1 तियाहा काजे जे सत्य गोठी आपू उनाअयेहे, तियी पोअ आपू जास्ती दिहान देअहूं जोवे, ताहांज बी आपू मार्गाम रोत भटकीत दुर ने जाहूं. 2 काहाके, आपाआ डायहांआं काजे देवदुतोंवाअहीं आपल्यू संदेश एतुहू खोरु ओतू, के जों कोडो बी तिया संदेशोहो ने मान्यो, पोन टाली देदू, तियाहा डोंड जोड़्युज. 3 ताहां, जर यी वोडी सुटकाआ वोल आपू दिहान ने देहूं, ताहां आपू केहें कोइत वासाइत सेकहूं? यी सुटकाआ पेहलु पुकारु सोताहा प्रभुदेवे कोअयुहू, आन उनाअनारा आखा आपाआ काजे ओं खोरो होय कोत पुरावू आप्यू. 4 आन तेहेंज कोइत तियाआ मोर्जीइ परमाणे देव बी तियाआ निशाणी, वोडे-वोडे कामे, बाती-बातीइ समत्कार कोइत आन विश्वासी माअहोंहों पवित्र आत्माआं वरदाने आपीत कोइत, ए आखी गोठी खोरी होय कोत पुरावू आपतू रोयू.

5 जियी आवनारी नोवी दुन्याआं आपू माग काडतेहें, तियीपोअ राज कोए तेहें काजे देवे देवदुतोंहों नाहां निवड़्या. 6 पोन, पवित्रशास्राम एकी जागे कोडे तेबी एहेलिही साक्शी आप्यीही के,

"विसार कोअहूं जोगोहो या मोनव्योमेहें कि होय?

नेत या माहुंउं बेटाह्हाम एहेलोहो कि होय के, तु तियाआ कालजी कोअहूं जोवे?

7 तुमे तियाहा देवदुतों रोत जारकीज कमी कोअयुहू;

तुमे तियाहा महिमा आन मानसन्मानोअ पागड़ी बांद्यीही, आन तुमे तियाहा ताआ आथिवल्या कामोपोअ आधिकार आप्युहू.

8 आन तुमे आखी वस्तु तियाआ गुडाआ थुड़ी कोइ देदीही."

आन आखो तियाआ ताबाम कोइ देदोहो, ताहां एक बी वस्तू एहेलिही बाकी ने सुटी, जे तियाआ ताबाम ने ओय. ओमे ताअहूं आपू आखो बोठो तियाआ ताबाम नाहां देखते. 9 पोन आपू ईसुहू देखतेहे, जियाहा देवदुतों रोत जारकीज कमी कोअयुतो, आन मोतोअ तारास वेठीत लेदू तिहींवाअहीं तियाहा महिमा आन मानसन्मानोअ पागड़ी पेवाड़्यीही, ओं याअकाजे काहाके, देवोअ मेरवानी वाअहीं तो हारेक माहुंउं काजे मोतोअ आनुभाव कोइत सेके. 10 काहाके, देव, जिये आखो बोणायो आन जियाआ महिमाआं काजे आखो होय, तियाहा ओंज गोम्यो के, जाअखीलां बेटाह्हांहां महिमामेहें भागीदार कोइलोअ काजे तिये ईसुहू दुख वेठाड़ीलोवाअहीं पाक्कू कोइत तियांआं तारनारु बोणायू.

11 काहाके पवित्र कोअनारु आन जे पवित्र कोआयेहे तें नेहें आखे एकाज कुटूंबाआ होय; यीज गोठी वाअहीं तो तियांहां पाही कोत गोगाड़ीइलोम नाहां लाजवाअतू. 12 तो ते कोहे,

"आंय ताआ नाव माआं पायहोंहों कोत देखाड़ीहीं;

सभामेहें आंय ताआ भजन गाविहीं."

13 आन तो फाशुउ कोहे, "आंय तियापोअ भरिवसू मेकिहीं," आन फाशुउ कोहे, "पाला, आंय पोर्‍यांहां आरी लेत कोइत होय, जियांहां देवे माहूं आप्येहे."

14 ताहरोअ, पोर्‍ये जेहलेहे माहां आन रक्ताआ बोण्येहें, तेहेंज कोइत ईसु बी तियांआं सारकुज तियांअरी भागिदार ओत गोयू. तो याअकाजे के, मोतोपोअ जियाआ आधिकार ओतू, तिया सैतानोअ सेक्तीइ नाश कोइत सेके, 15 आन जेते जोएं जिंदगी पोइत मोतोअ बिकेवाअहीं बांदाखानीम जेहें जिवन जिवतेते, तियांहां सोड़वीत सेके. 16 काहाके, तो देवदुतोंहों नाहां पोन अब्राहामोअ पिढ़ीही सांबालेहे. 17 याअ काजे देवोअ सेवामेहें दयालू आन इमानदार एहेलुहू मुख्य पुंजारु बोणिइलोअ काजेहे आन माअहोंअ गुनाआं वोतीइ गाराहा आपिइलो काजेहे ईसुहू आक्खी गोठीमेहें तियाआ पायहोंअ होस बोणिइलोअ खुब गरज ओती. 18 काहाके, जेहेलाम तियाआ परिक्शा ओवी, तेहेलाम तियाहा दुख वेठुहूं पोड़्यो, ताहां तो जियांआं परिक्शा ओवेहे, तियांहां बी मदत कोइत सेकेहे.