे के सिनालो, खाराब कामे कोअनारे, लालसी मांअहें, ओं मुर्तीपुजाआ होस होय. एहलेहे माहें ख्रिस्ताआ आन देवोअ राजोअ वारसदार नाहां ओवनारे.

6 रिकामा बाशणोवाअहीं कोडो तुमुहूं ठोगुहूं ने जोवे; काहाके यांज कामोवाअहीं देवोअ खोत आदेश ने माननारा माहूंपोअ पोड़केहे. 7 तियाहाकोत तुमू तियांअरी भागिदार मा बोणहा. 8 काहाके तुमू पेल आंदारामेहें ओते, पोन जेदिहीं रोत तुमू देवोअ माअहें बोण्येहें, तेदिहीं रोत तुमू उजालामेहें होय, तियाहाकोत तुमू उजालाम सालनारा माअहुंउं होस साला. 9 काहाके उजालाअ फल आखी जातीइ भलाय, आन सतीपण, आन सत्य होय, 10 आन देवोहो कि गोमेहें तो फारकीत ल्या. 11 आंदाराआ फालतु कामोमेहें भागिदार मा ओवहा, पोन उलटो तियाहा खुल्लो कोइत देखाड़ा. 12 काहाके तियांआं गुप्त्ये कामे सोबीवाअहीं कोत आपीइलोअ बी लाज आवेहे. 13 आन आखी गोठी उजालामेहें खुल्ली देखाअतीही, आन उजालो पाड़नारु ताम तो दिवू होय. 14 याअ कोअते तो कोहे,

"ए हुवनारा उठ,

मोल्याम रोत जिवतु ओव;

ताहां ख्रिस्ताआ उजालो तापोअ सोमके."

15 तियाहाकोत तुमू केहें कोइत जिवतेहे तों सांबाला. विणहान्या माहुंउं होस मा सालहा, पोन हानाला माहुंउं होस साला. 16 वेलेए हाजू वापर कोइत ल्या, काहाके दिही खाराब होय.✝ 17 तियाहाकोत तुमू विण ओकल्याआ होस मा ओवहा, पोन देवोअ मोर्जी कि होय तों तुमू जांइत ल्या.

18 दाराक्शाआ रोह* पीत कोइत झिंगवाअहा मा; काहाके या वाअहीं लुसड़ाय ओवेहे, पोन आत्मा वाअहीं पोआते जावा. 19 एकमेकाअरी भजने, स्तुतीगिते आन आत्मिक गिते गावया कोआ, जिवज्योअ मोनोमेहें प्रभुउ सामने स्तुतीगिते गावते रोवा. 20 आन सादा आखी गोठीइ काजे आपाआ प्रभु ईसु ख्रिस्ताआ नावोवाअहीं देव आब्हाआ धन्यवाद कोअते रोवा.

21 ख्रिस्ताआ बिके वाअहीं मानपान कोइत एकमेकाआ ताबाम रोवा.

22 बोईं, तुमू जेहेंकोइत देवोअ ताबाम रोतीही, तेहेंज कोइत तुमू जिवज्योअ कोअधण्योअ ताबाम रोवा. 23 काहाके जेहेंकोइत ख्रिस्त मंडड़ीइ मुख्य होय, तेहेंज कोइत माटी बोईंइ मुख्य होय, आन ख्रिस्त तियाआ पुरा शरीरोअ तारनारु होय. 24 पोन मंडड़ी जेहेंकोइत ख्रिस्ताआ ताबाम होय, तेहेंज कोइत बोईं, तुमू बी आखी गोठीम जिवज्योअ माट्योअ ताबाम रोअहूं जोवे.

25 माट्यों, तुमू जिवज्योअ बोईंहीं मेर कोआ, जेहें कोइत ख्रिस्ते मंडड़ी पोअ मेर कोइत तियाआ जिव मंडड़ीइ काजे आपी देदू. 26 ओं याअ कोअते के, तो मंडड़ीही तियाआ वसनरुप पाअयों वाअहीं तुवीत, सोकी आन पवित्र कोइत देवोहो होपीत सेके. 27 एताआ काजे के, तो मंडड़ीही वोड़लीइ होस सोताआ काजे हिंगरावित देवोअ सामने हजर कोइत सेके, तियीम वाहीं बी डाग, सुक नेत आरोप ने जोवे, पोन सोकी आन निर्दुस जोवे. 28 तेहेंज कोइत माटी बी खाजगी बोईंपोअ सोताआ जिवोअ होस मेर कोअहूं जोवे. जो खाजगी बोईंपोअ मेर कोअहे, तो सोतापोअ मेर कोअहे. 29 कोडो बी सोताआ शरीरोअ सीस नाहां कोअतो, पोन तो वारुहूं सांबालेहे, तेहेंज कोइत ख्रिस्त बी मंडड़ीही सांबालेहे. 30 काहाके आपू ख्रिस्ताआ शरीरोअ भाग होय. 31 "याअ कोअते माटी तियाआ आयहीन आब्हाहा सोड़ीत तियाआ लाडीइरी मिलीत रोय, आन तें बेनु एक डिल बोणीत रोय."✝ 32 ए ते जास्ती उंडेए गुप्त्यी गोठी होय, पोन आंय ख्रिस्त आन मंडड़ीइ विसमेऱ्यीइ गोठी कोहो. 33 तेहेंज कोइत तुमामेर्‍याआ आखाज जेहेंकोइत सोतापोअ तेहेंज कोइत तुमाआं बोईंपोअ मेर कोआ, आन बोईं सोताआ कोअधण्योअ मानपान मिकुहूं जोवे.