मार्क 5

ईसु पुते लागला माहुंहूं हुदारत्लु

1 ईसु आन तियाआ सेला तालावोअ तियी वोगेहे गेरासेनेवालाआं मुलखो मेहें पोत्या. 2 आन जेहलामेहें ईसु नावड़ा मेहें रोत उतर्‍यू ताहां लगेज एक माहुंउं जियामेहें खाराब आत्मा ओती, तो माहणोमेहें रोत निहीत तियाहा मिल्यो. 3 तो माहणोअहीं रोतोतो आन कोडो तियाहा हाकले वाअहीं बी ने बांदीत सेकतोतो, 4 काहाके वारुज वाआ तियाआ आथेन गुडा हाकले वाअहीं बांद्याते, पोन तिये हाकलेहे बी तोड़ी देदीते, आन बेड़ीइ बोटकान- बोटका कोइ देदाते, आन तियाहा गाठाड़ीलोअ सेक्ती कोडाजमेहें ने ओती. 5 तो तालताल रातेन दिही माहणोमेहें आन डोगो मेहें आअड़ीतो फिरतोतो, आन तिया तियाआज डोणो वाअहीं वाडीत लेतोतो.

6 तो ईसुहू देखीत सेटेज रोत गुगद्‍यू, आन तियाआ पागे पोड़्यु. 7 आन जोरेबी आअड़ीत कोयो, "ईसु, आखाम रोत वोडा देवोअ बेटाह्हा, माअरी ताआ कि काम? आंय ताहूं देवोअ शप्पत आपीत कोहो, के माहूं डोंड मा आपीही." 8 काहाके ईसु तियाहा कोयोतो, "ए खाराब आत्मा, या माअहूंमेहें रोत निहीत आव."

9 ईसु तियाहा फुशो, "ताआ कि नाव होय?"

तिये माअहें कोयो, "माआं नाव सैन्य होय; काहाके आमू जाअखा होय." 10 आन तिये ईसुहू खुब रावणी कोअयी, "आमुहूं या मुलखोमेहें रोत बाअथे मा मोकलिही."

11 तिहीं डोगो पोअ भुंडड़ाआ एक वोडू गोवारु सोरतू तो. 12 आन तियां खाराब आत्मा ईसुहू रावणी कोइत कोयो, "आमुहूं फोलां भुंडड़ामेहें मोकली दे, के आमू तियांआं मांयते जांव." 13 ताहां ईसु तियांहां हुकूम आप्यू आन खाराब आत्में निहीत भुंडड़ामेहें फोहीत गोये आन तो गोवारु एक आंदास बेन हाजारोअ ओतू, टेकोपोअ रोत तालावोम पोड़्ये आन बुडीत मोये.

14 आन भुंडड़ाआ सारवाली गुगदिइताज सेरोमेहें आन गांवोंम खबर कोयी, आन जो ओवल्यो तो, माअहें तियाहा पाले आवये. 15 ताहरेए ते ईसुउ जागे आये, आन तिया पुतवाअला माहूंमेहें जियामेहें पुतोंअ टोलू ओतू तियाहा आंगड़े पोवल्ये आन सुद्दीपोअ बोठलाहा पालीत कोइत बित गोये. 16 आन देखनारे माअहें तिया पुतवाअलाआ जियामेहें पुतोंअ टोलू ओतू, आन भुंडड़ाआ पुरी हालत तियांहां कोत आप्यी.

17 ताहां ते ईसुहू रावणी कोइत कोने वोल्ये, के आमांआं मुलखोमेहें रोत जातु रो.

18 जेहेलाम ईसु नावड़ा मेहें सोड़ू वोल्यू, ताहां तो पुतवाअलो जिया मेहें पेल पुत ओतू, तियाहा रावणी कोउ वोल्यू, "माहूं बी ताआ आरीज आवुहूं दे."

19 पोन ईसु तियाहा रोअहूं दे कोयो, तेबी तिये तियाहा कोयो, "ताआ कोअ जात कोइत ताआ कोर्‍याआ माअहुंहूं को, के तापोअ दया कोइत मालख्ये ताआ काजे केतोहो वोडो काम कोअयोहो."

20 ताहां तो जात कोइत दकापलीसोअ*5:20 दकापलीस दोहो सेरोअ इलाखू माअहुंहूं यी गोठीइ परसार कोउ वोल्यू, के ईसु माआं काजे केतेहे वोडे काम कोअये; आखे बोगलाअतेते.

याईरोअ मोल्यी पोर्‍यी आन एक मांदवाड़्यी बाय

21 जेहेलाम ईसु फाशुउ नावड़ामेहें एकी तोड़ गोयू, ताहां एक वोडू माअहुंउं गोवारु तियाआ जागे टोलू वोलीत गोयू; आन तो तालावोअ मेरेज पोअ ओतू. 22 आन याईर नावोअ आराधनालयोअ एक पुडारी आवयू, आन ईसुहू पालीत, तियाआ पागे पोड़्यु. 23 आन तिये ओं कोत कोइत जाअखीलीही रावणी कोअयी, "माआं हानीइली बेटिह्ही मोअहूं कोअहे: तू आवित तियी पोअ आथ मिक, के ते हाजी ओवीत जिवती रोय."

