1 पौलुसोप रोत जो देवोअ इश्शा वाअहीं ख्रिस्त ईसुउ प्रेशित होय, आन पाही तिमथ्याप रोत करिन्थमेर्‍यीइ मंडड़ीही आन अखायाआ आखा देवोअ माअहुंउं नाव से ओं पत्र:

2 आपाआ देव आब्हू आन प्रभु ईसु ख्रिस्ताआ तरफ से तुमुहूं मेरवानी आन होक जोड़तू रोअहूं जोवे.

3 आपाआ प्रभु ईसु ख्रिस्ताआ देव आब्हाआ आभार मानोहो, जो दयालू आन आखी जातीइ आधार आपनारु देव होय. 4 तो आमाआं आखा अड़सनेमेहें मदत कोअत्लू; एताआ काजे के जे मदत आमुहूं देव आपेहे, तियी मदतो वाअहीं आमू बाकी अड़सनेम रोनाराहां बी मदत कोइत सेको. 5 जेहें कोइत ख्रिस्ताआ वाखरी आमुहूं जाअखीइला तारासोम रोत जाअहूं पोड़ेहे, तेहेंज कोइत ख्रिस्ता वाअहीं आमुहूं देवोअ वोडी मदत बी जोड़ेहे. 6 जो आमुहूं तारास ओवेहे, तो तुमाआं मदत आन सुटकाअ काजे होय; आन जे मदत आमुहूं जोड़ेहे, ते तुमाआं कोअतेज जोड़ेहे; इंहींज वाअहीं तोम जो तारास आमू सहन कोअताहा, तो तुमू बी धिर खेटीत सहन कोइत लेतेहे. 7 तुमाआं बाप्तिम आमाआं आहरु पाक्कू होय; काहाके आमुहूं मुंदू होय के, जेहें कोइत तुमू आमाआं दुखोम सान्बाअयेहे, तेहेंज कोइत जे मदत आमुहूं जोड़ेहे तियीम बी तुमू सान्बाअयेहे.

8 माआं पाव्हीइला, आसियामेहें जे अड़सन आमापोअ आयी, तियींइं बाप्तिम तुमू विहीराअहूं ने जोवे एहेलिही आमाआं इश्शा होय; आमू एता पाअया वोजामेहें दाबाअयाते के, आमापोअ जिवता रोअलोअ बी सेक्ती ने ओती.✝ 9 हुदाअलीज आमुहूं एहेलोहो लागो वोल्‍योतो के, ओमे आमू मोअनाराज होय, आमू सोतापोअ भरीवसू ने कोअहूं जोवे, पोन जो मोल्याहां जिवाड़ेहे एहेला देवोपोअ भरिवसू कोअहूं जोवे, तियाहा काजे एहेलोहो ओवो. 10 तियेज आमुहूं मोतोअ वोडी अड़सनेम रोत वासाड़्या, आन तो आमुहूं आगाड़ी बी वासाड़े; एज आमाआं तियापोअ आशा होय. 11 तुमू बी आमाआं काजे प्रार्थना वाअहीं मदत कोअते रोवा; ताहां जाअखीली प्रार्थना वाअहीं देवे आमुहूं आशिर्वाद आप्युहू कोत जाअखीलेहे माअहें आमाआं वाखरी देवोअ आभार माने.

12 आमू आमाआं हाजी बुद्दीइ वाखरी वोडाय कोअताहा, काहाके दुन्यामेहें आन खास कोइत तुमामेहें आमाआं सोभाव देवोहो गोमे एहेलुहू सोकु आन इमानदारी वाअहीं ओतू, आन तो दुन्यादारीइ ज्ञानोवाअहीं नाहां, पोन देवोअ मेरवानी वाअहीं ओतू. 13 जों तुमू वासीत सेकहा आन समजीत सेकहा, तोंज आमू लेखताहा, आन ओमे भले ओं तुमुहूं आरदाजमेहें समजाअहे, पोन आंय आशा कोअहो सेलवाआ तुमू वारुहूं समजीत लेहा. 14 मोन्ज्ये प्रभु ईसुउ दिही तुमू जेतीही आमाआं बाप्तिम वोडाय कोअतेहे, तेतीहीज आमू बी तुमाआं बाप्तिम वोडाय कोअहूं.

15 आन याज भरिवसा वाअहीं आंय पेल तुमाआं जागे आवुहूं होदतुतो, मोन्ज्ये तुमुहूं दुप्पट दानोअ लाभ जोड़ीत सेकुहूं जोवे. 16 आन आंय मकिदुनिया जात सेको, आन तिहीं रोत तुमाआं जागे आवित सेको, आन तुमू माहूं तिहीं रोत यहुदीयाअहें वाटे लागाड़ीत सेकहा. 17 आंय एहेलुहू विसार कोअयू, ताहां का मोन बोद्ल्यो के? के जो कोइलोअ कोअहो तों शरीरो वाअहीं कोअहूं होदोहो के? आंय माआं गोठीमेहें "होव, होव" बी आन "नाहां, नाहां" बी कोओ? 18 पोन देव खोरु साक्शी होय के आमाआं आथवसन तुमाअरी "होव" आन "नाहां" एहेलोह ने ओतो. 19 काहाके आमू मोन्ज्ये आंय, सिल्‍वानुस आन तिमथ्यू नेहें मिलीत तुमामेहें जियाआ पुकारु कोअयू, तो देवोअ बेटुह्हू ईसु ख्रिस्त होव नेत नाहां एहेलुहू ने ओतू, पोन तिहींमेहें होव एहेलुज ओतू. 20 काहाके देवोअ वायदे जेते बी होय, तियां आखामेहें "होव" एहें कोत होय, तिहीं वाअहीं देवोअ महिमाआ काजे "आमेन" बी ओवो. 21 आन जिये आमुहूं तुमाअरी ख्रिस्तामेहें मजबुत कोअया आन जिये अभिशेक कोअयू तो देवुज होय. 22 जिये आपापोअ सिक्कु बी लागाड़्युहू आन बियानामेहें पवित्र आत्माहां आपाआ मोनोमेहें आप्युहू.

23 आंय देवोहो साक्शी जांइत कोहो के, आंय ओमें जाआं करिन्थमेहें नाहां आयू, काहाके माहूं तुमापोअ किव आवतीते. 24 आमू तुमाआं विश्वासोपोअ आधिकार सालाड़ताहा एहें नाहां, पोन आमू तुमाआं खुसीमेहें सामिल होंव, काहाके तुमू विश्वासोमेहें उबे होय.