1 काहाके, मोशेए कायदु आवनारी हाजी गोठीइ फक्त एक सावलू होय, तो असली रुप कायनाहां, तियाहा काजे नियमोअ परमाणे वोऱ्ह्योअ डिठ एकुज जातीइ गाराहा वाअहीं आहने आवनारो हारोपुरो नाहां ओत सेकतो. 2 जर कायदु माअहुंहूं हारोपुरो कोइत सेकतु, ताहां गाराहा कोइलोअ बोंद काहा ने ओत जातो? काहाके सेवा कोअनारे एकुज वारीम सोके ओत जाते ताहां, तियांआं मोन तियांहां पापी ने ठरवीइतो. 3 पोन तियाआ उलटो तों गाराहा वोऱ्ह्योन वोऱ्ह्योअ पापोअ ईतवुउ कोइ देहे. 4 काहाके बोलदोअ आन बोकड़ाआ रक्तावाअहीं पाप दुर ओवे एहलोहो ओतीज नाहां सेकतो.

5 तियाहा काजे ख्रिस्त यी दुन्याम आवती वेले कोहे के,

"गाराहा आन भेट ताहूं ने जोवयी,

पोन तुमे माआं काजे एक शरीर तियार कोअयो."

6 कोड्लीज गाराहा वाअहीं देव खुस नाहां ओवू.

7 ताहां आंय कोयो, "देवा, मोशेए पुस्तकोमेहें माआं बाप्तिम लेख्याआ परमाणे,

देख, आंय ताआ इश्शा पुरी कोउ आवित लागुहू!"

8 उसे ताम तो कोहे के, "कोड्लीज गाराहा* आन भेट ताहूं ने जोवयी, तियांवाअहीं तु खुस ने ओवू," भले आखी गाराहा नियमोंअ परमाणे आपाअयाज कोअतीते, 9 तेबी कोहे, "देख, ताआ इश्शा पुरी कोइलोअ काजे आंय आवित लागुहू," ताहरुउ तो पेल्लाआ तियाहा उठाड़ी देहेन बिहीराहा बोहाड़ेहे. 10 देवोअ तियीज इश्शा वाअहीं आपू ईसु ख्रिस्ताआ शरीरोअ एकुज वारी ओवल्या गाराहा वाअहीं पवित्र कोआयेहे.देवान्यापोऱ्यीइ गाराहा

11 आखा यहुदी पुंजारा दाड़ख्याआ सेवा कोअताहा, तिया वाअहीं पाप नाहां तुवाअतू तेबी ते एहलोहो गाराहा ताल ताल आप्या कोअताहा. 12 पोन ओ माटी ताम पापोअ बोदले हादाजल्म्युउं गाराहा एक्कुज वारीम आपी देत देवोअ हाजाड़ीइ वोल जात बोठुहू. 13 आन तोयोंअ रोत तियाआ दुस्मोन तियाआ गुडाआ थुड़ीइ पाट्लू बोणुहूं जोवे यी गोठीइ तो वाट जोवया कोअहे. 14 काहाके जें पवित्र ओवतेहे तियांहां एकीज गाराहा वाअहीं पापोम रोत एकसोट्येज हारेपुरे कोइ देदेहे.

15 पवित्र आत्मा बी याआ बाप्तिमेहें आपुहूं साक्शी आपेहे. काहाके तिये पेल कोयोतो,

16 देव कोहे, "तियां दिहोअ फासाड़ी,

तियांअरी शप्पत खाहीं ते एहलिही होय के,

आंय माआं नियमोहों तियांआं मोनोम लेखिहीं,

आन आंय तियांआं दिमाकोम टाकिहीं."

17 फाशुउ तो एहें कोहे, "आंय तियांआं गुना आन तियांआं खाराब कामोहों फाशुउ केदिहीं ओर ने कोओ." 18 आन जिहीं गुनाआं माफी ओत गोयीही, तिहीं फाशोअ पापोअ काजे गाराहा आपिइलोअ ने रोयो.