24 ताहां ईसु तियाअरी गोयू; आन माअहुंउं वोडू गोवारु ईसुउ फाटी गोयी, एतीही गर्दी के माअहें तिया पोअ जाआं उठ्लीत पोड़तेते.

25 आन एक बाय ओती, जियीही बारा वोरह्योअ रक्त पोड़ीइलोअ बिमारी ओती. 26 तियी खुब दुख वेठ्यो आन जाअखिलाहा डाक्‍टरोअहीं ईलाज कोआड़्यू. तियी आखा पोशा खरसीत टाक्या, तेबी किज फायदू ने ओवू, पोन जाअखीज बिमार ओत गोयी. 27 ते ईसुउ बाप्तिमेहें सर्सा उनाअयी, तियाहा काजे गोरदीमेहें तियाआ फासाड़ी रोत आयी, आन तियाआ आंगड़ाहा आथलीत लेदो, 28 काहाके ते तियी-तियीइज कोतीते, "जर आंय तियाआ आंगड़ाहा एतीज बी आथलीत लेहीं, तेबी हाजी ओत जाहीं."

29 आन ताबुड़ तियीइ रक्त वोहीइलाअ बिमारी हाजी ओत गोयी; आन तियीही सोताआ डिलोमेहें जाआंत गोयो, के आंय तियी बिमारीमेहें रोत हाजी ओत गोयीही. 30 ईसु ताबुड़ तिया तियाआज जाइंत लेदो, के मामेहें रोत सेक्ती निहींयीही, आन गोरदी मेहें फासाड़ी वोलीत फुशो, "माआं आंगड़ाहा कोडे आथल्यो?"

31 तियाआ सेला तियाहा कोयो, "ताहूं देखाअहे, के माअहें तापोअ उठते पोड़तेहे, आन तू कोहे; के माहूं कोडे आथल्यू?"

32 पोन ईसु शारी वोगेहे पालतूज रोयू के कोडे एहलोहो काम कोअयोहो. 33 ताहां ते बाय ओं जाइंत, के तियीइरी कि ओवयोहो, बिती बिती आन कापती कापती आयी, आन तियाआ पागे पोड़ीत, तियाहा खोरो कोत देदो. 34 ईसु तियीही कोयो, "माआं बेटी, ताआ विश्वासे ताहूं हुदरावयीही: होकेहे जा, आन ताआ यी बिमारीम रोत वासाइत रोजी."

35 ईसु जेहेलाम ओं कोतूतो, ताहां आराधनालयोअ पुढार्‍योअ कोर्‍येए माअहें आवित कोयो, "ताआ ते बेटिह्ही ते मोइत गोयी; ओमे गुरुहू काहा तारास देहे?" 36 जे गोठ ते कोतेते, तियांअहें ईसु दिहान नाहां देदी, पोन पोन्साआ पुढार्‍योहो कोयो, "मा बिही; निस्तु भरिवसू मिक." 37 आन तिये पेत्र आन याकोब आन याकोबोअ पाही योहान यां वासी, बिहीरा कोडाहा तियाअरी ने आवुहूं देदा. 38 आन आराधनालयोअ पुडारी याइरोअ कोअ पोत्या, ताहां ईसु माअहुंहूं कि कोएन किन्ने एहेलेहे जाअखीलेहे रोड़त्लाहा आन आअड़ीइत्लाहा देख्ये. 39 ताहां तिये मांयते जात कोइत तियांहां कोयो, "ए कापाली काहा कोअतेहे? काहा रोडतेहे तुमू? पोर्‍यी नाहां मोअयी, पोन हुवेहे."

40 ते तियांअहें ओंहये, पोन तिये आखाहा काडीत कोइत पोर्‍यीइ आयहीन आब्हाहा आन तियाआ सेलाहां लेत कोइत, मांयते पोर्‍यीही लोटाडीत मिकल्यी तिहीं गोयू. 41 आन पोर्‍यीइ आथ तोइत तियीही कोयो, "तलीता कूमी," मोन्ज्ये "ए पोर्‍यी, आंय ताहूं कोहो, उठ."

42 आन पोर्‍यी ताबुड़ उठीत साली फिरी वोल्यी; काहाके ते बार वोरह्योंअ ओती. यी गोठी वाअहीं तें माअहें बोगलाइत गोये. 43 पोन ईसु तियांहां कड़क शब्दाम कोयो के, ए गोठ कोडाहाज मा कोहा, आन कोयो, "यिही कि तेबी खायतेहें काजे आपा."