2 करिन्थ 11

पौलुस आन ठोग प्रेशित

1 जर तुमू माआं जारिक फोगाय उनाइत लेते, ताहां केतोहो हाजो आवतो! 2 काहाके आंय तुमाआं बाप्तिम देवोअ धुंद लागाड़ीत रोहो, मी एका वोरोअरी तुमाआं वेहेवालोअ गोठ कोअयीही, एताआ काजे के, तुमुहूं सोकी कुवांरीइ होस ख्रिस्ताआ सामने लेतावीत सेको. 3 पोन माहूं बिक लागेहे के, जेहेंकोइत हापे तियाआ हुशारी वाअहीं हव्वाहा ठोग्यी, तेहेंज कोइत तुमाआं विसार बिगड़ीत कोइत ख्रिस्ताआ पुरी आन सोकी भक्तीप रोत तुमू ने पुलवात जाअहूं जोवे. 4 जर एखू आवित बिहीरा ईसुउ परसार कोए, जियाआ परसार आमू नाहां कोअयू; ताहां तियाहा तुमू ठावकेज कोअहूं देतेहे, आन जो आत्मा आन जे हाजी बातमी पेल आमापरोत तुमुहूं जोड़्यीते, तियी रोत बिलकुल आलांग आत्मा आन बिहीरी हाजी बातमी तुमू स्विकारतेहे.

5 माहूं ते एहेलोह लागेहे के आंय कोड्ली बी गोठीमेहें तियांप रोत कमी कायनाहां, जियांहां माहें प्रेशित कोतेहे. 6 भले आंय गोगीइलोम ओजाण्यु होय पोन बुद्दीमेहें नाहां. आमू याहा हारेक गोठीमेहें किबी कोइत साफ देखाड़्योहो.

7 आंय तुमुहूं फुकटोमेहें देवोअ हाजी बातमी होंबलाड़्यी आन तुमू उसे ओवुहूं जोवे काजे, आंय सोताहा निसू ओवू, ताहां का ओं आंय गलत कोअयो के? 8 जाहां आंय तुमाआं विसमेहें सेवा कोअतुतो, ताहां बिहीरी मंडड़ी माहूं मोजरी आप्यी, एक पालल्ये आंय तियांहां लुटीत कोइत तुमुहूं मदत कोअतुतो. 9 आन जेहेलाम आंय तुमाअरी ओतू, आन माहूं गरज पोड़्यी, ताहां आंय कोडापोअ वोजू नाहां टाक्यु, काहाके जे पाही मकिदुनिया रोत आया, तियां माआं गरज पुरी कोअयी; जेहेंकोइत पेल तेहेंकोइत आगाड़ी बी आंय तुमापोअ वोजू ने टाको✝11:9 फिलि 4:15-18 10 जर मामेहें ख्रिस्ताआ खोरी गोठ ओय, ताहां अखाया देसोमेहें कोडो माहूं ए वोडाय कोइलाप रोत रुकीत नाहां सेकतो. 11 काहा? केहें आंय तुमापोअ मेर नाहां कोअतू तिहीं वाअहीं एहें कोहो के? आंय तुमापोअ मेर कोअहो ओं देवोहो मुंदू होय.

12 पोन जों आंय कोअहो, तों कोअयाज कोअहीं; याअ कोअते के जे बिहीरा प्रेशित होय, तियांहां वोडाय कोइलाअ कोड्लोज कारण ने आपो जे तियांआं कामोम आमाआं होस देखाइलोअ कोअताहा. 13 काहाके एहेले माअहें ठोग प्रेशित, धोकू देत काम कोअनारे, आन ख्रिस्ती प्रेशितोअ मोरो पोवनारे होय. 14 बोगलाअहूं सारकी गोठ कायनाहां, काहाके सैतान बी सोताहा उजला देवदुतोअ रुप लेत सेकेहे! 15 तिहीं वाअहीं जर सैतानोअ सेवक बी धर्मी सेवकोअ होस सोवांग कोअताहा, पोन यामेहें कीज वोडी गोठ कायनाहां, काहाके आखरीपोअ तियांआं कामोअ पुरमाणे तियांहां फल जोड़े.

