2 करिन्थ 10

पौलुस तियाआ सेवाआ बाजू लेहे

1 आंय तोज पौलुस होय, जो तुमाअरी रोहो तेहेलाम ओलवू रोहो, पोन तुमा रोत सेटे रोहो ताहां कड़क वागोहो. आंय तुमुहूं ख्रिस्ताआ हानालाय आन दयालू सोभावो वाअहीं विनंती कोअहो. 2 माआं विनंती एहेलिही होय के, आपू दुन्यादारीइ पुरमाणे सालताहा एहेलोह जें आमाआं बाप्तिम विसार कोअतेहे, तियांअरी कड़क सोभावोम गोगीइलोअ काजे आंय विसार कोअहो, तेहलोहो तुमाआं सामने माहूं कड़क बोणिइलोअ गरज ने पोड़ुहूं जोवे; 3 भले आमू दुन्याम सालता फिरताहा, तेबी आमू शरीर सोभावोअ होस लड़ाय नाहां कोअता. 4 काहाके आपाआ आथार्‍ये शारीरिक नाहां, पोन गढ़ ओदालीत टाकीइलोअ काजे देवोअ सेक्ती तिहींम होय. फालतू कटकटी आमू नश्ट कोअताहा; 5 हारेक विसार जे देवोहो जाईंलोअ ज्ञानोअ विरुद्दाम उठताहा तियां उसा उबा कोअल्या आखा विसारोहो आमू ताबाम कोइत ख्रिस्ताआ सामने निसो मुंड कोआड़ताहा. 6 आन जेहेलाम तुमू आदेश पालन पुरो कोअहा, ताहां आदेश तोड़नाराहा डोंड आपिइलोअ काजे आमू तियार होय.

7 तुमू जो डोआअ सामने देखाअहे तोज पाला. जर एखाहा लागतोय आंय ख्रिस्ताआ होय, ताहां तो ओं बी जाईंत लेअहूं जोवे के तों जेहलोहो ख्रिस्ताआ होय, तेहेलाहा आमू बी ख्रिस्ताआ होय. 8 काहाके प्रभु आमुहूं जो आधिकार आप्युहू तो तुमाआं हाजाआ कोअते आप्युहू, तुमाआं नुकसान ओवे तेहें काजे नाहां आप्यू, तियाआ वादार वोडाय कोओ तेबी माहूं लाज ने आवनारी. 9 मोन्ज्ये आंय पत्रा वाअहीं बिवाड़ोहो एहेलोह कोडाहा ने हासवाअहूं जोवे. 10 काहाके तें कोतेहे के, "तियाआ पत्रे तोम कड़क आन जोरदार रोतेहे, पोन तो रुपोमेहें कमजोर आन तियाआ गोगीइलोम बी कीज दम कायनाहां." 11 जो एहें कोतोय तों जाईंत लेअहूं जोवे के, आमू जेहलाहा सेटे रोत पत्रामेहें गोगताहा, तेहेलाहा आहने रोत सामने काम बी कोअताहा.

12 जे सोताआ बोड़ाय मारताहा तियांअरी आमाआं गणती ओवुहूं जोवे एहेलिही आमुहूं हिम्मत जाआं नाहां ओवती, ते तोम सोताअरी सोताहाज गोणित पालताहा आन सोताअरी सोताहाज तोलीत पालताहा, एहें कोइत ते फोगा बोणताहा. 13 आमू आमाआं लायकी रोत वादार वोडाय नाहां देखाड़नारा; पोन देवे जेती लायकी आप्यीही तेतीज जाआं वोडाय देखाड़नारा, यामेहें तुमू बी आवित गोये. 14 काहाके जेहेलाम आमू तुमाआं जागे पेल पोता, ताहां आमाआं लायकी रोत वादार सोताहा ने वोदा जाताते, पोन ख्रिस्ताआ हाजी बातमी उनाड़ता जात आमू तुमाआं जागे जाआं पोतीत गोया. 15 तियाहा काजे आमू लायकी रोत वादार बिहीराआ मेहेंनती पोअ वोडाय नाहां कोअता; पोन आमाआं आशा होय के जेहें जेहें तुमू विश्वासोम वादते जाहा, तेहें तेहें आमाआं लायकी तियाआ पुरमाणे वादती जाय. 16 मोन्ज्ये आमू तुमाआं आगाड़ी हाजी बातमी उनाड़ीत सेको, आन एहेलोहो नाहां के आमू बिहीराआ कोअल्यी मेहेंनती पोअ वोडाय कोओ.

17 पोन जेहें कोइत वसन कोहे, "जों कोडो वोडाय कोए, तों प्रभुपोअ वोडाय कोअहूं जोवे."✝10:17 यिर्म 9:24 18 काहाके जों सोताआ वोडाय कोअहे तों नाहां, पोन जियाआ वोडाय प्रभु कोए तियाहाज देव मान्य कोअनारु.