1 जो नाहां माअहूं तरफ से आन नाहां माअहूं वाअहीं, पोन ईसु ख्रिस्त आन देव बाह्हा वाअहीं, जिये तियाहा मोल्याम रोत जिवाड़्यू, तिया प्रेशित पौलुसोअ तरफ से- 2 आन आखा पाव्हीइलाआ तरफ रोत जें माअरी होय, गलातीइ आखी मंडड़ीही सलाम:

3 आपाअ देव आब्हू आन प्रभु ईसु ख्रिस्त नेहें तुमुहूं मेरवानी आन होक आपता रोये.

4 आपाआ देव आब्हाआ इश्शा वाअहीं या खाराब जमानाम रोत आपाआ सुटका कोइलोअ काजे प्रभु ईसु ख्रिस्ते आपाआ पापोअ उस्ती सोताआ जीव आपी देदू. 5 तियाआ स्तुती हादाजलम ओवती रोये! आमेन.

6 आंय बोगलाअयुहू के जिये तुमुहूं ख्रिस्ताआ मेरवानीमेहें हाद्ये, यामेहें रोत एते वेगे मुउड़ात तुमू बिहीरीज हाजी बातमीइ वोल फिरे वोल्ये. 7 खोरो मोन्ज्ये, इंहीं बिहीरी हाजी बातमी होय बी नाहां: पोन गोठ ए होय के, केतेहे माअहें एहेलेहे होय बी, जे तुमुहूं काबरावी देतेहे, आन ख्रिस्ताआ हाजी बातमी बिगाड़ीलाआ कोशित कोअतेहे. 8 पोन जर आमू, नेताहां होरगाम रोत एखु देवदुत बी जे हाजी बातमी आमू तुमुहूं कोत आप्यीही, ते सोड़ीत बिहीरी हाजी बातमी तुमुहूं कोये, ताहां तियाहा हाराप लागुहूं जोवे. 9 जेहें कोइत आमू पेलूज कोत सुकाहा, तेहेंज कोइत आंय ओमे फाशुउ कोहो, के तियी हाजी बातमीहीं सोड़ीत, जियीही तुमू स्विकार कोअयिही, जर एखु बिहीरी हाजी बातमी कोत आपे, तियाहा हाराप लागुहूं जोवे.

10 ओमे आंय माअहोंहों मानाड़ीलोअ कोशित कोअहो के देवोहो? केहें आंय माअहोंहों खुस कोइलाआ कोशित कोअहो के? जर आंय ओमे जाआं माअहोंहों खुस कोअतू रोतु, ताहां ख्रिस्ताआ सेवक ने रोतु.

11 माआं पाव्हीइला, आंय तुमुहूं कोत देहो के जे हाजी बातमी आंय कोत आप्यी, ते माअहोंअ बोणावल्यी कायनाहां. 12 काहाके ते माहूं एखा माअहोंअ तरफ से नाहां जोड़्यी, के नाहां कोडे सिकाड़्यी; पोन ईसु ख्रिस्ते आपल्या दर्शनोवाईं जोड़्यीही.

13 तुमू उनात सुकेहे के माआं यहुदी मत केहेलोह ओतो. आंय देवोअ मंडड़ीही जाअखीलुहू तारास कोआड़तुतो आन आरवीत टाकतुतो.*1:13 प्रेशित 8:3; 22:4,5; 26:9-11 14 आन आंय डायहांआं रुढ़ी लेत सालीइलोम जास्ती सेकलात ओतु, तिहीं वाईं माआं ताड़ेए जाअखीला जोओं रोत आंय आगाड़ी जातु रोयुतो. 15 पोन जिये देवे आयहीइ डेडीम रोतुज माहूं निवड़्यू आन तियाआ मेरवानी वाईं हादीत लेदू, 16 जाहां तियाआ इश्शा ओवी के मावाईं सोताआ बेटाह्हाहा प्रगट कोइत सेके, मोन्ज्ये तियाआ हाजी बातमी बिगर यहुदी माअहूंम परसार कोइत सेको, ताहां मी बिहीरा कोडाहा ने फुशो, 17 आन जे मा रोत पेल प्रेशित ओता, तियांआं जागे येरुसालेमोम ने गोयू, पोन ताबुड़ अरब देसोम जातू रोयू आन फाशू दमिश्कोम वापिस आवतू रोयू. 18 तिहीं रोत तीन वोऱ्ह्योंअ फासाड़ी आंय केफाहा मिलीइलो काजे येरुसालेमोम गोयू आन पंदरा दिही जाआं रोयू. 19 पोन प्रभुउ पायहो याकोबोहो सोड़ीत बिहीरो कोडो प्रेशित ने मिल्यो.

20 जों आंय लेखोहो तों खोरो होय, आन तों देवोहो मुंदू होय, आंय नाहां ठोगतु.

21 तिहीं रोत आंय सिरिया आन किलिकियाअ प्रान्तामेहें आयू. 22 तेहेलाम माहूं ख्रिस्ता मेऱ्याआ यहुदीयाआ मंडड़ीवाला केदिहींज नाहां देख्यू; 23 पोन एतीज गोठ उनाअया कोअतेते के, "जो आपुहूं पेल तारास देतुतो, तो बी ओमे जिया विश्वासोहो पेल आरवीत टाकीइलोअ कोशित कोअतुतो, तियाज विश्वासोअ हाजी बातमी होंबलाड़ेहे!" 24 आन तें माआं बाप्तिमेहें देवोअ स्तुती कोअतेते.