1 आखी गोठीइ एक वेल रोहे आन धरतीपोअ* ओवनारा आखा कामोअ एक वेल होय.

2 जल्म लेअलाआ वेल, आन मोइलाअ बी वेल;

ठांइलोअ वेल आन तियाहा उफड़ीइलोअ बी वेल होय;

3 देअलोअ वेल, आन हुदारीइलोअ वेल;

आरवीइलाआ वेल, आन बोणावीइलाआ बी वेल रोहे;

4 रोड़ीइलाआ वेल, आन ओंहींइलोअ बी वेल रोहे;

विखू कोइलाआ वेल, आन नासीइलाअ बी वेल रोहे;

5 डोणे टाकीइलोअ वेल, आन डोणे हाटवीइलाआ बी वेल रोहे,

गोले लागाड़ीलोअ वेल, आन गोले ने लागाड़ीलोअ रुकीइलाआ बी वेल रोहे;

6 होदीइलोअ वेल, टाकीइलोअ बी वेल;

वासाड़ीत मिकीइलोअ, आन उडाड़ीलोअ बी वेल रोहे;

7 फाड़ीइलोअ वेल, आन हिंवीइलोअ बी वेल रोहे;

ठावका रोअलाअ वेल, आन गोगीइलोअ बी वेल रोहे;

8 मेर कोइलाआ वेल, आन दुस्मोनी कोइलाआ बी वेल रोहे;

लड़ायीइ वेल, आन होकेहे रोअलाआ बी वेल रोहे.

9 काम कोअनाराहा तियाआ मेहेंनती रोत कि लाब ओवेहे? 10 देवे मोनवीइ काजे जें वोजावाले कामे होप्येहे तें मी देख्येहे. 11 तियीं आखी वस्तुहू तियाआ कोअते हाजी वेलेमेहेंज बोणावयीही. तिये माहुंउं मोनोमेहें हादाफल्यीइ ओकलेए ताकत आप्यीही, ते बी माहुंउं नाहां समजीइतो के देव सुरवाती रोत ते आखरी जाआं कि कोअयोहो. 12 आंय जाइंत लेदोहो के माहुंउं कोअते खुसी कोइलाआ आन जिवन पोइत हाजो कोइला सिवाय बिहीरो किज हाजो कायनाहां. 13 आन माहुंउं खाय-पिय आन तियाआ आखी मेहेंनती मेहें खुस रोय ओं बी देवोअ दान होय.

14 आंय जांअहों के देव जों किबी कोअहे तों हादाफल टिकीत रोहे; तियामेहें ने कमी कोइत सेकत्ले आन ने वादाड़ीत सेकत्ले; देव एहेलोहो याआ कोअते कोअहे काहाके माअहें तियाहा बित सालुहूं जोवे. 15 जों किबी ओवो तों याआ पेल बी ओत गोयोतो; जों ओवनारो होय, तो बी ओत गोयोहो; आन देव ओवल्यी गोठीही फाशुउ ताल ताल कोअहे.

16 फाशोअ आंय धरतीपोअ कि पाल्यो के न्यायोअ जागापोअ अन्याय रोहे, आन हाजा कामोअ जागापोअ बी खाराब कामे ओवतेहे. 17 आंय मोनोमेहें कोयो, "देव धर्मी आन पापी बेनुउं न्याय कोए," काहाके तियाआ जागे एक एक गोठीइ आन एक एक कामोंअ वेल होय. 18 आंय मोनोमेहें कोयो, "याआ काजे ओवेहे के देव माअहुंहूं तापासे ताहां तियांहां मुंदू जाय के तें जनवारोअ होस होय." 19 काहाके जेहेलीही माहुंउं तेहेलीज जनवारोअ बी दशा रोहे; बेनुउं तेज दशा रोहे, जेहेलोहो एक मोअहे तेहेलोज बिहीरो बी मोअहे. आखाआ हावा एक हारकी रोहे, माहुंउं जनवारो रोत वादीत नाहां; आखो वायाज होय. 20 आखे एकाज जागामेहें जातेहे; आखे कादवोअ बोण्येहे, आन आखे कादवोम जानारे होय. 21 केहें माहुंउं आत्मा उपोअ जाहे आन जनवारोअ जिव निसेए वोल जात कोइत कादवोम मिलाअहे? ओं कोडो जांअहें? 22 सेवटी आंय ओं पाल्यो के याअ रोत जाअखो किज हाजो नाहां, के माहुंउं तियाआ कामोमेहें खुस रोअहूं जोवे, काहाके तियाआ भाग ओज होय; माहुंउं एखो मोइत जाय तिहींइं फासाड़ी तियाहा वापिस लेतावित कोइत तियीं गोठीही कोडो देखाड़ीत सेकेहे के?