1 पौलुसोअ तरफ से, जो ख्रिस्त ईसुउ सेवक होय, जियाहा देवे प्रेशित ओवीइलोअ काजे निवड़्युहू, आन देवोअ हाजी बातमी परसार कोए तेहें हाद्युहू.

2 वसनोमेऱ्याआ लेख्याआ पुरमाणे देवे तियाआ भविश्यवक्ता वाअहीं पेलुज रोत हाजी बातमीइ वायदो कोअयोतो. 3 तों वायदो तियाआ बेटाह्हा आपाआ प्रभु ईसु ख्रिस्ताआ बाप्तिमेहें होय; जो डिलोअ इसाबोमेहें ते दाविदोअ पारवाड़ीमेहें उबज्यु, 4 आन सोकायीइ आत्माआं इसाबोमेहें मोल्याम रोत जिवीत उठीइलाअ वाखरी ईसु वोडी सेक्तीवाईं प्रभुउ बेटुह्हू ठर्‍युहू. 5 तियाज ख्रिस्ता वाअहीं देवे आमुहूं प्रेशित बोणिइलोअ मेरवानी आप्यी, काहाके आखे माहें तियाआ नावोपोअ विश्वास कोइत तियाआ आदेश मानुहूं जोवे. 6 रोम सेहरोम रोनारे तुमू बी यामेहें सामिल होय, जियांहां देवे ईसु ख्रिस्ताआ माहें ओवे तेहें कोत हाद्येहे;

7 आन रोम सेहरोमेहें रोनारा आखाआज काजे आंय लेखोहो, जियांहां देव मेर कोअहे आन तिये तियांहां सोताआ माअहें ओवीइलाअ काजे हाद्येहे:

आपाआ प्रभु आब्हू आन ईसु ख्रिस्ताआ तरफ से तुमुहूं मेरवानी आन होक जोड़तू रोअहूं जोवे.

8 पेल, आंय तुमा आखाआ काजे ईसु ख्रिस्तावाअहीं माआं देवोअ आभार मानोहों; काहाके तुमाआं विश्वासोअ बाप्तिमेहें आखी दुन्या उनाअहे. 9 जियाआ बेटाह्हाआ हाजी बातमीइ सेवा आंय माआं पुरा मोनो वाअहीं कोअहो तोज देव माआं साक्शीदार होय के, जों आंय कोहो तों खोरो होय. आंय केहेलुहू तुमाआं ताल-ताल ओर कोअतू रोहो तों देवोहो मुंदू होये. 10 आन आंय सादाज विनंती कोअहो, के किबी कोइत ओमे तुमाआं जागे आविइलाअ आंय खुब इश्शा कोअहो, आन माआं वाट देवोअ मोर्जी वाअहीं मोकली ओवे. 11 तुमू मजबुत बोणुहूं जोवे कोत तुमाअरी एखु आत्मिक वरदान वाटीत सेको यी वोडी इश्शा वाअहीं आंय तुमुहूं मिलुहूं कोअहो. 12 काहाके जेहेलाम आंय तुमाआं विसमेहें रोहीं, ताहां जो मामेहें आन तुमामेहें होय तिया विश्वासोवाअहीं आपुहूं एकान एका वाअहीं टेकू जोड़ीत सेके.

13 माआं पाव्हीइला, आंय तुमाआं जागे वारुज वारी आविइलाआ इश्शा कोअयी, याअकाजे के, जेहलोहो माहूं बिगर यहुदी माहूंमेहें फल मिल्यो, तेहेंज कोइत तुमामेहें बी फल मिलुहूं जोवे, पोन माहूं ओमे जाआं कोडे तेबी रुक्युहू, ए गोठ तुमू नेज विहीराअहूं जोवे. 14 आंय युनानीइ आन विण युनानीइ, सिकाअलान ने सिकाअलाआ आखाज कर्जाम बांदाअलू होय. 15 ताहां रोम सेहरोअ रोनारा तुमुहूं बी आंय हाजी बातमी कोअलाआ काजे पाक्कू तियार होय.

16 आंय याअ काजे हाजी बातमी कोअलोअ नाहां लाजवाअतू, काहाके ते बादा विश्वास कोअनाराआ कोअते, पेल ते यहुदी आन तिहीं रोत बिगर यहुदीइ कोअते तारणोअ काजे देवोअ ताकत होय. 17 ✝काहाके हाजी बातमीमेहें देखुहूं जोड़ेहे के देव माअहुंहूं तियाआ नजरेम हुदो* केहें कोइत बोणावेहे; जों सुरवाती रोत ते आखरी जाआं विश्‍वासो वाअहींज होय. जेहलोहो वसनोम बी लेख्योहो के, "धर्मी माहुंउं विश्वासोवाअहीं जिवे."

