1 जेहेलाम तु देवोअ मंदिरोमेहें जाही, ताहां सांबालतीज जाजी*; देवोअ गोठ उनाइलोअ ओं फोगा माअहोंअ कोअल्या गाराहा रोत बी जाअखो हाजो होय; फोगाहा ते खाराब कामे कोअतेहे तों नाहां मुंदू जातू. 2 गोठी कोइलामेहें जल्दी मा कोअही, आन ताआ मोनोमेऱ्यीइ एखु गोठ देवोअ सामने उतवाल मा कोत देही, काहाके देव होरगामेहें होय आन तु धरतीपोअ होय; तियाहा कोत ताआ गोगीइलो थोड़ो जोवे. 3 जाअखी कालजी लेअलो वाअहीं खाराब होपने पोड़तेहे आन जाअखो गोगीइला वाअहीं फोगे ठरवाअतेहे. 4 जेहेलाम तु देवोअ काजे पालनी तोअही, ताहां ते पुरो कोइलामेहें वाआ मा लागाड़ही; काहाके तो फोगा वाअहीं खुस नाहां ओवतु. जे पालनी तु तोअही, तियीही पुरो कोअजी.✝ 5 पालनी तोइत ते पुरी ने कोए तिया रोत जी पालनीज ने तोइली तों जाआं हाजो. 6 सोताआ जिबानीम गुतीत कोइत पापोमेहें मा फोसीत जाही, आन माहूं सुकीत गोगी देवाअयो कोत देवदुतोअ सामने मा कोही, नेत ताआ शब्द उनात कोइत देवोहो खोत लागेन तो तुमाआ मेहेंनती वाअहीं कोअल्या कामोहों आरवीत टाकी देय. 7 जेहेलाम माहुंउं जाअखो जाअखो होपने पालो वोलेहे, ताहां तियाआ रिकामी गोठी बी वादीत जातीही: पोन तु देवोहो बित सालजी.

8 जर तु एखा मुलखोमेहें गरीब पोअ विरोद ओवत्लाहा पालही, न्याय आन हुदी गोठीही बिगड़ीइत्लाहा पालही, ताहां बोगलाअही मा; काहाके एका आधिकारीइ उपोअ तियाआ रोत वोडु आधिकारी रोहे आन तियाआ रोत बी वोडु आधिकारी रोहे.

9 धरतीपोऱ्योअ ओन आखाआ काजे होय, आन राजाहा बी खेतीइ पोरहेज रोअहूं पोड़ेहे.

10 जियांहां पोशा जाअखा गोमताहा तें पोशा वाअहीं केदिहीं ने ताराअनारे; आन जों माहुंउं पोशाआ लालस कोअहे, तियाहा किज लाब नाहां जोड़तू, ओं बी वायेज होय. 11 जेहेलाम मालमिलकत वादेहे, ताहां तियाहा खानारे बी वादतेहे, तेहलाम तियाआ मालख्योहो कि लाब? तो निस्तु तियाहा डोआ वाअहीं पालेहे तेतुज मे! 12 मेहेंनत कोअनारो थोड़ो खाय नेत वादार, तेबी तियाहा हाजी निंद आवेहे; पोन मालदारोहो तियाआ मालधन वादीइलो वाअहीं निंद नाहां आवती.

13 आंय धरतीपोअ एक खाराब गोठ पाल्यी, धनोअ मालिख तियाआज नुकसानीइ कोअते पोशा हेंगालेहे. 14 आन ते पोशा एखा खाराब कामोमेहें उडीत जाताहा, आन तियाआ कोअमेहें पोऱ्यु उब्जेहे, पोन तियाआ आथोमेहें किज नाहां रोतो. 15 जेहेलुहू तो याह्हीइ पोटाम रोत जल्म लेदो तेहेलुज नागरुज जातु रोय, तो तियाआ आथोमेहें मेहेनतीइ फल किज नाहां लेत जात सेकतु.✝ 16 ए जुदी खाराब गोठ होय, जेहेलुहू तो आयुतो, तेहेंज कोइत तो इंहीं रोत जातु रोय. तियाहा तियाअ मेहेंनती पोअ रोत कि लाब ओवू? 17 तिये आंदाराम बोहीत खादो, तिये दुखोमेहें, सिंतामेहें, बिमारीमेहेंन खोतेमेहें पुरो जिवन काट्यो.

18 पाल, जे हाजी गोठ आंय आनुभाव कोअयीही ते ए होय के, माहुंउं खाय-पिय आन जे तियाआ मेहेंनत जे तो धरतीपोअ कोअहे, तियाआ पुरा जिवनोमेहें जो देव तियाहा आप्योहो, खुस रोय; काहाके तियाआ भाग ओज होय. 19 आखा माहुंहूं, जियाहा देव मालमिलकत आप्यीही, आन तियाहा वापरीइलोअ आन तियामेहें रोत भाग लेअलाआ आन मेहेंनत कोअतामेहें खुसी कोइलाआ बी सेक्ती आप्यीही: ओं देवोअ वरदान होय. 20 माहुंउं तियाआ पुरा जिवनोहो कायम ओर ने मिके, काहाके देव तियाहा मोनोमेहें खुस मिकेहे.