1 आंय माआं मोनोम ठरवीत लेदोतो के फाशुउ तुमाआं मोनोहो दुख देनू ने आवो. 2 काहाके जर आंय तुमुहूं दुख देदो, ताहां जियाहा आंय दुखी कोअयोहो तिया सिवाय माहूं खुस कोअनारो कोडो होय? 3 आन आंय ए गोठी तिहींज वाअहीं लेख्यीही के, आंय आविहीं ताहां जियांआं वाखरी माहूं खुसी ओवनारी होय तियांपोअ रोत माहूं दुख ने ओवुहूं जोवे, तुमा आखाआ बाप्तिम माहूं भरिवसू होय, के माआं खुसी तेज तुमाआं आखाआ बी खुसी होय. 4 वोडा तारासोम, दुखी मोनो वाअहीं आन डोए रोज्ये गोलावतुज आंय तुमुहूं लेख्योहो, तों तुमू उदास ओवे तेहें नाहां, पोन मामेहें तुमाआं वोतीइ केतीही मेर होय, तों तुमू जाईंत लेअहूं जोवे.

5 जर एखे माहूं दुखी कोअयुहू, ताहां माहूं एतोज नाहां, पोन थोड़ थोड़ा तुमू आखाहा बी दुखी कोअयाहा. 6 एहेला माहुंउं कोअते तुमामेर्‍याआ वारुज जोओं जो डोंड आप्यु, तेतुज बास होय. 7 पोन ओमे तुमू तियाआ गुनू माफ कोआ आन प्रोत्साहीत कोआ. एहेलोह ने ओवुहूं जोवे के तों जाअखोज दुखी ओत जाय. 8 तिहींवाअहीं आंय तुमुहूं विनंती कोअहो के, तुमू तियापोअ खोरो मेर कोअतेहे याआ पुरावू कोइत देखाड़ा. 9 काहाके तुमू माआं आखी शिक्शणोहों मानतेहे के नाहां तों फारकीइलोअ काजे बी मी लेख्योतो. 10 जिया कोडाहा तुमू माफ कोअतेहे, तियाहा आंय बी माफ कोअहो, काहाके आंय जों किबी माफ कोअयोहो, तों तुमाआं वाखरी ख्रिस्ताआ हजरीम रोत कोइत माफ कोअयोहो. 11 काहाके सैतानोअ आपापोअ किज धाव ने सालुहूं जोवे, आपू तियाआ कलाआ ओजाण्‍ये कायनाहां.

12 जेहेलाम आंय ख्रिस्ताआ हाजी बातमीइ परसार कोइलोअ काजे त्रोआसोम आयू, ताहां प्रभु माआं काजे सेवा कोइलोअ एक बाअणो उगाड़्यो, 13 ताहां माआं पाही तितुस माहूं ने जोड़्यू, तिहींवाअहीं माहूं मोनोम होक ने आयू; ताहरुउ आंय तिहींइं माअहोंहों मिलीत कोइत मकिदुनिया निहींत जातू रोयू.✝

14 पोन देवोअ आभार मानोहो जो ख्रिस्तामेहें हमेशा जीत आपित खुसीमेहें लेत सालेहे, आन तियाआ ज्ञानोअ हाजू वास आमा वाअहीं आखी वोल पसरावेहे. 15 काहाके आमू देवोअ जागे वासाअनारा आन आरवाअनारा यां बेनुउं काजे ख्रिस्ताआ गोंद होय. 16 थोड़हाआ कोअते मोतोअ काजे मोतोअ गोंद, आन थोड़हाआ जोओंअ कोअते जिवनोअ काजे जिवनोअ हाजी गोंद होय. 17 काहाके आमू तियांआं होस कायनाहां जे देवोअ वसनोहों वावड़्या फायदाआ काजे वापरीइताहा; पोन आमू खोरा मोनोवाअहीं आन देवोअ तरफ से देवोहो हजर जाईंत ख्रिस्तामेहें गोगताहा.