1 ओमे जे ख्रिस्त ईसु मेहें जिवते होय, तियांपोअ डोंडोअ आदेश कायनाहां. काहाके तें डिलोअ इसाबे नाहां, पोन आत्माआं इसाबे सालतेहे. 2 काहाके जिवनोअ आत्माआं कायदे माहूं ख्रिस्त ईसु मेहें पापोअ आन मोतोअ कायदाप रोत मोकलु कोई देदुहू. 3 जों काम शरीरोअ कमजोरीइ वाखरी कायदु ने कोइत सेकू, तों काम कोए तेहें देवे सोताआ बेटाह्हाहा पापी शरीरोअ रुप आपित मोकल्यू आन पापोहो शरीरोमेहें डोंडोअ आदेश आपित मोकल्यू. 4 तों याअकाजे के आपू जें शरीर सोभावोअ परमाणे नाहां, पोन आत्माआं अनुसार सालतेहे, तियां आपामेहें कायदाआ आदेश पुरु ओवुहूं जोवे. 5 काहाके शारीरिक माअहें डिलोअ गोठीपोअ मोन लागाड़तेहे; पोन जें आत्माम सालतेहे तें आत्माआं गोठीपोअ मोन लागाड़तेहे. 6 डिलोपोअ मोन लागाड़ीइलो ते मोत होय, पोन आत्मा पोअ लागाड़ीइलो जिवन आन शांती होय. 7 काहाके डिलोपोअ मोन लागाड़ीइलो ते देवोअरी दुस्मोन बोणिइलो होय, आन तें ताम देवोअ कायदु बी नाहां पालन कोअते आन तियांहां पालन बी नाहां कोआनारो. 8 तियाहाज ताम शरीर जें सोभावोम होय, तें देवोहो खुश नाहां कोइत सेकते.

9 पोन जर देवोअ आत्मा तुमामेहें रोहे, ताहां तुमू शरीर सोभावोअ कायनाहां, पोन आत्मिक दशाम होय. आन जर एखामेहें ख्रिस्ताआ आत्मा ने ओय ताहां तो तियाआ माहुंउं कायनाहां. 10 जर ख्रिस्त तुमामेहें ओय, ताहां डिल पापोअ वाखरी मोल्यो होय; पोन सतीपणोअ वाखरी आत्मा जिवतु होय. 11 जिये ईसुहू मोल्याम रोत जिवाड़्यू, तोज आत्मा जर तुमामेहें वोहती कोइत रोहे; ताहां तिये ख्रिस्ताहा मोल्याम रोत जिवाड़्यू, तो तुमाआं आरवाअनारा शरीरोहो बी तियाआ आत्मा वाअहीं जिवाड़े.

12 तियाहा काजे, माआं पाव्हीइला, आपू कर्जदार ताहरेए होय, पोन तों शरीर सोभावोअ परमाणे दिही काटीइलोअ काजे नाहां. 13 काहाके जर तुमू शरीर सोभावोअ परमाणे दिही काटे जाहा, ताहां मोअहा, पोन जर आत्मावाअहीं शरीर सोभावोअ कामे माअहा, ताहां जिवते रोहा. 14 तिहींज वाईं जियां माहुंहूं देवोअ आत्मा सालाड़ेहे, तेंज देवोअ पोर्‍ये होय. 15 काहाके तुमू फाशेए बिय तेहें काजे देवे तुमुहूं गुलामीइं आत्मा नाहां आप्यू, पोन तुमुहूं "बा, ए बा," एहें कोत गोगाड़नारु पोहल्या पोर्‍याआ आत्मा आप्युहू. 16 तो आत्मा सोताहाज आपाआ आत्माअरी साक्शी आपेहे, के आपू देवोअ पोर्‍ये होय. 17 आन आपू जर पोर्‍ये होय, ताहां आपू वारिस बी होय, देवोअ वारिस आन ख्रिस्ताआ हेंगात्या वारिस होय, आन जर आपू ख्रिस्ताअरी दुख वेठ्यो, ताहां तियाअरी आपुहूं महिमा बी जोड़े.

