1 मेराला पाव्हीइला, आपुहूं ओं आथवसन मिल्योहो तिहीं वाअहीं, आवा, आपू सोताहा डिल आन आत्माआं आखा मोयलोम रोत सोके ओवहूं, आन देवोहो बिते जात सोकाय पुरी कोअहूं.

2 आमुहूं तुमाआं मोनोम जागू आपा. आमू कोडापोअ अन्याय नाहां कोअयू, कोडाहा नाहां बिगाड़्या, आन नाहां कोडाहा ठोग्या. 3 आंय तुमुहूं दोशी ठरवीइलोअ कोअते ओं नाहां कोतू, काहाके तुमू आमाआं मोनोम एतुहू जागू पाड़्युहू के, आमू तुमाअरी मोइलोन जिवीइलो कोअते बी तियार होय, ओं ते आंय वेगोज कोत बी देदोहो. 4 आंय तुमाअरी वोडी हिम्मतोवाअहीं गोठी कोअहो, आंय तुमाआं बाप्तिम वोडाय कोअहो; माहूं हिम्मत आयी. माआं आखा तारासोम बी आंय खुसी वाअहीं पोआत गोयुहू.

5 काहाके जेहेलाम आमू मकिदुनियाम आया, ताहां बी आमुहूं आराम नाहां जोड़्यू, पोन आमुहूं शारी वोल रोत तारासुज जोड़्यू; बारथे भान्गड़्यी, मांय बिक लागे एहेलिही गोठ्यी ओती. 6 तेबी नाराज माअहुंहूं खुस कोअनारु देव तितुसोहो लेतावीत आमुहूं खुस कोअया. 7 तो आवयू तिहीं वाअहीं एतुज नाहां, पोन तुमाआं तरफ से तियाहा जो होक जोड़्यू, तिये माहूं मिलीइलोअ तुमाआं वोडी इश्शा, तुमाआं दुख आन तुमाआं वोतीइ माआं धुंदीइ खबर तुमुहूं कोत आप्यी, तिहीं वाअहीं माहूं वादार खुसी जोड़्यी.

8 काहाके आंय भले या पत्रा वाअहीं तुमुहूं दुखाड़्ये ते खोरे, पोन तिहीं वाअहीं पेल फासताअहो तेहलुहू ओमें नाहां फासताअतू, तिया पत्रावाअहीं तुमुहूं दुख ते लागो, पोन तों तात्पुरतो ओतो. 9 ओमें तुमुहूं दुखाड़्ये कोत आंय खुस कायनाहां, पोन तुमू मोन फिरव्यो तिहींवाअहीं खुस होंव, काहाके तुमाआं दुख देवोअ इश्शा वाअहीं ओतो, आन आमू तुमुहूं कीज नुकसान ने पोताड़्यो. 10 काहाके देवोअ तरफ्योअ दुख एहेलुहू फासतावू कोआड़ेहे के तियाआ फल तारण* होय, आन तिहीं वाअहीं सेलवाआ फासताअहूं नाहां पोड़तो. पोन दुन्यादारीइ दुखोअ फल मोत होय. 11 पाला, तुमाआं दुख देवोअ तरफ से ओतो; तुमामेहें केतीही उरी आयी, केतोहो वासाइलोअ कोअते उत्तर, केतीही खोत, केतीही बिक, केतीही लालस, केतीही धुंद, केतीही डोंड आपिइलोअ बुद्दी आयी. यीं आखी गोठीम तुमू पुरे निर्दुस होय याआ तुमू पुरावू कोइत देखाड़ी देदुहू.

12 ताहरुउ आंय जों पत्र तुमुहूं लेख्यो, तों जिये तुमापोअ अन्याय कोअयू तियाहा काजे बी नाहां, आन जियापोअ अन्याय ओवू, तियाहा काजे बी नाहां लेख्यो, पोन एताआ काजे के, तुमाआं उरी आमाआं काजे होय ते देवोअ सामने तुमापोअ देखाअहूं जोवे कोत लेख्यो.

13 तिहींज वाअहीं आमुहूं मदत जोड़्यी. याअरीज तितुसोअ खुसी वाअहीं बी आमुहूं वादार खुसी जोड़्यी, काहाके तुमाआं वोतीइ तियाआ जिव हेलुगार ओवू. 14 काहाके भले आंय तियाआ सामने तुमाआं बाप्तिम वोडाय देखाड़्यी, तेबी माआं नाक ने वाडाअयो, पोन जेहलीही गोठी आमू तुमुहूं खोरी खोरी कोत देदीते, तेहलोज आमाआं तितुसोअ सामने वोडाय देखाड़ीलोअ बी खोरो निहींयो. 15 आन तुमू आखे बिते बिते आन कापते कापते तियाआ स्विकार कोइत आदेशोअ पालन कोअत्ले देखाड़्यो, तों तियाहा ओर होय; तियाहा काजे तो तुमापोअ जास्ती मेर कोअहे. 16 माहूं आखी गोठीम तुमापोअ भरीवसू होय तिहीं वाअहीं आंय खुस होंव.