रोमन 14

बिहीरापोअ आरोप मा लागाड़हा

1 जें विश्वासोमेहें लुले होय तियांहां तुमाअरी लेत साला, आन तियांआं सुकीइ के बोराबर याआ बाप्तिम जे विसार ओय ते गोठी लेत तियांअरी वादावादी मा कोअहा. 2 थोड़हा माहुंहूं लागेहे के खाअलाम आखोज सालेहे, पोन जें कमजोर विश्वासी होय, तें निस्ते पाजो पालो एतोज खातेहे. 3 जें खातेय तें ने खानाराहां निसे ने समजुहूं जोवे, आन जें नाहां खाते तें खानारांपोअ आरोप ने लागाड़ुहूं जोवे, काहाके देवे तियांआं स्विकार कोअयुहू. 4 तु कोडू होय जो बिहीराअ पावरोपोअ दोश लागाड़ेहे? ओ तियाआ मालिखुज होय जो ठरवेहे के तो निर्दुस होय के दोशी होय. आन तो तियाहा टिकाड़ीत मिके, काहाके तियाआ प्रभुज तियाहा निर्दुस ठरवीत सेकेहे.

5 एखू एखा दिहोहो बाकी दिहों रोत जाअखा हाजू मानेहे, आन एखू बादा दिही सारकाज मानेहे. हारेक जोओं जिवज्योअ मोनोम ठरवीत लेअहूं जोवे. 6 जों एखा दिहोअ पालनी कोअतोय, तों प्रभुउ कोअता पालनी कोअहे. जों खाहे तों देवोअ कोअते खाहे, काहाके तों देवोअ आभार मानेहें; जों नाहां खातो तों देवोअ काजे नाहां खातो, आन तों देवोअ आभार मानेहें. 7 काहाके आपामेऱ्योअ कोडोज बी सोताआ काजे नाहां जिवतो आन सोताआ काजे नाहां मोअतो. 8 आपू जे जिवते होय तें प्रभुउ काजे जिवते होय आन मोअतेहे तेबी प्रभुउ काजेज मोअतेहे; ताहां आपू जिवो नेत मोओ तों प्रभुउज काजे होय. 9 काहाके ख्रिस्त याआज कोअते मोइत गोयू, आन फाशुउ जिवीत बी उठ्यू, के तो मोल्‍या आन जिवता बेनुउं प्रभु ओत सेके. 10 ताहरुउ तू ताआ पायहोपोअ दोश काहा लागाड़ेहे? आन तू केहें ताआ पायहोहो कमी समजेहे? आपू ताम आखेज देवोअ न्यायगादीइ हुंबर उबे रोनारे होय. 11 काहाके वसन कोहे,

"प्रभु कोहे, आंय जिवतु देव होय कोत

हारेक जोओं माहूं वोंदे

आन हारेक जोओं कबुल कोए, आंयुंज देव होय."

12 ताहां आपामेएं हारेक जोओं जिवज्योअ इसाब देवोहो आपे.

बिहीराआ काजे अड़सन मा बोणहां

13 तिहींवाईं, ओमे रोत आगाड़ी आपू कोडापोअ आरोप ने लागाड़ीइलू, आन ओं बी ठरवीत लेएलो के ओमे रोत बिहीराआ काजे पापोम पोड़ीइलोअ अड़सन नाहां बोणिइलो. 14 माहूं मुंदू होय आन प्रभु ईसुउ वोजेसे आंय मानोहो के कोड्ली बी वस्तु तुऱ्यीइ एठी नाहां रोती; पोन जों माहुंउं तियी वस्तुहू एठी समजेहे ताहां तियाआ काजे ते एठीज होय. 15 जर ताआ कि तेबी खाद्ला वाईं एखा पाव्हीइलाआ मोन दुखाअतोय ताहां, तु मेरे वाईं नाहां सालतू कोवाय, जिया माहुंउं उस्ती ख्रिस्ते जिव आप्यू तियाहा तु ताआ रोटा वाईं नाश मा कोअही. 16 तुमापोअ हाजी गोठी होय तियीइ तुमू निंदा मा ओवुहूं देहा. 17 काहाके खाअला- पिइलाम देवोअ राज्य कायनाहां, पोन सतीपण, शांती आन खुसी जे पवित्र आत्मापरोत जोड़ेहे तिहींम होय. 18 यी पद्धती वाईं जों कोडो ख्रिस्ताआ सेवा कोअहे, तों देवोहो गोमेहें आन माहें बी तियाहा स्विकारतेहे.

19 तियाहा कोत आपू जियीं गोठीम होक आन मजबुत बोणिइलोअ आधार जोड़ेहे, तियीं गोठीइ फाट लागुहूं जोवे. 20 रोटाआ काजे देवोअ काम मा बिगाड़ही; ताहूं खाअलाम आखोज सालतोय, पोन ताआ खाअला वाईं एखो पापोम पोड़तोय तों सुकीइ होय. 21 माहां खाअलो, नेत दाराक्शाआ रोहो पिइलो, नेताहां एहेलोहो बिहीरो काविहीं कोइलो जिहीं वाईं विश्वासी पाव्हीइले भटके, तेहलोहो ने कोए तोंज हाजो. 22 ताआ विश्वास तू देवोअ सामने सोताआ मोनोम मिक. जो सोताआ पसन कोअल्यी गोठीम सोताहा दोशी ने गोणाय तों धन्य होय. 23 पोन जों माहुंउं मोनोम सौंसू तोइत खाहे तों दोशी ठरेहे; काहाके तिये विश्वास वाईं ने खादो; आन जों किबी विश्वास वाईं ने कोअयो तोंज पाप होय.