1 ओ मलकीसेदेक सालेमोअ राजा, आन आखाम रोत वोडा देवोअ पुंजारु ओतू, जेहलामेहें अब्राहाम राजहांहां हारवीत कोइत वापिस आवतुतो, तेहलाम ओज पुंजारु अब्राहामोहो मिल्युन ताहरुउ तियाहा आशिर्वाद आप्यू. 2 या मलकीसेदेकोहोज अब्राहामे आखी वस्तुउ दाहवू भाग बी आप्यू.✝ पेल मलकीसेदेक या नावोअ अर्थ, "धर्मी राजा," एहलोहो ओतो; काहाके तो सालेमोअ राजा ओतू. या नावोअ अर्थ बी "शांतीइ राजा" एहेलोहो बोणेहे. 3 तियाआ कांय आब्हू ने के, आयही ने के, पारवाड़ी बी ने ओती. तियाआ जिवनोअ सुरुवात आन सेवट बी नाहां जोड़ती; पोन तो देवोअ बेटाह्हाआ होस ठरीत कोइत हादाजलम्युउं पुंजारु बोणीत होय.

4 ओमें यी गोठीपोअ विसार कोआ के मलकीसेदेक केतुहू वोडु ओतू! जियाहा कुलपती अब्राहामे लड़ायीम रोत जिकीत लेतावल्या हाजाम हाजी वस्तुउ दाहवू भाग आप्यू. 5 लेवीइ कुटूंबाम रोत जियांहां पुंजाराआ पद जोड़ेहे तियांहां अब्राहामोअ उब्जीइल्या पोऱ्याप रोत मोन्ज्ये तियांआं पायहोंप रोत, लेखाअला कायदाआ परमाणे दाहवू भाग* लेअलोअ आदेश होय.✝ 6 मलकीसेदेक लेवीइ पारवाड़ीमेएं ने ओतू तेबी तिये अब्राहामोपोअ रोत दाहवू भाग लेदू, जियाहा देवोअ आथवसन जोड़्योतो तियाहा तिये आशिर्वाद आप्यू. 7 वोडो हानाहां आशिर्वाद आपेहे, यामेहें काविहीं फुसुहूं सारकी गोठ कायनाहां. 8 आन इंहीं ताम आरवाअनारे एहलेहे माअहें दाहवू भाग लेतेहे, पोन तिहीं तोंज लेहे जियाआ साक्शी आपाअहे के तों जिवतो होय. 9 ताहां आपू ओं बी कोत सेकताहा के लेवी बी जे दाहवू भाग लेताहा,ते अब्राहामोअ आथऱ्युउ दाहवू भाग लेताहा. 10 काहाके, जेहलाम मलकीसेदेक अब्राहामोहो मिल्यू, तेहलाम लेवी तियाआ बाहा अब्राहामोअ डिलोम ओतू.

11 जर लेवीइ पुंजारपणोअ पदो वाअहीं काम पुरो ओत सेकतोतो, जो कायदाआ आधारोपोअ ओतो, ताहां फाशीइ कि गरज पोड़्यी के आरोनोअ बोदले बिहीरु पुंजारु मलकीसेदेकोअ होसऱ्युउ उबू रोत सेके? 12 काहाके पुंजाराआ पद बोदलाअहे ताहां कायदु बी बोदलीइलोअ गरज पोड़ेहे. 13 काहाके जियाआ बाप्तिमेहें ए गोठी कोयीही के, तो लेवी नाहां पोन बिहीरी पारवाड़ीइ होय, जिहींमेहें रोत कोडे बी देवान्याआं सेवा नाहां कोअयी. 14 ताहां खुल्ली गोठ होय के, आपाआ प्रभु यहुदाआ पारवाड़ीम रोत निहींयुहू, यी पारवाड़ीइ बाप्तिमेहें पुंजारपणोअ बद्दल मोशे तोम किन्नाहां कोयो.

15 आन जाहां मलकीसेदेकोअ होसर्‍युउ फाशुउ बिहीरु एक पुंजारु आवित लागेहे ताहां ए गोठ जाअखी खुल्ली ओत जाहे. 16 मोनव्योअ नियमोअ परमाणे तियाहा पुंजारपण नाहां जोड़्यो, पोन अमर जिवनोअ ताकतेए आधारे तियाहा पुंजारपण जोड़्यो. 17 काहाके तियाआ बाप्तिमेहें वसन कोहे, "तु मलकीसेदेकोअ होसर्‍युउ पिढ़ीन पिढ़ीइ पुंजारु होय." 18 एहेंकोइत जुनू नियम रद्द ओत गोयू, काहाके तो दुबलू आन ने कामोंअ ओतू. 19 काहाके मोशेए कायदा वाअहीं कोड्लीज गोठ हारीपुरी ने ओवी, आन ओमे एती हाजी आशा आपुहूं जोड़्यीही के जिहीं वाअहीं आपू देवोअ हुंबर जात सेकतेहे.

20 ओं बी खोरो होय के, देवे ईसुहू शप्पते सिवाय मुख्य पुंजारु नाहां बोणायू. 21 काहाके बिहीराहा ताम बिगर शप्पतेए पुंजाराआ पद जोड़्यो, पोन ईसुहू ताम पुंजाराआ पद जोड़्यो तेहलाम देवे तियाआ बाप्तिमेहें शप्पत खादीन कोयो,

"मी शप्पत खादीही,

आन माआं ए शप्पत केदिहीं ने बोदलाय,

काहाके तु पिढ़ीन-पिढ़ीइ पुंजारु होय."

22 यी गोठी वाअहीं ईसु एक वादार हाजी शप्पतोअ जामिन ठर्‍यु.

23 बिहीरा डाहटा जोआं पुंजारा बोणता आया, पोन मोते तियांहां ने टिकुहूं देदा, तिहीं वाअहीं ते पुंजारपण कायम सालू ने मिकीत सेका. 24 पोन तो पिढ़ीन-पिढ़ी कायम रोहे, तियाहा काजे तियाआ पुंजाराआ पद हादाफल्योअ होय. 25 तिहीं वाअहीं जे माहें तिया वाअहीं देवोअ जागे आवतेहे, तियांआं तो पुरोनपुरो तारण कोइत सेकेहे. काहाके, तियांआं वोतीइ रावणी कोइलो काजेहे तो हादाजोलम जिवतु होय.

26 तिहीं वाअहीं, एहेलुहू डायु पुंजारु आपाआ काजे रोअहूंज जोवतुतो, काहाके तो पवित्र, निर्दुस आन सोकू होय; आन पाप्यों रोत आंगे, जुगोरोत बी उसू जागू तियाहा जोड़्युहू. 27 तियां मुख्य पुंजारकाआं होस तियाहा गरज कायनाहां के रोज पेल सोताआ पापोंअ काजे आन फाशोअ माअहोंअ पापोंअ काजे गाराहा सोढ़वे; काहाके जाहां तिये सोताआ जिवोहो गाराहा कोत सोढ़वी देदो, ताहां तिये तों एक्कुज वारीम हादाजल्म्योअ पुरो कोइ देदो. 28 काहाके कायदु ताम कमजोर मोनविही मुख्य पुंजारु कोत उबो कोअहे, पोन तियी शप्पतेए वसन जों कायदाआ फासाड़ी पिढ़ीन-पिढ़ीइ काजे आप्यो, तिहीं वाअहीं देवोअ बेटाह्हाहा हादाफल्युउ पाक्कू डायु पुंजारु बोणावी देदुहू.