इब्री 8

प्रभु ईसु आपाआ डायु पुंजारु

1 ओंमे खास मुद्दाआ गोठ ए होय के, आपाआ काजे एहेलुहू डायु पुंजारु होय, जो होरगामेहें खोराखोर महान राजगादीइ हाजाड़ीइ वोलेहे जात कोइत बोठुहू.✝8:1 भजन 110:1; इब्री 10:12 2 आन तो एखे मोनवी बोणावल्या तंबाआ सेवक नाहां, पोन देवे बोणावल्या खोरा तंबाआ तो सेवक बोण्यू.

3 हारेक डायु पुंजारु भेट आन गाराहा आपेतेहें काजे नेमाअहे, तियाहा काजे पुंजारापोअ काविहीं तेबी गाराहा आपीइलोअ काजेहे रोअहूं जोवे. 4 जर तो धरतीपोअ रोतु, ताहां तो पुंजारु बी ने बोणतु; काहाके कायदाआ परमाणे गाराहा आपनारा ताम होये. 5 ते जें कामें कोअताहा, तें होरगामेर्‍यीइ गोठीइ नमुनू आन सावलू जेहें होय तियाआ सेवा ते कोअताहा. जेहलाम मोशे तंबू बोणावनारु ओत्लू तेहेलाम, देवे तियाहा एहें कोयो, "पाल, जो नमुनू ताहूं आंय डोगोपोअ देखाड़्युतो तेहेंज कोइत तु आखी वस्तु बोणावजी." 6 पोन तियां पुंजारा रोत वादार हाजी सेवा ईसुहू जोड़्यी, काहाके तो फाशुउ बी जाअखी हाजी शप्पतोअ वोग्यु ठर्‍यु; जो जाअखा हाजा आथवसनोअ आधारे कोअयोहो.

7 जर पेल्लीइ शप्पत निर्दुस रोती, ताहां बिहीरी शप्पतेए गरज ने पोड़ती. 8 पोन देवे तियाआ माअहूंमेहें सुक सापड़ावयी, ताहां पाला, तो कोहे,

"एहेलाहा दिही आवताहा के, जेहेलाम आंय इस्राएली

आन यहुदाआ माअहोंअरी नोवी शप्पत खाहीं.

9 जेहें कोइत आंय तियांआं डायहांअरी शप्पत खादीही

तेहलिही ए शप्पत नाहां रोनारी,

तेदिहीं आंय तियांहां आथ तोइत मिसर देसोम रोत बारथे काडीत लेतायु,

तेबी तें माअरी खाद्ली शप्पतेम इमानदार ने रोये, तिहींइं काजे आंय बी यांआं वोल रोत सोब मुउड़ीत लेदी, एहें प्रभु कोहे.

10 तिहींइं फासाड़ी आंय इस्राएल माअहोंअरी एहलीही शप्पत खाहीं ते ए होय के,

आंय माआं नियम तियांआं मोनोम टाकीहीं,

तियांआं दिलोपोअ तो लेखी देहीं,

आंय तियांआं देव आन तें माआं माअहें बोणे.

11 ‘तुमाआं देवोहो ओलखा’ एहें कोत जागेवाला के पायहोंहों कोअलोअ गरज ने पोड़े,

काहाके, तिहींमेऱ्येए हाने रोत ते वोडे जाआं आखे माअहें माहूं ओलखे.

12 काहाके, आंय दयालु बोणीत गुनाआं माफी कोअहीं,

आन तियांआं सुकीइ ओर ने कोओ."

13 यी शप्पतेहे "नोवू करार" कोयो तिहीं वाअहीं पेल्लीइ शप्पत जुनी ठर्‍यी. जे वस्तु जुनी आन जिरीत गोयीही ते आरवात जाअहूं कोअहे.