1 तिहीं वाईं माआं पाव्हीइला, आंय देवोअ दया ओर कोइत विनंती कोअहो के तुमाआं शरीरोहो जिवतो, सोको, आन देवोहो होबे एहलोहो गाराहा कोत होपी द्या, एज तुमाआं खरी सेवा होय. 2 यी दुन्याआ होस मा बोणहां; पोन तुमाआं मोनोअ नोवो ओत जाअलो वाअहीं तुमाअ उठीइलो-बोहीइलोअ बी बोदलाअतो जाअहूं जोवे, जिया वाअहीं तुमू देवोअ हाजाम हाजी, आन तियाहा गोमे एहेलिही हारीपुरी इश्शा कि होय ते ओलखीत सेकहा.

3 काहाके माहूं जोड़्यीही तियी मेरवानी वाअहीं आंय तुमामेर्‍याआ हारेक जोओंहों कोहो, के जेहलोहो समजुहूं जोवे तिया रोत वादार कोडोज बी सोताहा ने समजुहूं जोवे; पोन जेहलोहो विश्वासोअ मापोअ वाईं हारेक जोओंहों देवे वाटित आप्योहो, तेहेंज कोइत सोताहा समजुहूं जोवे. 4 काहाके जेहें कोइत आपाअ एका डिलोम जाअखीलाहा भाग होय, आन आखा भागोअ एक हारकोज काम कायनाहां. 5 तेहेंज कोइत आपू जाअखीलेहे होय तेबी ख्रिस्तामेहें एक डिल बोणीत कोइत एकान एकाम जुड़ात होय. 6 ताहां आपुहूं जे मेरवानी जोड़्यिही तियीइ पुरमाणे आपुहूं बाती बातीइ वरदाने जोड़्येहे, जिया कोडाहा भविश्यवाणीइ वरदान जोड़्योय, तो विश्वासोअ पुरमाणे भविश्यवाणी कोअहूं जोवे. 7 जियाहा सेवा कोइलोअ वरदान जोड़्योय, तों सेवाम वापरुहूं जोवे; जर एखू मास्तर ओय, ताहां तों शिक्शण आप्याज कोअहूं जोवे; 8 एखाहा समजाड़ीइलोअ वरदान ओय ताहां तों समजाड़ीइलामेहें लागीत रोअहूं जोवे; एखाहा दान कोइलोअ वरदान ओय, ताहां तों खुल्ला मोनोवाईं दान कोअहूं जोवे; जियाहा पुढारपण कोइलोअ वरदान ओय ताहां बोराबर जबाबदारी लेअहूं जोवे; जो दया कोअनारो ओय, तों खुसी वाअहीं दया कोअहूं जोवे.

9 खोरो मेर कोअहूं जोवे; जों खाराब तियाआ सीस कोआ; हाजला कामोम लागीत रोवा. 10 पाव्हीइलाआ होस एकमेकापोअ मेर कोआ; खुसी वाअहीं एकमेकाआ मानपान कोइलाम आगाड़ी रोवा. 11 आलहाय मा कोअहा पोन कठीण मेहेंनत कोआ; आत्मिक रोडेवाईं प्रभुउ सेवा कोअते रोवा. 12 आशामेहें खुसीम रोवा; तारासोम खेटित रोवा; कायम प्रार्थना कोअते रोवा. 13 विश्वासी पाव्हीइलाहां जे किबी मदत जोवतीय, तिहींम तियांहां मदत कोआ; पावणाय कोइलाम आगाड़ी रोवा.

14 तुमाआं विरोध कोअनाराहां आशिर्वाद आपा; हाराप नाहां पोन आशिर्वाद आपा. 15 खुसी कोअनाराअरी खुसी कोआ, रोड़नाराअरी रोड़ा. 16 आखे एक मोन मिका, वोडाय मा कोअहा, पोन गोरब्योहों बी मिलते रोवा; सोताहा एते हुशार मा समजाहा.

17 एखे तुमाआं बाक्त कोअयो तियाआ बोदले तुमू तियाआ बाक्त मा कोअहा; जे गोठी आखाआ काजे हाजी होय, तेज गोठी कोअया कोआ. 18 तुमा वाअहीं ओत सेके तेतो तुमू आखाअरी होकेहे रोवा. 19 मेराला पाव्हीइला, तुमू बोदलू मा लेहा, पोन देवोअ खोतेहे वाट आपा, काहाके लेख्योहो, "बोदलू लेअलाअ माअ काम होय, आंयुंज बोदलू लेहीं," एहें प्रभु कोहे. 20 पोन, "ताआ दुस्मोन जर फुकल्युज ओय ताहां तियाहा रोटू खावाड़, जर तिहल्यु ओय ताहां तियाहा पाईं पिवाड़; काहाके एहेलोहो कोअही ताहां तू तियाआ मुंडीपोअ जलजल कोअत्ला आराआ टिग कोअही."✝ 21 बाक्ती गोठीइ वोजेसे हार मा मानहा, पोन हाजी गोठी वाअहीं बाक्ती गोठीही हारवी द्या.