मार्क 10

सोडले ओवीइलोअ बाप्तिमेहें ईसुउ हिकवोण

1 फाश्यू ईसु तिहीं रोत उठीत यहुदीया हिवेंमेहें आन यारदेन खाडीइ तियी वोग आवयू. गर्दी फाश्यीइ तियाआ जागे टोलू वोल्यी, आन तो तियाआ रितीइ पुरमाणे तियांहां फाशुउ हिकवोण आपू वोल्यू.

2 ताहां कायदाआ मास्तरहों जे फरिसी तियाआ जागे आवित तियाहा पारजाणीइलोअ काजे तियाहा फुशो, "केहें ओं कायदाअ पुरमाणे बोराबर होय के माटी तियाआ लाडीही सोडे?"

3 ईसु तियांहां उत्तर आप्यो, "मोशे तुमुहूं कि आदेश आप्युतो?"

4 तियां कोयो, "मोशे सोड़सिट्टी लेखीइलोअ आन सोड़ीइलोअ आदेश आप्युहू." ✝10:4 निर्ग 24:1-4; मत्तय 5:31

5 ईसु तियांहां कोयो, "तुमाआं वातड़ा मोनोअ वाखरी तिये तुमाआं काजे ओ आदेश लेख्यू. 6 पोन वसनोमेहें लेख्योहो, कोलीइ सुरुवातीहीज रोत देवे माटी आन बोईं कोत तियांहां बोणायेहे.✝10:6 उत्प 1:27; 5:2 7 तियाहा काजे माअहुंउं तियाआ आयहीन आब्हाअहीं रोत आंगे ओत कोइत तियाआ लाडीइरी रोय, 8 आन तें बेनू एक जिव ओवे; तियाहा काजे तें ओमे बेन नाहां, पोन एक डिल होय. 9 तियाहा काजे जियांहां देवे जुड़्येहे, तियांहां माअहुंउं अलग ने कोअहूं जोवे,"

10 जाहां ते कोअमेहें गोया, ताहां सेला ईसुहू यी गोठीइ बाप्तिमेहें फाश्यो फुशो. 11 तिये तियांहां कोयो, "जो माटी तियाआ लाडीही सोड़ी देत बिहीरी बोईंइरी वेहवाल कोअहे, तो तियाआ पेल्लीइ लाडीइ विरुध्दामेहें सिनालो कोअहे; 12 आन जर बोयोंअ बी तियीइ माट्योहो सोड़ीत बिहीरा माट्योअरी वेहवाल कोअहे, ते बी सिनालो कोअहे." ✝10:12 मत्तय 5:32; 1 करिन्थ 7:10,11

ईसु हाना पोर्‍याहां आशिर्वाद आप्यू

13 ताहरेए माअहें पोर्‍याहां ईसुउ जागे लेतावे वोल्ये के तो तियांपोअ आथ मिकीत सेके, पोन सेला तियांहां बावराअया. 14 ओं पालित ईसुहू खोत लागी आन तिये तियांहां कोयो, "पोर्‍याहां माआं जागे आवुहूं द्या, आन तियांहां मा रुकहा, काहाके देवोअ राज एहेलाआं काजेज होये. 15 आंय तुमुहूं खोरीज कोहो के जो कोडो देवोअ राजोहो पोर्‍याअ होस स्विकार ने कोए, तों तिहींमेहें केदिहींज ने जात सेकनारो."✝10:15 मत्तय 18:3 16 आन तिये पोर्‍याहां बोदाम लेदे, आन तियांपोअ आथ मिकीत कोइत तियांहां आशिर्वाद आप्यू.

कुन्बी माहुंउं

17 जेहेलाम ईसु तिहीं रोत निहीत कोइत वाटे जातुतो, ताहरोअ एक माअहुंउं तियाआ जागे गुगदीइतोज आयो, आन तियाआ आगाड़ी मांड्या पोड़ीत कोइत तियाहा फुशो, "आखाम रोत हाजा गुरु, हादाजल्म्योंअ जिवन मिलवीलाअ काजे आंय कि कोओ?"

18 ईसु तियाहा कोयो, "तू माहूं आखाम रोत हाजू काहा कोहे? निस्त देवो सिवाय कोडोज आखाम रोत हाजो कायनाहां. 19 ताहूं आदेश ते मुंदू होये: ‘खुन मा कोअही, सिनालो मा कोअही, सोरी मा कोअही, ठोगोअ पुरावू मा देही, मा ठोगही, ताआ आयहीन आब्हाअ मानपान मिकजी.’"✝10:19 निर्ग 20:12-16; कायदा 5:16-20

20 तिये ईसुहू कोयो, "गुरु, हानू तोयोंअ आंय यां हुकुमोंहों मानतु आयुहू."

