उपदेशक 6

1 धरतीपोअ आंय एक खाराब गोठ देख्यी, जियाआ वोजा वाअहीं माहुंउं दाबात रोहे. 2 एखा माहुंहूं देव मालमिलकत आन मानपान एतुहू आपेहे के जों किबी तियाआ मोन कोय तियाहा किज कमी नाहां पोड़तो, तेबी देव तियामेहें रोत तियाहा खाअहूं नाहां देतु, एखु बिहीरोज तियाहा खाहे; ओं वायाज आन केतोहो खाराब दुख होय. 3 जर एखा माट्योअ होव पोऱ्या बी ओवा, आन तो जाअखीले वोरह्ये जिवतू रोयू आन तियाआ जिवीइलोअ दोरी वादीत बी जाय, पोन तियाआ जिव खुस ने रोयू आन मोयू तिहींइं फासाड़ी तियाहा ओजी देदू, ताहां आंय कोत्लू, तिया रोत जी आरदो उब्जीइल्यो पोऱ्यो जाआं हाजो ओये. 4 काहाके तो वायाज आयु आन आंदारा मेहेंज जातु रोयु, आन तियाआ नाव बी आंदारा मेहेंज निकात गोयो. 5 आन ने दिहोहो पाल्यो, ने एखु गोठीही जाइंत सेकू; तेबी याहा तिया माअहोंअ रोत जाअखू आराम जोड़्यू. 6 तो बेन हाजार वोरह्ये जिवे पोन तेबी जिवनोमेहें खुसी ने जोड़्यीय ताहां तियाहा कि लाब? आखे माहें आखरीपोअ एकाज जागाम जातेहे.

7 आखी मेहेंनत माहुंउं खाअलोज काजे कोअहे, पोन तियाआ पेट नाहां पोआतो. 8 ओमे हुशार माहुंउं काअली गोठीमेहें फोगा माहुंउं रोत हुशार बोण्यो? गरीब माहुंउं जिवनोमेहें केहें कोइत सालुहूं जोवे ओं जाअहें, ते बी तियाहा यामेहें कि लाब? 9 हादाफल कि तेबी मेलवीइलोअ मोनोअ इश्शा मिकीइला रोत हाजो ओं होय के तुमापोअ जों किबी ओय तियामेहें सुख माना. ओं वायाज होय; वाराहा तोअत्लाआ होस होय.

10 जों कोडो बी माहुंउं ओय, तियाहा तियाआ नाव सुरुवातीज आपी देदोतो: आन माहुंउं बाप्तिमेहें ओं प्रगट कोई देदोतो के तो निस्तो कादुउ होय. तियाहा काजे तो तियाआ रोत वादार ताकतवान माअहोंअरी सुलाईत नाहां सेकतो. 11 वारुज गोठी होय जिया वाअहीं जिवन फाशोअ बी वायाज रोहे, ताहां एहेलाहा जिवनोपोअ रोत माहुंहूं कि लाब? 12 मोनव्योअ एका तालोअ जिवनोमेहें तियाआ कोअते धरतीपोअ कि हाजो होय तो कोडो कोत सेकेहे? आगाड़ी कि ओवनारो होय तो तियाहा कोडो कोत नाहां सेकतो.