18 देवोअ खोत ताम तियां माअहोंअ पाप आन खाराब कामोपोअ होरगाम रोत प्रगट ओवेहे, जें सत्याहा खाराब कामोवाअहीं दाबीत मेकतेहे. 19 तिहींज वाईं देव शिक्शा कोअत्लू, काहाके देवे सोताहा प्रगट कोअल्यो काजे देवोअ बाप्तिमेर्‍योअ ज्ञान तियांआं मोनोहो समजाअहे. 20 जोयोंअ रोत देवे कोल बोणायी, तोयोंअ रोत तियाआ ने देखाअनारा गुण, मोन्ज्ये तियाआ हादाजल्मार्‍यीइ सेक्ती आन देवपणोअ सोभाव, ए बेनू गुण देवोअ बोणावटीम देखुहूं जोड़ताहा आन सोमजाअताहा, तिहीं वाईं तियां माहूंपोअ कीज उत्तर कायनाहां. 21 तें देवोहो ओलखीइतेहे, पोन जो मानपान तियाहा आपुहूं जोगुहू होय तो तियाहा नाहां आपते, आन आभार बी नाहां मानते, पोन उलटे तें खाराब विसार कोए वोल्ये आन तियांआं खाली दिमाक आंदारा वाअहीं पोआइत गोयू. 22 तें सोताहा हुशार कोवड़ावते कोवड़ावतेज फोगे बोण्ये. 23 आन जिवता जागता देवोअ भक्तीही तियां आरवाअनारो माहुंउं, सिड़े, शार गुडावाले जनवारें आन पुंयींपोअ होरतींडनारे जनवारें एहेलाआं मुर्तीमेहें बोदलीत टाक्यी.

24 तिहीं वाईं देवे बी तियांहां सोगद्ये कामें कोए तेहें काजे एहेंज सोड़ी देदे, मोन्ज्ये तें तियांआं मोनोअ लालसी इश्शा वाअहीं एकान एकाअरी विणलाज्ये कामें कोइत सेके. 25 काहाके तियां देवोअ सत्याहा ठोगोमेहें बोदलीत टाक्यो, आन बोणावल्यी वस्तुउ भक्ती आन सेवा कोअयी, पोन तिया बोणावनाराआ भक्ती ने कोअयी, जो हादाजलम भक्ती कोअहूं जोगुहू होय! आमेन.

26 तिहींज वाईं देवे बी तियांहां विणलाज्यी ईश्शापोअ सोड़ी देदे; तेतोज नाहां पोन तियांआं बोईं बी सोभाविक वेवारो कोइलोअ सोड़ी देत विणलाज्यो वेवारो कोइ वोल्यी. 27 तेहेंज कोइत माटी बी बोईंइंरीइ सोभाविक वेवारो कोइलोअ सोड़ी देत तियां तियांआं एकान एकाअरी आब्जाड़ा कोआ वोल्‍या. माट्योअरी माटीज सुकवात विणलाज्ये कामें कोइत सोतापोअ खोरी शिक्शा हाटवीत लेदी.

28 काहाके यांज माअहुंहूं देवोअ बाप्तिमेहें खोरो जांइत लेअलोअ ने गोम्यो, तिहींज वाईं देवे बी तियांहां विणलाज्ये कामे कोए तेहें काजे तियांआं विणहानेपोअ सोड़ी देदे. 29 तिहीं वाअहीं तें होदीइ बातीइ एठाय, फोगाय, लालसाय, आन खोद्रायी वाअहीं पोआत गोये; आन तें आद्राय, खुन कोइलो, भान्गड़्यी कोइलो, ठोगीइलो, आन जलनो वाअहीं पोआइत गोये. आन तें बिबड़ीइनारे, 30 बिहीराआ बाप्तिमेहें रोवा कोअनारे, देवोअ सीस कोअनारे, बिहीराआ नावे पाड़नारे, वोडार्‍ये, बोड़ाय कोअनारे, होदीइ बाक्ताय इतीवनारे, आन आयहीन आब्हाआ गोठी ने माननारे, 31 तें विण ओकल्ये, विश्वास तोड़नारे, विण मायाआ आन विण दयाआ ओत गोये. 32 एहलेहे कामें कोअनारांहां मोतोअ डोंड जोड़े ओ देवोअ कायदु कोहे, ओं बी तियांहां मुंदू होय, तेबी तें एतेज ए गोठी कोअतेहे एहेलोह नाहां, पोन एहेलेहे कामे कोअनारांहां तें टेकू बी आपतेहे.