19 तिहींइं काजे पाव्हीइला, आपुहूं ईसुउ रक्ता वाअहीं जाअखा सोका जागाम जाअलोअ हिम्मत जोड़ेहे. 20 जो तिये पोड़दामेहें मोन्ज्ये सोताआ शरीरोमेहें रोत आपाआ काजे ते नोवी आन जिवती वाट थापन कोअयिही. 21 आन तिहीं वाअहीं आपुहूं एहेलुहू महान पुंजारु जोड़्युहू जो देवोअ कोर्‍युउ आधिकारी होय. 22 ताहां साला, आपू खोरा मोनोवाअहीं आन पुरा विश्वासोवाअहीं, बुद्दीइ दोश दुर कोइलोअ काजेहे मोन हितड़ावल्यो आन सोका पाअयों वाअहीं तुवल्यो शरीर लेत कोइत देवोअ आहने आवा. 23 आवा आपू जे आशा तोअयिही तिहींम वातड़े रोहूं, काहाके जिये आथवसन आप्योहो, तो इमानदार होय. 24 आन एकमेकाहा समजीत लेहूं आन मेर, हाजे कामे कोए तेहें काजे एकमेकाहा हिम्मत आपहूं. 25 आन जेहलोहो बिहीरे वारुज जोएं कोअतेहे तेहेलोहो तुमू एकमेकाहा मिलीइलोअ मा सोड़हा, पोन एकमेकाहा समजाड़ते रोवा; आन जेहें जेहें तो दिही आहने आवत्लू देखाअहे, तेहें तेहें या रोत वादार कोअते जावा.

26 पाव्हीइला, जर आपू खोरो कि होय तो जाइंत बी देखदेखीइज पाप कोअते रोहूं, ताहां फाशोअ पाप माफीइ काजे बिहीरो गाराहा बाकी नाहां रोयो. 27 पोन होव! एक खुब वोडु न्यायनिवाड़ु आन आगीमेहें पेटाइलोअ बाकी रोयोहो, जों आखा दुस्मोनोहों खाँआं वाली देय. 28 जाहां मोशेए नियम ने माननाराहा बेन नेताहां तीन साक्शी वाअहीं वाहीं दया माया ने कोअत्ले पोन माइत टाकत्ले. 29 ताहां विसार कोआ, जिये देवोअ बेटाह्हाहा गुडाआ थुड़ी सेंद्यु आन शप्पतेए रक्ताहा, जिहींवाअहीं तो पवित्र ठऱ्यू तिया रक्ताहा एठो होमजेहे, आन जिये मेरवानींइं आत्माआं बेइजती कोअयी तियाहा केतुहू वादार डोंड जोड़े तुमुहूं मुंदू होय! 30 काहाके आपू तियाहा ओलखीइतेहे के, जो कोहे, "बोदलू लेअलोअ माआं काम होय, आंयज बोदलू आपिहीं." आन फाशोअ एहें कोहे के, "प्रभु सोताआ माअहोंअ न्याय कोए." 31 जिवता देवोअ आथोम पोड़ीइलो सादी गोठ कायनाहां.

32 पोन फासल्याआ तियां दिहोअ ओर कोआ, जियां दिहोम तुमुहूं उजालो जोड़तोतो, तेहेलाम तुमू वोडी हाकड़ेम बी टिकीत रोये. 33 केतीही वारी ताम तुमाआं बेइजती ओवी आन तुमू गाई खादी, आन केतीही तेबी वारी तुमू तारास वेठनाराअरी तारास वेठीइलोम भागिदार बोण्ये. 34 काहाके तुमू जें तोआत जेलेम गोये तियांअरी बी मिलीत दुख वेठ्यो. आन तुमापोअ जे मालमिलकोत ओती तेबी खुसीवाअहीं लुटुहूं देदी: काहाके तुमापोअ यारोत बी जाअखी हाजी आन कायम टिकनारी मालमिलकोत होरगामेहें होय ओं तुमुहूं मुंदू ओतो. 35 तियाहा काजे तुमाआं हिम्मत मा सोड़हा, काहाके तियाआ बक्शीस वोडो होय. 36 तुमाआं धिर खेटीइलोअ गरज होय, मोन्ज्ये तुमू देवोअ इश्शा पुरी कोइत तियाआ आथवसनोअ बक्शीस तुमुहूं जोड़ुहूं जोवे. 37 वसन कोहे के,

"ओमे जाअखीज थोड़ी वेल रोयीही;

काहाके जो आवनारु होय तो आवे,

तो वाआ ने लागाड़े.

38 पोन माआं धर्मी माहुंउं विश्वासोवाअहीं जिवतो रोय,

आन जर तों वापिस जातो रोय,

ताहां माआं मोनोहो खुसी ने ओवे."

39 पोन आपू ताम आरवाइलोअ काजे फासाड़ी होरकीत वापिस जानारामेर्‍येए कायनाहां, पोन विश्वास कोइत जिव वासाड़नारामेर्‍येए होय.