1 ओमें आंय तिसरी वारी आवोहो: "बेन नेताहां तीन साक्शीदारो वाअहीं हारेक गोठ ठरवाअहूं जोवे," एहलोहो वसनोम लेख्योहो.✝ 2 जियां पेल पाप कोअयुतो तियांहां आन बिहीरा आखाहा आंय दुसरी वारी आयु तेहेलाम कोयोतो, तेहेंज कोइत ओमे बी कोहो, आंय तुमा रोत सेटे होय, तेबी कोहो के आंय जर फाशुउ आविहीं, ताहां कोडापोअ दया ने कोओ. 3 काहाके मामेहें रोत ख्रिस्त गोगेहे याआ पुरावू तुमुहूं जोवे ताहां ओज; ख्रिस्त तुमामेहें कमजोर नाहां ओवतु, पोन तो तुमाआं विसमेहें सेक्तीमान होय. 4 काहाके तो कमजोरीमेहें क्रुसोपोअ टांगाअयू, तेबी देवोअ सेक्ती वाअहीं तो जिवतु होय. तियामेहें एक ओवीइलाआ वाअहीं आमू बी कमजोर होय, तेबी देवोअ सेक्तीवाअहीं तुमाआं सेवा कोइलाअ काजे जिवता होय.

5 सोताहा फारका के तुमू विश्वासोम होय के नाहां. सोताहा परिक्शा कोआ के ईसु ख्रिस्त तुमामेहें होय के नाहां? जर ने ओय ताहां तुमू नापास ओत गोयेहे. 6 माहूं आशा होय के आमू उदड़्या कायनाहां ओं तुमू जाईंत लेहा. 7 तुमू सुकीइ ने कोअहूं जोवे कोत आमू देवोहो प्रार्थना कोअताहा; मोन्ज्ये आमू खोरा निहों नेत नेबी निहों, पोन तुमू हाजे कामे कोअहूं जोवे. 8 काहाके आमू सत्याआ विरुद्दाम कीज नाहां कोइत सेकता, पोन सत्याआ कोअते कोइत सेकताहा. 9 जाहां आमू कमजोर होय आन तुमू मजबुत होय, ताहां आमू खुस ओवताहा, आन तुमू पाक्का बोणुहूं जोवे कोत प्रार्थना कोअताहा. 10 आंय आडल डोए एताआ काजे ए गोठी लेखोहो,काहाके जो आधिकार देवे आप्युहू तो माहूं बिगाड़ीलोअ काजे नाहां पोन हुदारीइलोअ काजे आप्युहू, आन जाहां तियाआ वापर कोइत आंय तिहीं आविहीं ताहां माहूं कड़क बोणिइलोअ गरज ने पोड़ुहूं जोवे.

11 तियाहा कोत माआं पाव्हीइलां, ओमे खुस रोवा! पाक्के बोणते जावा; माआं गोठी उनाआ; एकमेकाअरी एक मोन रोवा; होकेहे रोवा. आना मेर कोअनारु आन होक आपनारु देव तुमाअरी रोय.

12 मेरेवाअहीं गुउं देत एकमेकाहा पुरा मोनोवाअहीं सुभेश्शा आपा.

13 आखे देवोअ माअहें तुमुहूं सलाम कोतेहे. 14 प्रभु ईसु ख्रिस्ताआ मेरवानी आन देवोअ मेर आन पवित्र आत्माआं हाजी संगती तुमा आखाअरी रोअहूं जोवे. आमेन.