उपदेशक 1

जिवन वाया होय

1 येरुसालेमोअ राजा, दाविदोअ पोऱ्यु आन उपदेशकोअ वसन.

2 उपदेशकोअ ओं वसन होय, "वाया होय, वाया होय! वायाज होय! आखो बादो वायाज होय." 3 जे मेहेंनत माहुंउं यी धरतीपोअ *1:3 धरतीपोअ दिहोअ उजालाम होयकोअहे, तिहीं वाअहीं कि जोड़ेहे? 4 एक पिड़ी जाहे, आन बिहीरी पिड़ी आवेहे, पोन धरती जेहेलीन तेहेलीहीज हादाफल रोहे. 5 दिही उगेहेन बुडेहे बी, आन तो जिहीं रोत उगेहे तिया जागा पोअ वेगुज जातु रोहे. 6 वारो देहामाआ वोल सालेहे, आन फिरीत कोइत पालामाआ वोल आवेहे; तो सालतो-फिरतो रोहे, आन जिहीं रोत आवेहे तिहींज जातो रोहे. 7 आखी खाडी एकाज जागाअहें तालताल वोहयाज कोअतीही, आन ते आखी दोऱ्यामेहें जात कोइत एक्ठी ओवतीही, पोन तेबी दोऱ्या जोलोम नाहां पोआतू. 8 आखी गोठी थाकाड़नारीज होय; माहुंउं यी पुरी गोठीही नाहां कोत सेकतो; नाहां ते डोआ पालीत कोइत थाकता, आन कान उनाइत कोइत नाहां पोआता. 9 जे गोठ ओत गोयीही, ते फाशीइ ओवे, जों किबी बोणित गोयोहो तों फाशोअ बोणे; यी धरतीपोअ किज बी नोवो कायनाहां. 10 केहें एहेलिही एखु गोठ होय जियीइ बाप्तिम माहुंउं कोत सेके के पाला ए नोवी होय? ए ते आमा रोत जास्ती वेगाआ वाडोम रोतुज ओवती रोयीही. 11 जुनी गोठीइ किज ओर नाहां रोती, आन तियांआं फासाड़ी आवनाराहां बी ओवनारी गोठीइ ओर ने रोय.

बुद्दी आन ग्यान

12 आंय उपदेशक येरुसालेमोमेहें इस्राएलोअ राजा ओतु. 13 यी धरतीपोअ जों बी ओवेहे, बुद्दी वाअहीं होदीइलाअ आन तिया मेऱ्यीइ गोठी जाइंलोअ कोअते आंय माआ मोन लागाड़्योहो. ए एक तारासोअ गोठ होय जे देवे या मोनवीइ कोअते ठरव्यीही के तों तिहींज मेहें लागीत रोय. 14 आंय तियां आखा कामोहों पाल्ये जें धरतीपोअ ओवतेहे, तें आखे वाया होय, ओं ते फोलो वाराहा तोअतेहे तेहेलोज होय. 15 जों वाकड़ो होय तों सिदो नाहां ओवित सेकतो, आन जों होयज नाहां तियाआ गणती नाहां ओत सेकती.

16 आंय माआ मोनोमेहें कोयो, "पाल, तु जाअखीलोहो ग्यान मिलवीत लेदोहो, एतोहो के तियां आखा राजाआं रोत वादीत गोयोहो, जे ताआ रोत पेल येरुसालेमोमेहें ओता, ताहूं जाअखीलिही बुद्दी आन ग्यानोअ आनुभाव ओत गोयुहू."✝1:16 1 राजां 4:29-31 17 आंय ओं जाइंलोअ कोअते माआ मोन लागाड़्यो के बुद्दी कि होय, गांडाय आन फोगाय कि होय. ताहां माहूं समजाअयो के ओं बी वाराहा तोअत्लाआ होस होय. 18 काहाके जाअखी बुद्दी वाअहीं जाअखी सिंता बी आवेहे, आन जों ग्यान वादाड़ेहे तों तियाआ दुख बी वादाड़ेहे.