21 ईसु तियापोअ नजर टाकीत कोइत तियाहा मेर कोअयी, आन तियाहा कोयो, "तामेहें एकी गोठीइ कमी होय. जा, जों किबी ताआ होय, तियाहा वेसीत कोइत गोरब्योहों आपी दे, आन ताहूं होरगामेहें मालधन जोड़े, आन आवित कोइत माआं फासाड़ी साल." 22 यी गोठी वाअहीं तियाआ सेहरापोअ नाराजी आवित लागी, आन तो दुखी ओत कोइत जातु रोयू, काहाके तो जास्ती मालदार ओतू.

23 ईसु शारी मेरे पालीत कोइत तियाआ सेलाहां कोयो, "कुन्बीइ काजे देवोअ राजोम जाअलो केहेलोहो कठीण होय!"

24 सेला तियाआ गोठी वाअहीं बोगलाइत गोया. पोन ईसु तियांहां फाशुउ कोयो, "माआं पोर्‍या, तियाआ काजे देवोअ राजोम जाअलोअ केतोहो कठीण होय! 25 कुन्बीइ देवोअ राजोम जाअलो तिया रोत उटड़ाहा हुयीइ डुसाम सरकीइलो सोपो होय."

26 ते जाअखाज बोगलाइत कोइत तियां तियांआंज कोना वोल्या, "ताहरोअ कोडो वासाइत सेकेहे?"

27 ईसु तियांअहें पालीत कोइत कोयो, "ओं माअहूं वाअहीं नाहां ओत सेकतो, पोन देवो वाअहीं ओत सेकेहे; काहाके देवो वाअहीं आखोज ओत सेकेहे."

28 पेत्र तियांहां कोनु वोल्यू, "पाल आमू आखो बादो सोड़ीत कोइत ताआ फासाड़ी आयाहा."

29 ईसु कोयो, "आंय तुमुहूं खोरीज कोहो, एहेलोह कोडोज नाहां जो माआं हाजी बातमीइं काजे कोअ नेत पाव्हीइलाहां नेत आयहीन-आब्हाहा नेत बालबासाहां सोड़ी देदो ओय, 30 आन या‍ं सेलवार्‍याअ दिहोमेहें हौ पोट जोड़े, आन कोअ, पाव्हीइले आन आयहीन-आब्हू आन बालबासे आन खेतोमेहें, पोन तारास कोइत आन आवानारां दिहोम हादाजल्म्योंअ जिवन जोड़े. 31 पोन वारुज जोएं जे पेल्लेए होय, तें सेलवार्‍येए ओवे; आन जे सेलवार्‍येए होय, तें पेल्लेए ओवे."✝10:31 मत्तय 20:16; लुक 13:30

ईसु सोताआ मोतोअ बाप्ति मेहें तिसरी भविश्यवाणी कोअत्लू

32 ते येरुसालेमोमेहें जात्ला तेहेलामेहें वाटे ओता, आन ईसु तियांआं आगाड़ी आगाड़ी जातुतो, सेला काबराईत गोयाते आन जे तियाआ फासाड़ी फासाड़ी जाताते ते बित गोयाते. तेहेलाम तो फाशुउ तियां बारु सेलाहां आलांग लेत जात कोइत तियांहां ते गोठी कोतापू वोल्यू, जे तिया पोअ आवनारी ओती, 33 "पाला, आपू येरुसालेमोमेहें जाताहा, आन माहुंउं बेटुह्हू मुख्य पुंजाराआ आन कायदाआ मास्तरहोंअ आथोम तोइत आपाय, आन ते तियाहा दोशी ठरवे, आन बिगर यहुदी माअहोंओं आथोम होपी देय. 34 ते तियाआ मोज्या लेये, तियापोअ थुपे, आन तियाहा सापका मारु देये आन तियाहा माईंत टाकी देय, पोन तीन दिहोम तो जिवीत उठे."

याकोब आन योहानोअ रावणी

35 तेहेलाम जब्दीइ पोर्‍या याकोब आन योहान तियाआ जागे आवित कोइत कोयो, "गुरु, आमाआं इश्शा होय, के जो किबी आमू मागुहूं, तो तू आमाआं काजे कोअहूं जोवे."

