मार्क 3

उगाअला आथोवालो माहुंउं

1 ईसु फाशुउ आराधनालयोमेहें गोयू, तिहीं एक माहुंउं ओतो जियाआ आथ लखवाअ बिमारी वाअहीं उगात गोयुतो. 2 थोड़हा तियापोअ आरोप लागाड़ीइलोअ कोअते तो आरामोअ दिही तियाहा हुदारेहे के नाहां तों पालीइलोअ काजे निकाइत बोठाते. 3 ईसु तिया उगाअला आथोवाला माहुंहूं कोयो, "इंहीं आखाआ सामने उबू रो." 4 आन तिये तियांहां कोयो, "आरामोअ दिहोअ दिही कायदाआ पुरमाणे हाजो कोइलोअ ठीक होय के, बाक्तो कोइलो? जिव वासाडीलोअ के माइलोअ ठीक होय? पोन ते ठावकाज रोया."

5 ताहां ईसु तियांआं कठीण मोनोअ वाखरी दुखी ओत कोइत तियांहां खिजवाअली नजरे वाअहीं सारी सोमकीर पाल्यो, आन तिया माहुंहूं कोयो, "ताआ आथ नांबू कोअ." तिये आथ नांबू कोअयू, आन तियाआ आथ पेल्लूउ ओतु तेहेलुज हुदरीत गोयू. 6 ताहां कायदाअ मास्तरहों जे फरिसी बारथे जात कोइत ईसुउ विरुध्दाम हेरोदोअ पार्ठीइ माअहोंहों जात मिल्या आन तियाहा कि कोइत आरवीइलोअ ते कदर काडा वोल्या.

तालावोअ मेरे गर्दी

7 ईसु तियाआ सेलांअरी तालावोअ जागे गोयू, आन गालील आन यहुदीयाअ मुलखो मेहें रोत एक वोडी गर्दी तियाआ फासाड़ी आवयी, 8 येरुसालेम रोत इदुमिया भाग, यारदेन खाडीइ तियी वोलेहे रोत, आन सुर आन सिदोनोअ आहने-पाहनेवाला भागोम रोत ईसु वोडे वोडे कामे कोअत्लू पो एहेलोह उनाइत कोइत आवये. 9 गोरदी वाअहीं दाबाअहूं ने जोवे काजे तियाआ सेलाहां नावड़ो तियार मिके तेहें कोयो. 10 काहाके तिये जाअखीलाहा माअहोंहों हुदार्‍येते, तियाहा काजे जेते बी रोगो वाले माअहें ओते तें तियाहा आथ लागाड़ीइलो कोअते तियापोअ आवित ठेपलाअतेते. 11 खाराब आत्में बी जेहेलाम तियाहा देखतेते, ताहां तियाआ सामने आवित पोड़तेते, आन किगलीत कोइत कोतेते के "तू देवोअ बेटुह्हू होय!"

12 पोन ईसु तियां खाराब आत्माहां तो कोडू होय तो कोडाहाज ने कोअहूं जोवे तियाहा काजे कड़क आदेश आप्यू.

ईसुउ बारा सेलाहां निवड़ीइलोअ

13 ताहरुउ ईसु डोगो पोअ सोड़्यू आन तियाहा जोवताते एहेलाहा जे सेला ओता, तियांहां तिये तियाआ जागे हाद्या आन ते तियाआ जागे आवया. 14 ताहां तिये बारा जोओंहों निवड़्या, तिये तियांहां प्रेशित एहें कोत नाव आप्यो, "आंय तुमुहूं एताआ काजे निवड़्याहा के तुमू माअरी रोअहूं जोवे, आन आंय तुमुहूं बिहीरी जागे परसार कोए तेहें काजे मोकलीत सेको, 15 आन तुमापोअ पुते काडीइलोअ आधिकार रोअहूं जोवे."

