इब्री 6

1 तियाहा कोत आवा आपू ख्रिस्ताआ सुरवातीमेऱ्याआ शिक्शणो रोत आगाड़ी वोदित पाक्के बोणते साला, आन फालतू कामोअ वोल रोत मोन वालीत देवोपोअ विश्वास कोइलो, 2 बाप्तिस्माआं शिक्शण आन आथ मिकीइलो, मोतोम रोत जिवीत उठीइलो,*6:2 पुनरुत्थान आन जलमजुग्युउ न्यायोअ डोंड एहेला शिक्शणोअ पायू फाशुउ ने टाकीइलू. 3 जर देवोअ इश्शा ओय ताहां आपू ओंज कोअहूं.

4 काहाके जियां एकवारी उजालो देख्यो, आन होरगाआ गोठीइ*6:4 वरदानआनुभाव लेत लेदुहू आन पवित्र आत्माआं भागिदार बोण्येहें, 5 आन देवोअ हाजाम हाजा वसनोअ आन आगाड़ी आवनारी जमानाआ सेक्तीइ आनुभाव लेत सुकेहे,

6 आन जर तेंज भटकीत जाय, ताहां तें फाशेए मोन फिरावे एहेलोहो ओतीज नाहां सेकतो; काहाके तें देवोअ बेटाह्हाहा फाशेए क्रुस खांबोपोअ*6:6 आडवु उबु लाकड़ुउ खांब जियापोअ जिवता माहुंहूं खिलावाईं ठोकित टांगी देत्ले. टांगतेहें आन माअहूंमेहें तें तियाआ नाव खाराब कोअतेहें. 7 काहाके जों खेत ताल-ताल पोड़नारा वोऱ्हातोअ पाईं पिय-पिय खेड़नारा माअहोंअ काजे ओंन पाकाड़ेहे, एहेला खेतोहो देव आशिर्वाद आपेहे. 8 पोन जर तों खेत साटवे आन काटेनेहें उगाड़तोय, ताहां तों विणकाम्यों होय आन तियाहा देवोअ हाराप लागुहूं कोअहे, आन तियाहा सेवटीपोअ आगीम पेटाड़ी देये.

9 मेराला पाव्हीइला, तुमुहूं ए गोठी आमू कोताहा, पोन तेबी तुमाआं बाप्तिमेहें आमू यारोत हाजी आन तारणवाली गोठीइ भरिवसू कोअताहा के ते तुमू कोअहा. 10 काहाके तियाआ काजे तुमू कोअल्यी विश्वासी माअहोंअ सेवा आन तियापोऱ्योअ तुमाआं मेर आन जों बी तुमू कोअया कोअतेहे तों आखो विहीरात जाय एतुहू अन्यायी देव कायनाहां. 11 पोन आमाआं जास्ती इश्शा होय के तुमामेर्‍याअ हारेक जोओं जियी गोठीइ तुमू आशा कोइत रोयेहे ते पुरी ओवुहूं जोवे काजे आखरी जाआं कोशित कोअहूं जोवे. 12 काहाके यी गोठीम तुमू आलहाय ने कोअहूं जोवे, पोन जें विश्वास आन धिरोवाअहीं देवोअ आथवसनोअ वारीस बोणतेहे तेहेला माअहोंअ फासाड़ी तुमू सालुहूं जोवे.

ने टोलनारो देवोअ आथवसन

13 देवे अब्राहामोअरी आथवसन लेअली वेले शप्पत खाअलोअ काजेहे तिया रोत वोडो कोडो ने जोड़्यो, ताहां सोताआज शप्पत खात कोइत कोयो, 14 "आंय ताहूं खोरीज खुब आशिर्वाद आपिहीं, आन ताआ पोर्‍याहां वादाड़तु जाहीं."*6:14 उत्प 22:17 15 एहें कोइत तो धिर खेटीत रोयु ताहां देवे आपल्यो आथवसन तियाआ जिवनोम पुरो ओवो. 16 माहें ताम जो कोडो वोडो रोहे तियाआ शप्पत खातेहे, आन तियांआं आखी भान्गड़ी मिटाड़ीलोअ काम शप्पतोवाअहीं पाक्को ओवेहे. 17 तिये आपल्यो आथवसन केदिहीं नाहां बोदलाअतो ओं तियाआ वारसदारोहों देखाड़ीलोअ देवोअ इश्शा होय, तिहींवाअहीं तिये शप्पत खात कोइत पुरु भरिवसू आप्यू. 18 ने बोदलाअनारी बेन गोठीइ वोजेसे देव केदिहींज नाहां ठोगित सेकतु, यीज गोठी वाअहीं आपू तियापोअ पाक्की आशा मिक्यिही, काहाके इंहीं वाअहीं आपुहूं जाअखी हिम्मत जोड़ीत सेकेहे. 19 एज आशा आमाआं जिवोअ काजेहे बी एहली लंगरोअ*6:19 लंगरोअ जाहाज पाअयोंमेहें उबी कोअत्ले ताहां आलुहूं ने जोवे कोत दोअड़ा वाअहीं नेत हाकले वाअहीं बांदीत कोइत उंडे निसे पाअयोंमेहें टाकीइलोअ एक वजनदार वस्तु, तियाहा कोत्ले लंगर होस होय जे एकदम पाक्की आन मजबुत होय, आन ते मंदिरोअ पोड़दाआ फासाड़ी मांयते जाआं पोतेहे. 20 जिहीं ईसु मलकीसेदेकोअ होस पिढ़ीन पिढ़ीइ काजे डायु पुंजारु बोणीत, आपाआ वोतीइ आगाड़ी जात मांयते फोटुहू.