1 आंय तुमुहूं फिबे नावोअ आपाआ एक बोअह्हीं जे किंख्रिया मंडड़ीइ सेविका होय, तियीइ काजे विनंती कोअहो के, 2 तुमू जेहलेहे देवोअ सेवकोअ स्वागत कोअतेहे तेहलोहो तियीइ बी प्रभुउ नाव से स्वागत कोआ; आन जे बी गोठीइ तियीही तुमाआं गरज पोड़े ताहां मदत कोआ; काहाके तियी जास्ती जोओंहों मदत कोअयिही आन माहूं बी जास्ती मदत कोअयिही.

3 ख्रिस्त ईसुउ सेवामेहें माआं मदत कोअनारे प्रिस्किल्ला आन अक्विला यांहां माआं सलाम; 4 तियां माआं जिवोअ काजे सोताआ जिव अड़सनेम टाकी देदूतो; आंय तियांआं आभार मानोहों, तेतोज नाहां पोन बिगर यहुदीइ आखी मंडड़ी माहें बी तियांआं आभार मानतेहें.

5 जे मंडड़ी तियाआ कोअ टोलू वोलेहे तियीही बी सलाम कोजा. माआं मेरालू अपैनेतुस याहा सलाम कोजा, तो ख्रिस्ताआ काजे आसिया देसोअ पेहलु विश्वासी होय. 6 मरियाहा सलाम कोजा, ते तुमाआं काजे जास्ती राब्यीही. 7 अन्द्रुनीकुस आन यूनियासोहो माआं सलाम, जे माअ कोर्‍याआ होय, आन माअरी जेलेमेहें तोआयाते आन प्रेशितोंमेहें तियांआं नाव होय, आन मारोत पेल ते ख्रिस्ती ओवाते.

8 प्रभुउ संगतीमेहें माआं मेरालू आंप्लियात याहा माआं सलाम. 9 ख्रिस्ताआ सेवाम आमाआं जोड़ीदार आन मदत कोअनारु उरबानुस माआं मेरालू दोस्ती इस्ताखुसोहो सलाम. 10 अपेल्लेसोहो सलाम, जो ख्रिस्तामेहें खोरु निहींयू. अरिस्तबुलुसोअ कोर्‍याहां सलाम. 11 माआं कोर्‍युउ हेरोदियोन याहा सलाम, आन नार्किसोअ कोअमेर्‍येआ माअहुंहूं प्रभुमेहें सलाम.

12 प्रभुमेहें राबनारे त्रुफेना आन त्रुफोसा यांहां सलाम. मेराली पर्सिस यिही सलाम, जे प्रभुमेहें जास्ती राबेहे. 13 रुफुसोहो जो प्रभुमेहें निवड़्युहू आन तियाआ आयही जे माआं बी आयही होय, बेनुहूं सलाम. 14 असुंक्रितुस आन फिलगोन आन हेरमेस आन पत्रबास आन हेरमास आन बाकी ख्रिस्ती पायहोंहों सलाम. 15 फिलोलोगुस आन यूलिया, नीरियस, आन तियाआ बोअह्हीं, आन ओलुंपास यांहां आन तियाअरीइ आखा देवोअ माअहोंहों सलाम.

16 मेरेवाईं एकमेकाहा गले लागाड़ीत मिलजा. ख्रिस्ताआ आखी मंडड़ी तुमुहूं सलाम कोतीही.

17 माआं पाव्हीइला, आंय तुमुहूं विनंती कोअहो के, तुमुहूं जों शिक्शण जोड़्योहो तियाआ विरुद्दाम जें माहें विश्वासोम फाटा पाड़तेहे आन अड़सन टाकतेहे तियांपोअ नजर मिका आन तियां रोत सेटे रोवा. 18 काहाके तेहलेहे माहें आपाआ प्रभु ख्रिस्ताआ सेवा नाहां कोअते, पोन सोताआ पेटोअ सेवा कोअतेहे; आन गुल्‍यी गुल्‍यीज गोठी कोइत सादासिदा माहुंउं मोने भटकाड़ी देतेहे. 19 देवोअ आदेश मानिइलोअ तुमाआं सर्सा आखा माअहूंम पसरीत गोयीही, तिहींवाईं आंय तुमाआं बाप्तिम खुस होय; पोन माहूं लागत्लो के तुमू हाजा कामोअ कोअते हुशार आन बाक्ता कामोअ कोअते बोग्ये बोणीत रोवा.

20 होक आपनारु प्रभु ईसु तुमाआं गुडाआ थुड़ी सैतानोहो वेगुज पेस्की देये.

21 माआं हेंगाती तिमथ्या, आन माआं कोर्‍युउ लूकियुस, यासोन, आन सोसिपातेर तुमुहूं सलाम कोताहा.

22 ओं पत्र लेखीत आपनारु आंय तर्तियुस तुमुहूं प्रभुमेहें सलाम कोहो.

23 माआं आखी मंडड़ीइ पावणाय कोअनारु गायस याआ तुमुहूं सलाम. इरास्तुस जो होयरोअ कारभारी होय आन क्वारतुस याआं तरफ से तुमुहूं सलाम. 24 आपाआ प्रभु ईसु ख्रिस्ताआ मेरवानी तुमापोअ रोअहूं जोवे. आमेन!* 25 ओमे आखी महिमा देवोहो! जे हाजी बातमी आंय तुमुहूं कोयीही ते आन ईसु ख्रिस्ताआ बाप्तिम संदेशोअ परसार यां वाईं तुमू मजबुत ओत सेकतेहे, ते दोड़पाअली गोठी जे वेगी रोत निकाड़ीत मेक्यीते, 26 ते ओमे खुल्ली ओत कोइत सनातन देवोअ आदेशो वाईं भविश्यवक्ताआं पुस्तकोंम तियी गोठीइ पुकारु ओत गोयुहू के विश्वासो वाईं आदेश माननारे ओत जाअहूं जोवे.

27 तियाज एखला एकनिस्ता देवोअ महिमा ईसु ख्रिस्तावाईं हादाफल ओवती रोये. आमेन!