उपदेशक 7

जिवनोअ बाप्तिमेहें विसार

1 हाजो नाव किमती अत्तर रोत हाजो होय आन मोतोअ दिही जल्माआ दिहो रोत हाजु होय.✝7:1 निती 22:1

2 तिवारोम जाअलो रोत ते मोयात ओवल्या परिवारोमेहें जाअलाआ हाजो; काहाके आखा माअहोंअ सेवट ओंज होय, आन जों जिवतो होय तों मोन लागाड़ीत कोइत यी गोठीइ विसार कोए.

3 ओंहींइलोअ रोत रोड़ीइलोअ हाजो होय, काहाके सोबीपोऱ्याआ दुखो वाअहीं मोन हुदरेहे.

4 बुद्दीमान माहुंउं मोन विखु कोअनाराआ कोओअ वोल लागीत रोहे, पोन फोगाआ मोन मोज्या कोअनाराआ कोअमेहें लागीत रोहे.

5 फोगाआ गित उनाइलोअ रोत ते बुद्दीमानोअ गाई उनाइलोअ हाजो होय.

6 काहाके फोगाआ ओंहींइलोअ मोन्ज्ये आंड्लाआ थुड़ी तितड़ीइनारा काटाआ होस रोहे; ओं बी वायाज होय.

7 ठोगोअ कामायी वाअहीं हुशार बी फोगो बोणीत जाहे, लास लेअला वाअहीं बुद्दी सेलाअहे.

8 एखा कामोअ सुरवात कोइलो रोत तियाआ सेवट हाजू रोहे; आन धिर खेटनारो माहुंउं वोडाय कोअनारा रोत हाजो होय.

9 तुमाआ मोनोम उतवाल खोत मा कोअहा, काहाके खोत फोगाआ मोनोमेहें रोहे.✝7:9 याकोब 1:19

10 ओं मा कोहा, "आज्याआ दिहो रोत सेकला दिही हाजा ओता?" काहाके याआ बाप्तिम तुमाआ एहेलोहो कोअलोअ बुद्दी वाअहीं नाहां.

11 बुद्दी मालधनोअ होस हाजी होय, जिवता माअहोंअ कोअते बुद्दी फायदाआ होय. 12 पोशा वाअहीं आधार जोड़ेहे तेहलुज ओकले वाअहीं आधार जोड़ेहे. जियापोअ ओकल होय तियाआ जिवोअ राखवाली ओवेहे.

13 देवोअ कामोपोअ विसार कोआ; जियाहा देवो वाकड़ो बोणायो ओय तियाहा कोडो हुदो कोइत सेकेहे? 14 खुसीइ दिहोमेहें खुसी बोणावा, आन दुखोअ दिहोमेहें विसार कोअ, काहाके देव बेनुहूं आरी मिक्योहो, जिया वाअहीं माहुंउं तियाआ फासाड़ी ओवनारी एखी गोठीही ने समजीत सेके.

15 एखु धर्मी हाजे कामे कोअहे तेबी आरवात जाहे, आन पापी खाराब कामे कोअहे तेबी जाअखो जिवेहे, आंय माआ वाया गोल्या जिवनोमेहें ओं आखो पाल्योहो; 16 सोताहा जाअखो धर्मी मा बोणावही, आन जाअखो बुद्दीमान बी मा बोणावही; नेत तु सोताआ गुडापोअ कुवाड़ो लागावीत लेही.

17 जाअखो खाराब बी मा बोणही, आन मा फोगो बोणही; तु वेले रोत पेलुज काहा मोअहूं जोवे? 18 हाजो ओं होय के तु यी गोठीही तोइत रो; आन तियी आखी गोठीप रोत आथ मा फेड़ीत लेही; काहाके जों देवोहो बित सालेहे तों कठीण गोठीही उनकावित लेय.

19 ओकल माहुंहूं सेक्ती आपेहे. एक हुशार माहुंउं होयरोअ दोह पुडारी रोत जाअखु ताकत वालू रोहे.

20 यी धरतीपोअ हादाफल हाजे कामे कोअनारो आन केदिहीं पाप ने कोअनारो एहेलोहो माहुंउं कायने.

21 जेतीही गोठी कोये तियी आखी गोठीपोअ कान मा लागाड़ही, जर तु तेहें कोअही ताहां केहें नेत ताआ सेवकुज ताआ निंदा कोए; 22 काहाके तु सोताहा जाअहें के तुमे बी वारुज वारी बिहीराआ निंदा कोअयी.

23 ओं आखो आंय बुद्दीइ वाअहीं जाइंत लेदोहो; आंय कोयो, "आंय बुद्दीमान ओत जाहीं;" पोन ओं मारोत सेटे रोयो. 24 तो जो सेटे आन खुब उंडे तियाहा कोडो जाइंत सेकेहे? 25 आंय बुद्दी आन ओकलेए बाप्तिमेहें जांइलोन होदीइलो कोअते माआ मोन लागाड़्यो; पापी टेव फोगाय आन गांडाय होय ओं समजीइलोअ काजे फाशुउ आंय माआ मोन लागाड़्यो.

26 आय मोतोपोअ रोत एक दुख आपनारी गोठ पाल्यी, मोन्जे ते बोयोंअ जियीइ मोन फांदू आन जाल होय आन जियीइ आथोमेहें आथकोड़्यी होय, जियापोअ देव खुस ओवेहे, तो माटी एतू वासाइत सेकेहे, पोन पापी तियाआ आटालाम पोड़े. 27 पाल, उपदेशक कोहे, हुशारीइ कोअते आलाग आलाग गोठी जोड़ीत कोइत तापाशी, आन ए गोठ निहींयी 28 पोन जियाहा आंय होदतु रोयू, तो माहूं ने जोड़्यू. हाजार माट्योमेहें का तेबी एक माटी मिल्यू, पोन तियामेहें माहूं एक बोयोंअ बी ने देखाअयी. 29 पाला, माहूं एज गोठ देखुहूं जोड़्यीही, के देवे मोनवीही सिदो बोणायोहो, पोन तिये जाअखीलीही कदर काड्यीही.