1 पौलुसोअ वोगेहे रोत जो ख्रिस्त ईसुउ वाखरी जेलेम होय, आन पाही तिमथ्याआ वोगेहे रोत आमाअरी काम कोअनारु मेरालू जोड़ीदार फिलेमोन, 2 आन बोअह्हीं अप्फिया, आन आमाअरीइ सिपायड़ू अर्खिप्पुस आन फिलेमोनोअ कोर्‍यीइ मंडड़ीइ नाव से ओं पत्र:

3 आपाअ देव आब्हू आन प्रभु ईसु ख्रिस्त यापोअ रोत तुमुहूं मेरवानी आन शांती जोड़ती रोअहूं जोवे.

4 फिलेमोन पाही, आंय कायम माआं देवोअ धन्यवाद कोअहो, आन आमाआं प्रार्थनामेहें बी ताहूं ओर मिकोहो. 5 काहाके प्रभु ईसुपोऱ्युउ ताआ विश्वास आन देवोअ माअहों पोअ ताआ मेर कोइलोअ सर्सा आंय उनाअयुहू. 6 आन आंय प्रार्थना कोअहो के ख्रिस्ताम विश्वासी पाव्हीइलांअरी संगती कोइलो वाईं आपू कोड्ले कोड्ले हाजे कामे कोइत सेकताहा तों ताहूं उंडे रोत समजाअहूं जोवे. 7 मेराला पाही, ताआ मेरेवाईं माहूं जास्ती खुसी ओवी! काहाके तुमे आखा विश्वासी पाव्हीइलाआं मोन खुस कोइ देदोहो.

8 तिहीं वाअहीं, जों हाजो तों ताहूं आदेश आपित कोअलोअ माहूं ख्रिस्ताआ वाखरी हिम्मत बी ओवे. 9 तेबी ताहूं मेरे वाईं विनंती कोइत कोअलोअ माहूं हाजो गोम्यो, आंय डायु पौलुस जो ओमे ख्रिस्त ईसुउ वाखरी जेलेम होय. 10 आंय जेलेमेहें ओतु तेहेलाम जियाहा मी आत्मिक जल्म आप्यो तिया माआं पोर्‍या उनेसिमुसोअ कोअते ताहूं विनंती कोअहो. 11 तो ताम पेल ताआ किज कामोंअ ने ओतू, पोन ओमे तो आपा बेनु जोओंअ काजे वोडा कामोअ होय.

12 तिहीं वाईं आंय तियाहा फाशुउ ताआ जागे मोकली देदुहूज जो माआ जिवुज कोअलुउ होय. 13 हाजी बातमीइ वाखरी आंय जेलेम ओतु, तेहेलाम माआं सेवा कोए तेहें काजे ताआ बोद्ले आंय तियाहा माआंज जागे मिकनारु ओतू. 14 पोन माहूं ताआ राजी वासी किज ने कोइलोअ गोम्यो, काहाके ताआ उपकार दाबावो वाईं नाहां पोन खुसी वाअहीं कोअल्यू जोवे. 15 केहेंनेत तो सेलवाआ कायम आरी रोत सेके, यीज गोठीवाईं थोड़ाक दिहोअ काजे ताआ जागे रोत आंगे ओवुय. 16 ओमे तो पावर नाहां, पोन तिया रोत बी वादार मोन्ज्ये मेराला पायहोअ होस होये. तो माअ काजे खास होये, आन ओमे तु तियाहा प्रभुमेहें एक पावर आन एक मेरालू पाही कोत मानुहूं जोवे.

17 जर तू माहूं ताआ हाती कोत समजीइतुय, ताहां तियाहा एहें कोइत मानेएं के तो आंयज होय. 18 जर तिये ताआ काविंहीं नुकसान कोअयोय नेताहां तियापोअ ताआ काविंहीं लेणो ओय, ताहां माअ नावोपोअ लेखीत ले. 19 आंय पौलुस सोताहा माआं आथो वाअहीं लेखोहो के, आंय भरपाइ कोइ देहीं; आन ओं कोअलोअ गरज बी नाहां, काहाके माअ कर्ज तोम तूज होये. 20 पाही, ए खुसी माहूं प्रभुमेहें ताअहें रोत जोड़ुहूं दे. ख्रिस्तामेहें माआं जिव ताजु कोइ दे.

21 ओं तु मानित लेही या भरिवसावाईं आंय ताहूं लेख्योहो, आन माहूं मुंदू होये के, तु आंय कोहो यापरोत जाअखो कोअही. 22 आन फाशीइ एक गोठ ए बी कोअजी के, माअ कोअते रोअलोअ सोय कोइत मिकजी. माहूं आशा होय के तुमाआं प्रार्थना वाअहीं फाशुउ आंय तुमुहूं आपात जाहीं.

23 ख्रिस्त ईसुमेहें माअरी जेलेम होय ओ एपफ्रास ताहूं सलाम मोकलेहे. 24 आन तेहलाज माआं हेंगात मार्क, अरिस्तर्खुस, देमास आन लुक ताहूं सलाम कोताहा.

25 आपाअ प्रभु ईसु ख्रिस्ताआ मेरवानी तुमाआं आत्माअरी रोअहूं जोवे. आमेन.