1 ताहां आपू कि कोहूं? मेरवानी जाअखी वादे कोत पाप कोअता रोअहूं जोवे के? 2 जोलोम नाहां! आपू जेहेलाम पापोअ काजे मोइत गोये, ताहां आगल्योअ जिवणो कि कोइत जिवुहूं जोवे? 3 आपू आखे माअहें जियां ख्रिस्त ईसुउ बाप्तिस्मा लेदोहो, तियां तियाआ मोतोअ बाप्तिस्मा लेदोहो तों तुमुहूं नाहां मुंदू के? 4 तिया बाप्तिस्मा वाईं आपू तियाअरी ओजाअये, काहाके जेहेंकोइत ख्रिस्त होरगामेर्‍याआ आब्हाआ महिमा वाअहीं मोल्यामेहें रोत जिवाड़ाअयु, तेहेंज कोइत आपू बी नवीन जिवनोमेहें सालुहूं जोवे.

5 काहाके जर तियाआ मोतोम आपू बी मोये, ताहां खोरीज तियाआ जिवीत उठीइलाम बी जिवीत उठहूं. 6 आपुहूं मुंदू होय के आपाआ जुनू सोभाव ख्रिस्ताअरी क्रुस खांबोपोअ ठोकी देवाअयुहू, काहाके पापोअ डिल नाश ओत जाअहूं जोवे, आन या रोत आगाड़ी आपू पापोअ गुलामीम ने रोअहूं जोवे. 7 काहाके जो मोइत गोयो, तो पापोम रोत सुटीत गोयो. 8 तिहीं वाईं जर आपू ख्रिस्ताअरी मोइत गोये, ताहां आपाआ विश्वास ओ होय के आपू तियाअरी जिवते बी रोहूं. 9 काहाके आपुहूं मुंदू होय, ख्रिस्त मोतोम रोत जिवीत ऊठीत कोइत फाशुउ नाहां मोअनारु; मोतोअ राज फाशोअ तियापोअ नाहां सालनारो. 10 काहाके जो मोइत गोयू तो पापोअ काजेहे एकुज वारी मोइत गोयू, पोन जो जिवतु होय तो देवोअ काजे जिवतु होय.

11 तेहेंज कोइत तुमू बी सोताहा पापोअ काजेहे ते मोल्ये आन ख्रिस्त ईसुमेहें देवोअ काजे जिवते समजा. 12 ओमे तुमू तुमाआं आरवाअनारा डिलोमेहें तियाआ लालसोअ ताबाम रोय तेहें काजे पापोहो राज मा कोअहूं देहा. 13 आन तुमाआ डिलोहो बाक्ता कामोअ सादन बोणे तेहें काजे पापोअ आथम मा होपहा, पोन तुमू सोताहा मोल्याम रोत जिवित उठल्ये एहलोहो होमजीत कोइत देवोहो होपी द्या, आन सोताआ डिलोहो सती कामोअ सादन बोणे तेहें काजे देवोअ आथम होपी द्या. 14 ताहां तुमापोअ पापोअ राज ने रोय; काहाके तुमू कायदाअ ताबाम नाहां, पोन देवोअ मेरवानीइं ताबाम होय.

15 ताहां कि ओवो? केहें आपू कायदाअ ताबाम नाहां पोन मेरवानीइं ताबाम होय काजे पाप कोअहूं जोवे के? जलम नाहां! 16 जियाआ आदेश मानिइलोअ काजे तुमू सोताआ जिवन गुलामोअ होस होपी देतेहे तियाआज तुमू गुलाम होय, ओं तुमुहूं नाहां मुंदू के? ते गुलामी पापोअ ओत सेकेहे जियाआ फल मोत होय, नेताहां, ते गुलामी आदेश पालनोअ ओत सेकेहे जियाआ फल सतीपण होय. 17 पोन देवोअ धन्यवाद के तुमू जें पापोअ गुलाम ओते, ओमे मोनसे तिया आदेशोअ माननारे बोणीत गोये जो तुमुहूं आप्युतो. 18 आन पापोम रोत सुटित कोइत तुमू सतीपणोअ गुलाम बोण्ये. 19 आंय तुमाआं डिलोअ कमजोरी देखीत माहुंउं सादो उदाहरण कोहो. जेहें कोइत तुमू तुमाआं डिलोहो खाराब कामोअ काजे सोगद्या आन खाराब कामोअ गुलाम कोत होप्योतो, तेहेंज कोइत ओमे तुमाआं डिलोहो सोकायीइ काजे सतीपणोअ गुलाम कोत होपी द्या.

20 जेहेलाम तुमू पापोअ गुलाम ओते, तेहलाम सतीपणोअ बाप्तिम मोकले ओते. 21 जियीं गोठी वाअहीं ओमे तुमुहूं लाज आवेहे, तियीं गोठी वाईं पेल तुमुहूं कि फल जोड़तोतो? काहाके तियांआं फल ताम मोत होये! 22 पोन ओमे तुमू पापोम रोत सुटित कोइत देवोअ गुलाम बोणीत गोयेहे, तिहीं वाईं तुमुहूं सोकायीइ फल मिल्यो आन सेवटीपोअ हादाफल्योअ जिवन. 23 काहाके पापोअ मोजरी ते मोत होय, पोन देवोअ वरदान आपाआ प्रभु ख्रिस्त ईसुमेहें हादाफल्योअ जिवन होय.