16 ए बारा सेला तिये निवड़्या: ईसु शिमोन याअ नाव पेत्र मिक्यो. 17 जब्दीइ बेटाह्हा याकोब आन तियाआ पाही योहान, ईसु तियांआं नाव बोआनर्गेस मिक्यो मोन्ज्ये गाजनाराअ पोर्‍या एहेलोह तियाआ अर्थ बोणेहे. 18 आंद्रिया, फिलीप, बार्थलमय, मत्तय, थोमा, आल्फेयोअ बेटुह्हू याकोब, तद्दय, शिमोन कनानी, 19 आन ईसुहू तोइत आपनारु यहुदा इस्कार्योत.

ईसु आन बालजाबुल

20 ताहां ईसु कोअ आयू. फाश्यीइ बी तेहेलीज गर्दी टोलू वोल्यी आन तियांहां रोटू खाअलोअ बी वेल ने जोड़्यी. 21 तियाआ कुटूंबामेएं माअहें याअ बाप्तिम उनाअये ताहां, तियाहा तोइत आने गोये, काहाके माअहें तियाआ नाव पाड़तेते के, "ओ गांडू बोणीत गोयुहू!"

22 येरुसालेम रोत आवनारा थोड़ाक कायदाअ मास्तर कोताते के, "यामेहें बालजाबुल*3:22 बालजाबुल पुतोंअ आधिकारी होय! आन तिया पुतोअ आधिकार्‍योअ आधारो वाअहीं ओ पुते काड्त्लू."

23 ताहां तियांहां आहने हादीत कोइत काईंइं आधारो वाअहीं कोनु वोल्‍यू: "सैतान सैतानोहोंज केहें कोइत काडीत सेकेहे? 24 जर तिया-तियाआज राजो मेहें भाग पोड़ीत जाय ताहां तो राज नाहां टिकीत सेकतो. 25 एखा कुटुंबामेहें सुलाईत कोइत बेन भाग पोड़ीत गोयाय तो कोअ बी ने टिकीत सेकत्लो. 26 तियाहा काजे जर सैतान सोताआज विरुद्ध कोउ वोले ताहां तो नाहां टिकीत सेकतु, नेत तियाआ ते आखरी ओत जाय."

27 "जाअहूं जाआं तिया ताकतवान माट्योहो ने बांदे, ताअहूं जाआं तियाआ कोअमेर्‍युउ माल लुटीत ने सेकाय, पेल तिया ताकतवान माट्‍योहो बांदुहूं जोवे ताहांज तियाआ कोओहो लुटीत सेकाय. 28 आंय तुमुहूं खोरीज कोहो के, माअहोंअ गुनाआं आन तियां कोअल्‍यी देवोअ निंदाआ माफी ओत जाय. 29 पोन जो कोडो पवित्र आत्माआं विरुद्दाम निंदा कोए तियाहा केदिहींज माफी ने जोड़े आन तो हादाजल्म्योंअ गुनाआं दोशी ठरे." 30 ईसु एहें कोयो काहाके, थोड़हे माअहें कोतेते के, "यामेहें खाराब आत्मा होय."

ईसुउ आयही आन पाही

31 ताहां ईसुउ आयहीन पाहीनेहें आये, आन बारथे उबे रोत कोइत तियाहा हादू मोकल्‍यू. 32 ईसुउ मेरे-मेरे माअहुंउं गर्दी बोहीत रोयीते, आन तियां तियाहा कोयो, "ताआ आयहीन ताआ पाव्हीइले नेहें ताहूं बारथे वाट जोवेतेहे."

33 तिये उत्तर आप्यो, "माआं आयही आन माआं पाव्हीइले कोडे होय?" 34 ताहां तो तियाआ मेरे-मेरे बोठ्ला माअहोंअहें पालीत कोइत कोयो, "पाला, माआं आयहीन माआं पाव्हीइले एंएं होय! 35 जें कोडे देवोअ इश्शाआ परमाणे सालतेय, तेंज माआं पाव्हीइले आन आयही होय."