प्रेशितोअ रुपोम पौलुसोअ दुख

16 आंय फाशुउ कोहो, के कोडो माहूं फोगू ने समजुहूं जोवे; जर तेहेलोहो समजे, ताहां फोगाआ होस माआं बी स्विकार कोआ, काहाके आंय बी थोड़ीक वोडाय कोइत सेको. 17 ओं आंय देवोअ पुरमाणे नाहां गोगतू, पोन यी वोडायीमेहें उदाबादीज फोगाआ होस गोगोहो. 18 जेहलेहे जाअखीलेहे माहें यी दुन्यादारीइ गोठीइ वोडाय कोअतेहें, तेहेलीही आंय बी कोअहीं. 19 तुमू तोम समजदार होय, तियाहा काजे खुसी वाअहीं फोगाआ गोठी उनाइत लेताहा. 20 काहाके जेहेलाम एखु तुमुहूं गुलाम कोइत लेहे, नेत लुटीत लेहे, नेत फांदाम फसाड़ेहे, नेत सोताहा वोडू बोणू जाहे, नेत कानफोट्याम देहे, ताहां तुमू सहन कोइत लेतेहे.

21 पोन माहूं कोताम लाज आवेहे के, जर एखु एखी गोठीपोअ वोडाय कोइलाअ हिम्मत मिकेहे— ताहां आंय फोगाआ होस कोहो— आंय बी तेहेंज कोइत वोडाय कोइलोअ हिम्मत कोअहो. 22 केहें ते इब्री होय? आंय बी होंव. केहें ते इस्राएली होय? आंय बी होंव. केहें ते अब्राहामोअ पोर्‍या होय? आंय बी होंव. 23 केहें ते ख्रिस्ताआ सेवक होय? आंय तोम फोगाआ होस कोहो– आंय तियांप रोत वादार हाजू सेवक होंव! आंय जुदी मेहेंनत कोअयीही; जाअखीलीही वारी जेलेम रोयू; माहूं जाअखीलीही वारी सापका खाअहूं पोड़्या; आन जास्ती वारी आंय मोतोअ आटालाम पोड़्यू.✝11:23 प्रेशित 16:23 24 पास वारी जाआं यहुद्याआं आथे एकोनशाड़ीस सापका खादा.✝11:24 कायदा 25:3 25 तीन वारी मी डेंगारा खादा; एक वारी माहूं डोणाट्यू; आन तीन वारी आंय बोठुहू ते जाहाज टुटी; आन एक रात आन एक दिही आंय दोर्‍यामेहें काड्यी. 26 आंय कायम धोकाम फिरतुतो; आन वोडा पुरोअ धोकाम, गुंडाआ धोकाम, माआं जातीवालाआं धोकाम, बिगर यहुदीइ धोकाम, होयरोअ धोकाम, रानोअ धोकाम, दोर्‍याअ धोकाम, लोफाट्या दोस्त्योअ धोकामेहें आंय रोयू. 27 आंय जास्ती मेहेंनत कोइत काम कोअयो, जाअखीलीही वारी जागताज रोअहूं पोड़्यो, जाअखीलीही वाआ फुकल्युन तिहील्यू रोयू, आन आंय जाअखीलीही वाआ तोपोम रोयू, आन उपासोम रोयू, आन हेलाम उगड़ाअलुज रोयू. 28 यीं गोठीइरीज बिहीरु दाबाव मोन्ज्ये आंय हारेक दिही मंडड़ीइ सिंता कोअहो. 29 जर एखु कमजोर ओवेहे, ताहां आंय बी कमजोर नाहां ओवतू के? आन जर एखु पापोम पोड़ेहे, ताहां माहूं खोत नाहां लागती के?

30 जर माहूं वोडाय कोइलीज ओय, ताहां माआं कमजोरीइ वोडाय कोअहीं. 31 प्रभु ईसुउ देव आन आब्हू जो हादाजलम धन्य होय, तियाहा मुंदू होय के आंय नाहां ठोगतु. 32 जेहेलाम आंय दमिश्क होयरोम ओतू, ताहां अरेतास राजाआ सिपाय माहूं तोइलो काजे दमिश्कवालाअ जागे आडवारीत ओतू. 33 पोन माहूं टोपलाम बोहाड़ीत गावोंअ हिंवेंए खिड़कीम रोत निसे उतारी देदू, आन तियाआ आथोम रोत आंय निहींटीत गोयू.✝11:33 प्रेशित 9:23-25