18 माहूं लागेहे के जे महिमा आपापोअ प्रगट ओवनारी होय, तियीइ सामने एं दुख आन तारास किज बी नाहां. 19 काहाके ए कोल देवोअ पोऱ्याआं प्रगट ओवीइलोअ वोडी आशा लागाड़ीत वाट जोवित रोयीही. 20 काहाके ए कोल हारापोअ निसे रोयी ते सोताआ इश्शा वाअहीं नाहां, पोन जिये आशावाअहीं ताबाम कोअयी तिहीं वाअहीं ते रोयी. 21 कोल बी सोताहाज नाशोअ बंधनोम रोत सुटका कोइत लेयेन ताहरीइ देवोअ पोर्‍याआं महिमावाली सुटकाम भागिदार बोणे. 22 काहाके आपुहूं मुंदू होय के आखी कोल ओमे जाआं काहेंहें आन वेणे आवित दुखेहे तेहलिही तड़पेहे; 23 आन कोल एतीज नाहां, पोन आपू बी जियांपोअ पवित्र आत्मा देवोअ पेहलो फल होय, सोताहाज मोनाआ मोनोम काहांतेहें; आन पोहल्ये पोर्‍ये बोणिइलोअ, मोन्ज्ये या डिलोअ सुटकाआ वाट जोवतेहे. 24 यी आशावाअहीं आपाआ सुटका ओयीही; पोन जियी वस्तुउ आपू आशा कोअतेहे तेज वस्तु देखात जाय ताहां ते खारी आशा कायनाहां? काहाके जियी वस्तुहू एखो देखीत लेहे तियीइ की आशा कोअनारो? 25 पोन जियी वस्तुहू आपू नाहां देखते, तियीइ वस्तुउ जर आपू आशा कोअतेय, ताहां धिर खेटीत तियीइ वाट बी जोवतेहे.

26 एहेंज कोइत आत्मा बी आपाअ कमजोरी मेहें मदत कोअहे; काहाके आपुहूं ने मुंदू के प्रार्थना की कोइत कोअहूं जोवे, पोन आत्मा सोताहाज आपाआ काजे एतुहू काहीं-काहींइं विनंती कोअहे आपुहूं शब्दाम कोत बी ने सेकाय; 27 आन देव जो मोनोअ फारकीइनारु होय, तो जाएहें के आत्माआं विसार कि होय? काहाके तो तियाआ माहुंउं कोअते देवोअ इश्शाआ परमाणे विनंती कोअहे.

28 आपुहूं मुंदू होय के, जे माअहें देवोपोअ मेर कोअतेहे, तियांआं काजे आक्खी गोठी मिलीत कोइत हाजो तोंज ओवुहूं जोवे एहेलोहो देव कोअहे, जियांहां तिये तियाआ उद्देशो वाअहीं हाद्येहे. 29 काहाके जियांहां तिये पेलूज रोत जाईंत लेदेहे तियांहां तिये पेलूज रोत ठरव्येहे बी काहाके तियाआ बेटाह्हाआ होसऱ्येए बोणीत सेके,मोन्ज्ये तो जाअखीला पाव्हीइलांमेहें पेलठू ठरीत सेके. 30 आन जियांहां तिये पेलूज रोत निवड़्ये, तियांहां हाद्ये बी; आन जियांहां हाद्ये, तियांहां धर्मी बी ठरव्येहे; आन जियांहां धर्मी ठरव्येहे, तियांहां महिमा बी आप्यीही.

31 ताहां आपू यीं गोठीइ बाप्तिम कि कोहूं? देवुज आपाआ वोगेहे होय, ताहां आपाअ दुस्मोन कोडो ओत सेकेहे. 32 जिये सोताआ बेटाह्हाहा जाआं ने मिक्यू, पोन तियाहा आपाआ आखाआ कोअते आपी देदू, ताहां बिहीरो आखो केहें ने आपे? 33 देवोअ निवड़ीइल्या माअहूं पोअ आरोप लागाड़नारो कोडो होय? तियांआं धर्मी ठरवीइनारु ताम देवुज होये. 34 ताहरुउ डोंडोअ आदेश आपनारु कोडू होय? ख्रिस्त ईसुज होय जो मोइत गोयू, पोन मोल्याम रोत फाशुउ जिवीत बी उठ्यूहू आन देवोअ हाजाड़्यीइ वोल बोहीत कोइत आपाआ काजे रावणी बी कोअहे. 35 कोडो आपुहूं ख्रिस्ताआ मेरेम रोत आलाग कोइत सेकेहे? केहें हाराप, के आफत, के सताव, के काल, के कांगाली, के तारास, के मोत कोइत सेके के? 36 जेहें कोइत वसन कोहे,

"ताआ काजे आमुहूं दिही पोइत मोअहूं पोड़ेहे;

आमू गाराहा ओवनारा मेडाआं होस गोणाअतेहे."

37 पोन जिये आपापोअ मेर कोअयिही, तिया वाअहीं यीं आक्खी गोठीपोअ आपू उपरडुपर जिकीत होय. 38 माहूं पुरु भरिवसू होय, काहाके नाहां मोत, के नाहां जिवन, नाहां देवदुत, के नाहां आधिकार, नाहां ओमेएं के नाहां आवता दिहोअ गोठी, नाहां ताकत, 39 नाहां जुगोमेएं के, नाहां धरतीइ निसेए, कोड्लीज बी सेक्ती आपाआ प्रभु ख्रिस्त ईसुमेऱ्यीइ देवोअ मेरे रोत आपुहूं आलाग नाहां कोइत सेकती.