इब्री 5

1 काहाके हारेक डाया पुंजाराआ निवड़ माअहूंम रोत ओवेहे आन माअहोंअ काजेज ओवेहे, तों याआ काजे काहाके देवोअ सामने तियांआं पापोअ वोतीइ गाराहा आन भेट आप्या कोअहूं जोवे. 2 तो सोताहा ओजाण्याआं आन टाकाअला मिकाअलांअरी नरमायी वाअहीं वागित सेकेहे, काहाके तो सोताहा बी कमजोरीम पोड़्युतो. 3 आन तिहींज वाअहीं तियाहा सोताआ पापोअ काजे आन माअहोंअ पापोअ काजे गाराहा आपुहूंज पोड़तोतो. 4 आन जाअहूं जाआं आरोनोअ होस देवोअहें रोत ने ठरवाय, ताअहूं जाआं ओं डाया पुंजाराआ पद कोडो बी सोताहाज नाहां लेत सेकतो.

5 तिहींज वाअहीं ख्रिस्ते बी डायु पुंजारु बोणिइलोअ मानपान सोताहा ने लेदू, पोन तियाहा जिये एहें कोयोतो के,

"तू माआं बेटुह्हू होय, आज मीज ताहूं जल्म आप्योहो,"

तियेज तो मानपान तियाहा आप्यू.

6 एहेंज कोइत तो बिहीरी जागे बी कोहे,

"तु मलकीसेदेकोअ रितीइ होस

हादाजल्म्युउं पुंजारु होय."

7 जाहां ईसु इंहीं धरतीपोअ ओतु तेहेलाम आअड़ी आअड़ीइ आन रोड़ी रोड़ीइ मोतोम रोत वासाड़ीत सेकनारा देवोहो प्रार्थना आन विनंती कोअयी, आन तियाआ हाजी भक्ती वोजेसे देवे तियाआ प्रार्थना होंबलीत लेदी. 8 तो देवोअ बेटुह्हू ओत बी तिये दुख वेठी-वेठीइ आदेश मानीइलोअ टेवाअयु. 9 आन एहें कोइत तो पाक्कू बोणीत कोइत, जें तियाआ आदेशोअ पालन कोअतेहें तियांआं काजे तो हादाफल्योअ तारण कोअनारु बोण्यु. 10 आन देवे तियाहा मलकीसेदेकोअ रितीइ परमाणे डाया पुंजाराआ पद आप्यो.

विश्वासोम रोत भटकीइलो फल

11 याआ बाप्तिम आमुहूं जाअखीलीही गोठी कोअलो होय, जियीं गोठीही समजाड़ीलोअ बी कठीण होय, काहाके तुमू समजीइलोम धिमे होय. 12 वेल पाल्ल्ये एताम जाआं तुमू गुरु बोणीत जाअहूं जोवतेते, पोन तुमू एहलेहे ओत गोयेहे के सुरवातीमेऱ्योअ देवोअ वसनोअ शिक्शण फाशोअ ओमे सिकाड़ुहूं जोवे. तुमू ताम ओंनोअ बोदले ओंमे जाआं दुदूज जोवे एहेलेहे ओत गोयेहे. 13 काहाके दुद पिनारा पोर्‍याहा ताम नितीशिक्शणोअ एती बोठी समज कायनाहां रोती, काहाके तों पोर्‍योज होय. 14 पोन जियांआं समज आभ्यास कोइ-कोईइ हाजो-बाक्तो की तो जांइलोम हुशार ओत गोयीही तियां वोडा माहुंउं काजे ओंन होय.