1 ताहां ओमे जाहां आपू विश्वासो वाईं देवोअरी धर्मी ठऱ्येहे, ताहां प्रभु ईसु ख्रिस्ता वाअहीं देवोअरी आपाआ होक होये. 2 जियी मेरवानीम आपू जिवतेहे, तियी देवोअ मेरवानीइं वोजेसे तिये विश्वासोवाईं आपुहूं प्रवेश बी आप्युहू, आन आपू देवोअ महिमा वाअहीं आशा पोअ वोडाय कोअतेहे. 3 तेतोज नाहां पोन आपू तारासोम बी वोडाय कोअहूं जोवे; काहाके आपुहूं मुंदू होय, तारासोवाईं धिर उत्पन्न ओवेहे, 4 आन धिरोवाअहीं खोरो निहींइलो, खोरो निहींइलो वाअहीं आशा तियार ओवेहे; 5 आन आशा आपुहूं नाहां लाजवाड़ती, काहाके देवो आपल्या पवित्र आत्मा वाअहीं देवोअ मेर आपाअ मोनोमेहें टाक्यीही.

6 काहाके जेहेलाम आपू कमजोर ओते, तेहेलाम बोराबर वेलेपोअ ख्रिस्ते पाप्योंअ वोतीइ जिव आप्यू. 7 एखा धर्मी माहुंउं काजे एखो मोए ओं कठीणुज होये; पोन ओत सेकेहे एखु हाजा माहुंउं काजे मोइलोअ हिम्मत बी कोइत सेके. 8 पोन देव आपापोअ तियाआ मेरेए पुरावू एहें कोइत देखाड़्यू, के जेहेलाम आपू पापीज ओते तेहेलाम ख्रिस्त आपाआ काजे मोयू. 9 आपू ओमे तियाआ रक्ता वाअहीं धर्मी ठऱ्येहे, ताहां तिया वाईं देवोअ खोते रोत केहें ने वासाओ? 10 काहाके दुस्मोन ओते ताहांज आपू तियाआ बेटाह्हाआ मोतो वाअहीं देवोअरी आपाआ होमजोण ओत गोयीही, ओमे आपाआ देवोअरी होमजोण गोयीही, ताहां ख्रिस्ताआ जिवनो वाअहीं आपुहूं सुटका काहा ने जोड़े? 11 तेतोज नाहां, पोन आपू आपाअ प्रभु ईसु ख्रिस्तावाअहीं देवोअरी आपाआ होमजोण ओत गोयीही, तिहीं वाईं देवोअ गोठीम आपू खुस ओवतेहे.

12 जेहें कोइत एका माअहूं वाअहीं पाप दुन्यामेहें आयू, आन पापोवाअहीं मोत आयो, आन एहें कोइत मोत आखा माअहूं मेहें पसरीत गोयो, काहाके आखे माअहें पापी ओत गोये. 13 काहाके मोशेए कायदु आप्यू ताअहूं जाआं पाप दुन्यामेहें ओतू, पोन जिहीं कायदु कायनाहां, तिहीं पाप नाहां गोणाअतू.

14 ते बी मोत जो आदामोअहीं रोत ते मोशेएहीं जाआं तियां माअहूं पोअ राज कोअयो, जियां आदामोअ होस आदेश तोड़ीत पाप ने कोअयू, तो ताम तिया आवनाराआ नमुनू ओतू. 15 पोन जेहलीही गुनाआं दशा होय, तेहलीही मेरवानीइं वरदानोअ कायनाहां; काहाके जेहेलाम एका माहुंउं गुना वाअहीं वारुज माअहें मोये, पोन तिया रोत जाअखी देवोअ मेरवानी होय, काहाके तियाआ जो दान एका माहूं वाईं, मोन्ज्ये ईसु ख्रिस्ताआ मेरवानी वाअहीं जाअखा माअहोंअ काजे वाद्यो. 16 जेहलोहो एके जोएं पाप कोअयू तियाआ फल ओयो, तेहलीही दानोअ दशा कायनाहां, काहाके एका जोओंअ उस्ती डोंडोअ आदेश आयू, पोन जाअखीला जोओंअ गुनाआं वास्तायी एहलोहो वरदान तियार ओवो, काहाके माअहें धर्मी ठरुहूं जोवे. 17 काहाके जेहेलाम एका माहुंउं गुना वाअहीं मोते तिया एकाज वाअहीं राज कोअयो, ताहां जें माअहें मेरवानी आन धर्मी जिवन स्विकारतेहे, तें एका माहूं वाईं, मोन्ज्ये ईसु ख्रिस्ताआ वाईं हादाफल्याआ जिवनोमेहें राज कोअनारे.

18 तिहीं वाईं जेहलोहो एके जोएं पाप कोअयू आन आखाहा डोंडोअ आदेश जोड़्यू, तेहलोहो एका जोओंअ धर्मी कामोवाईं आखा माअहोंहों सुटका आन जिवन जोड़्यो. 19 जेहें कोइत एके जोएं आदेश तोड़्यू, ताहां आखे माअहें पापी ठर्‍ये, तेहेंज कोइत एके जोएं आदेशोअ पालन कोअयो, तिहीं वाईं आखे माअहें धर्मी ठरनारे.

20 मोशेए कायदु विसमेहें आवित लागू तिहीं वाईं पाप जाअखु वाद्यू, पोन जिहीं पाप जाअखीलुहू वाद्यू तिहीं मेरवानी तियाआ रोत बी जाअखी वाद्यी. 21 तिहीं वाईं जेहें कोइत पापे मोत पसरावतो जात राज कोअयो, तेहेंज कोइत आपाआ प्रभु ईसु ख्रिस्तावाअहीं देवोअ मेरवानी बी हादाफल्याआ जिवनोअ काजे धर्मी ठरवीइती जात राज कोए.