1 ताहां बिगर यहुद्याआं सामने यहुद्याआं कि फायदू? आन खतनाआं काविहीं लाभ ओवू? 2 आखी वोलेहे रोत खुब फायदू! पेल तोम देवोअ वसने यहुदी माअहुंहूं होप्येते. 3 पोन जर तियांमेहें रोत थोड़ेक जोएं इमानदार ने निहींये ताहां कि ओवो? केहें तियांआं इमानदार ने रोअलो वाअहीं देवोअ इमानदारी विणकाम्यी ठरे के? 4 जोलोम ने! देव खोरु ठरे पोन आखे माअहें ठोग ठरे; जेहलोहो लेख्योहो,

"तू ताआ गोठी वाअहीं धर्मी ठरुहूं जोवे;

आन न्याय निवाड़ू कोइलाअ वेले ताहूं जीत जोड़ुहूं जोवे."

5 पोन जर आपाअ सुकी वाईं देवोअ गोठ बोराबर देखाअतीय, ताहां केहें आपू कोत सेकतेहे के देव आपुहूं शिक्शा कोअहे ओं गलत होय? ओं ताम आंय सादो प्रश्न फुसोहो. 6 जोलोम नाहां! नेते देव केहें कोइत दुन्याआ न्यायनिवाड़ु कोए?

7 जर माआं लबाड़ी वाईं देवोअ इमानदारी तियाआ महिमाअ काजे प्रगट ओवी, ताहां माहूं पाप्योअ होस काहा ठरवुहूं जोवे? 8 आमापोअ एहेलुहू आरोप लागाड़तेज ओय, ताहां आमू एहें काहा ने कोजे के "हाजा निहींइलो काजे साला आपू सुकीइ काम कोअहूं?" आन थोड़ेक ताम एहेंज कोतेहे, पोन तियांहां बोराबर डोंड जोड़े.

9 ताहरोअ कि ओवो? केहें आमू तियां रोत हाजा होय? जोलोम नाहां; काहाके आमू यहुदी आन युनानी यां बेनू पोअ ओज आरोप लागाड़ीत सुकाहा के तें आखेन आखे पापोम बांदाअले होय. 10 जेहलोहो लेख्यो कोहे के:

"कोडोज धर्मी कायनाहां, एक बी नाहां.

11 कोडोज हानालो कायनाहां; देवोअ भक्ती कोअनारो कोडोज कायनाहां.

12 आखे भटकीत गोयेहे; तें बादेन बादे विणकाम्ये ठऱ्येहे;

कोडोज हाजो काम कोअनारो कायनाहां,

एक बी नाहां.

13 तियांआं शब्दे मोन्ज्ये उखीरल्यो माहोंण;

तें सोताआ जिबी वाअहीं ठोगतेहे, तियांआं ओठो मेहें हापोअ जेहर होय.

14 तियांआं सोब हाराप आन कड़वायी वाअहीं पोआली होय.

15 तियांआं गुडा खुन पाड़ीइलोअ काजेहे गुगदीइताहा.

16 तियांआं वाटेपोअ नाश आन पिड़ा होय.

17 तियां होके होंद्रेए वाट नाहां जाईंत लेदी.

18 ✝ देवोहो बित सालीइलोअ तियांहां नाहां मुंदू."

19 आपुहूं मुंदू होय के कायदु जो किबी कोहे तो तियांहांज कोहे, जें कायदाहा मानतेहे; याअकाजे के हारेक सोब बंद कोआय आन आखी दुन्या देवोअ सामने गुनेगार ठरे; 20 काहाके कायदाअ कामोवाअहीं कोडो माहुंउं देवोअ सामने धर्मी नाहां ठरनारो; काहाके कायदा वाअहीं पापोअ मुंदू पोडेहे.

21 पोन ओमे कायदाअ रोत आलांग देवोअ तो सतीपण प्रगट ओयोहो, जियाअ साक्शी मोशेए कायदु आन भविश्यवक्ता आपताहा, 22 मोन्ज्ये देवोअ तों सतीपण जों ईसु ख्रिस्तापोअ विश्वास कोइलो वाअहीं बादा विश्‍वास कोअनाराअ काजे होय; काहाके किज भेदभाव नाहां; 23 काहाके आखाज पाप कोअयुहू, आन देवोअ महिमा रोत सेटे ओत गोयेहे. 24 पोन तियाआ मेरवानी वाअहीं तियी सुटका वाअहीं जे ख्रिस्त ईसु मेहें होय, तें फुकोटो मेहें आखे धर्मी ठरवाअतेहे. 25 ईसुहू देवे तियाआ रक्ता वाअहीं एक एहलुहू गाराहा ठरव्यू, जो विश्वास कोइला वाअहीं काम कोउ वोलेहे, के जे पाप पेल ओत सुका आन जियां पोअ देव तियाआ सहनशीलताआ वाखरी दिहान ने देदो. तियांआं बाप्तिमेहें तो सोताआ सतीपण देखाड़े. 26 नेत यीज वेले तियाआ सतीपण देखाइत जाय के जियावाअहीं तो सोताहा धर्मी ठरे, आन जों ईसु पोअ विश्वास कोए तियाआ बी धर्मी ठरिवनारु ओवू.

27 ताहां वोडाय का होय? वोडाय बारथे निहीत गोयी, किहाआ आधारो वाअहीं? कायदु पालित सालतेहे तिहीं वाअहीं के? नाहां! आपू विश्वास कोअतेहे तिहीं वाअहीं धर्मी गोणाअतेहें. 28 ताहां आखरीपोअ आमू ओं सोमजीइताहा के, माहुंउं कायदाहा सोड़ीत, विश्वासोवाअहीं धर्मी गोणाअहे. 29 देव फक्त यहुदी माअहूं एतुज होय के बिगर यहुदीइ नाहां के? होव, बिगर यहुदीइ बी होय. 30 काहाके एकुज देव होय, जो आखा खतनावालाहांन ने खतनावालाहां विश्वासो वाअहींज धर्मी ठरवे. 31 ताहां काय आमू विश्वासोवाअहीं कायदाहा फालतु ठरवीइताहा के? केदिहींज नाहां, उलटा आमू कायदाहा कायम सालुज मेकताहा.