1 बुद्दीमान माहुंउं होस कोडो होय? एखी गोठीइ अर्थ कोडो लागाड़ीत सेकेहे? मोनव्योअ बुद्दी वाअहीं तियाआ मुख सोमकेहे, आन तियाआ मुखोअ दुख निहींत जाहे.

2 आंय ताहूं सल्लु आपोहो के देवोअ हुंबर लेद्ली शप्पतोअ वाअहीं राजाआ आदेशोअ पालन कोआ. 3 तियाआ सामने जाअलोअ उतवाल्या मा ओवहा; जर तो एखी गोठीपोअ रोत नाराज ओय ताहां तुमू तिहीं उबे मा रोहा, काहाके राजाआ मोनोमेहें जेहेलोहो आवेहे तेहेलोहो तो कोअहे. 4 काहाके राजाआ शब्दामेहें ताकत रोहे, आन तियाहा कोडो कोत सेकेहे के तु एहेलोहो काहा कोअहे? 5 जों राजाआ आदेशोहो माने, तों वासाइत जाय, पोन एक बुद्दीमान माहुंउं एहेलोहो कोइलोअ बोराबर वेल जांअहें आन तो ओं बी जांअहें के ए गोठ कोयों कोअहूं जोवे. 6 काहाके आखी गोठीइ ठरवीइल्यी वेल आन पद्दत रोहे, तेबी माहुंउं दुख तियाआ कोअते जाअखीलोहो रोहे. 7 तो नाहां जांअतो के कि ओवनारो होय, आन कोयों ओवनारो होय? ओं तियाहा कोडो कोत सेकेहे? 8 जिव निहे तेहेलाम जिवोहो रुकीत लेय एहलीही काअलाज माहूंपोअ सेक्ती नाहां रोती; मोत आवीइलोअ दिही कोडाआ ताबामेऱ्यीइ गोठ कायनाहां; आन यी लड़ायीमेहें रोत कोडाहाज नाहां सुटीत सेकाअतो, आन पापी माहुंउं तियाआ पापोम रोत नाहां वासाइत सेकतो.

9 जेतेहे कामें धरतीपोअ ओवतेहे तियां आखाहा ध्यान लागाड़ीत ओं आखो आंय पाल्यो, आन ओं बी पाल्यो के एक माहुंउं बिहीरा माहूंपोअ आधिकारी बोणीत कोइत सोतापोअ नुकसान कोइत लेहे. 10 ताहां आंय पाप्योहों माहणोमेहें डेटत्लाहा पाल्यो. पोन जियां हाजे कामे कोअये तियांहां सोकू जागू सोड़ीत जाअहूं पोड़ेहे, आन होयरोमेएं माहें तियांहां विहीरात जातेहे. ओं बी वायाज होय.

11 खाराब कामोअ डोंड माहुंहूं वेगु नाहां जोड़तू; तियाहा कोत तियांआं मोन खाराब काम कोइलामेहें लागीत रोहे. 12 पापी माहुंउं होव वारी पाप कोएन जाअखो जिवे, तेबी माहूं मुंदू होय के देवोहो बित सालनाराआ हाजोज ओवे. 13 पोन पापीइ सेवट हाजो नाहां ओवतो, आन सावलाआ होस तियाआ जिवन एका तालोअ रोहे, काहाके तों देवोहो नाहां बितो. 14 फाशीइ एक वाया गोठ होय जे धरतीपोअ ओवेहे; के पापीही जोड़ुहूं जोवे तों फल धर्मी माहुंहूं भोगुहूं पोड़ेहे, आन धर्मीही जोड़ुहूं जोगोहो हाजो फल तियां पाप्योहों जोड़ेहे. आंय कोहो के ओं बी वायाज होय.

15 तियाहाकोत आंय माहुंहूं सल्लु आपोहो: खुसी कोआ, धरतीपोअ माहुंउं कोअते खाअलाअ पीइलाअ आन खुसी कोइलोअ सिवाय किज नाहां हाजो. जो जिवन देव तियाहा यी धरतीपोअ आप्योहो, तिहींम काम कोअतामेहें ओंज तियाअरी रोय.

16 जेहेलाम आंय बुद्दी मिलवीलोअ, आन धरतीपोअ ओवनारा आखा कामोहों पालीइलोअ कोअते माआ मोन लागाड़्यो, के एं माअहें केहें कोइत रातेन दिही जागते रोतेहे; 17 ताहां देवोअ आखो काम आंय पाल्यो जों धरतीपोअ ओवेहे, माहुंउं तियाआ खास गोठी जाइंलोअ केतोहो बी मेहेंनत काहा ने कोए, तेबी तों तियाहा जाइंत नाहां सेकतो. जर एखु हुशार माहुंउं तियाहा जाइंलोअ कोशित कोए तेबी तो तियाहा जाइंत नाहां सेकतो.