36 ईसु तियांहां कोयो, "तुमाआं कि इश्शा होय के आंय तुमाआं काजे कोओ?"

37 तियां तियाहा कोयो, "आमुहूं ओं आपे के ताआ महिमामेहें आमामेर्‍युउ एक जोओं ताआ हाजाड़्यीइ वोले आन एक जोओं बांगाड़्यीइ वोल बोहे."

38 ईसु तियांहां कोयो, "तुमुहूं नाहां मुंदू के तुमू कि मागताहा? जो वाटकू आंय पीइहूं होय, केहें तुमू पीत सेकताहा? आन जो बाप्तिस्मा आंय लेएहूं होय, केहें तुमू लेत सेकताहा?"✝10:38 लुक 12:50

39 तियां ईसुहू कोयो, "आमा वाअहीं ओत सेकेहे." ईसु तियांहां कोयो, "जो वाटकू आंय पीइहूं होय, तुमू पीत सेकहा; आन जो बाप्तिस्मा आंय लेएहूं होय, तियाहा लेत सेकहा. 40 पोन देवे जियांआं काजे तियार कोअयुहू, तियांहां सोड़ीत कोइत बिहीरा कोडाहाज तियाआ हाजाड़्यी वोल आन तियाआ बांगाड़्यी वोल बोहाड़ीलोअ माआं काम कायनाहां."*10:40 नेते तियाआ हाजली वोल आन बांगाड़्यी वोल कोडाहा बोहाड़ीइलो माआं काम नाहां, पोन जियांआं काजे तियार कोआयुहू तियांआंज काजे होय.

41 ओं उनाइत कोइत तियां दोहू सेलाहां याकोब आन योहान पोअ खोत लागी. 42 ताहरुउ ईसु तियांहां आहने हादीत कोयो, "तुमुहूं मुंदू होय के जे बिगर यहुदीइ पुडारी समजीइताहा, ते तियांपोअ राज सालाड़ताहा; आन तियांमेर्‍येए जे वोडा होय, ते तियांपोअ आधिकार वापरीइताहा. 43 पोन तुमामेहें एहेलोहो कायनाहां, आन जो कोडो तुमामेहें वोडो बोणनारो ओय तों तुमाआं सेवक बोणुहूं जोवे;✝10:43 मत्तय 23:11; मार्क 9:35; लुक 22:26 44 आन जो कोडो तुमामेहें मुख्य बोणनारो ओय, तों आखाआज पावर बोणे. 45 काहाके माहुंउं बेटुह्हू याअकाजे नाहां आयू के, तियाआ सेवा कोअहूं जोवे, पोन याअकाजे आयुहू के सोताहा सेवा कोए, आन जाअखीलाहा जोओंअ सुटकाअ काजे तियाआ जिव आपित सेके."

आंद्ला बार्तीमायोहो ईसुउ नजरदान

46 ते यरीहो गांवोंमेहें आया, ताहां ईसु आन तियाआ सेला, आन एक वोडी गोरदी यरीहोम रोत निहींतीते, ताहां तिमायाआ पोर्‍यू बार्तीमय, एक आंदलु भिखारी, सडकेए मेरे बोठुतो. 47 तो ओं उनाइत कोइत के ईसु नासरेथकर होय, आअड़ी आअड़ीइ कोनु वोल्यू, "ए दाविदोअ पोर्‍या, ईसु मा पोअ दया कोओ!"

48 जाअखीलेहे जोएं तियाहा बावराअये के ठावकुज रोय, पोन तो जाअखुज आअड़ू वोल्यू, "ए दाविदोअ पोर्‍या, मापोअ दया कोअ."

49 ताहरुउ ईसु उबू रोयू आन कोयो, "तियाहा हादा."

ताहरेए माअहें तिया आंदलाहा हादीत कोइत कोयो, "हिम्मत राख! उठ! ईसु ताहूं हादेहे."

50 तो तियाआ साअको टाकीत कोइत मामार उठीत उबू रोयू, आन ईसुउ जागे आयू.

51 ईसु तियाहा कोयो, "ताआ कि इश्शा होय के आंय ताआ काजे कोअ?"

आंदले तियाहा कोयो, "गुरु, आंय फाशुउ देखीत सेको."

52 ईसु तियाहा कोयो, "जातु रो, ताआ विश्वासे ताहूं हाजू कोइ देदुहू."

तो ताब्बुड़ पालु वोल्यू, आन सडके पोअ ईसुउ फासाड़ी जानु वोल्यू.