1 जाहां आरामोअ दिही सेलाइत गोयू, ताहां मरिया मग्दालिनी, आन याकोबोअ आयही मरिया आन सलोमी यीं ईसुउ डिलोपोअ हारीलोअ काजे मासालाआ वस्तु आन हाजो गुंदाअनारो तेल वेसातो लेतावयी. 2 आठीवड़ाआ पेल्‍लेए दिहे वेगीइ वेले, दिही उगताअरीही, ते माहणोअहीं आवयी. 3 आन तियीं तियींइज गोठी कोअतीते, "आपाअ काजे माहणोअ दोओपोर्‍यूउ डोण कोडो होरकावे?" 4 जेहेलाम तियीं उसे नजर टाकीत पाल्‍यो, ताहां माहणोपोऱ्युउ डोण होरकावल्‍यूज देख्यू, तो जुदू वोडू ओतू. 5 माहणोमेहें मांयते जात कोइत तियीं एका जुवानोहों पांडो आंगड़ो पेवित कोइत हाजाड़ीइ वोलेहे बोहीत रोल्‍यू देख्‍यू, आन जुदी बोगलात गोयी.

6 तिये तियींहीं कोयो, "काबराअहा मा, माहूं मुंदू होय के तुमू नासरेथवाला ईसुहू होदतिही, जियाहा क्रुस खांबो पोअ टांग्यूतो, तो जिवित उठ्युहू, तो इंहीं कायनाहां; पाला, ओज तो जागू होय, जिहीं तियां तियाहा मिक्युतो. 7 पोन तुमू जावा, आन तियाआ सेलाहां आन पेत्राहा कोवा के तो तुमारोत पेल गालील मुलखोमेहें जाय. जेहलोहो तिये तुमुहूं कोयोतो, तुमू तियाहा तिहींज देखहा."✝16:7 मत्तय 26:32; मार्क 14:28

8 आन ते माहणोअहीं रोत निहीत गोयी. काहाके ते काबराईत गोयीते आन बियीते आन तियीं कोडाहा किज ने कोयो, काहाके ते बियीते.

9 आठीवड़ाआ पेल्लेए दिहे रविवारोअ दिही वेगर्‍यूउ ईसु मोतोमेहें रोत जिवित उठ्‍यू, ताहां तो पेल मरिया मग्दालिनीहीं देखाअयू, जियीमेहें रोत तिये हांत पुते काड्येते. 10 तियी ईसुउ हात्योहों जात कोइत खबर आप्‍यी. जे विखे बोठाते आन रोडतेते. 11 आन जेहेलाम तियीइ गोठ ते उनाअये के ईसु जिवतु होय, आन तियी तियाहा देखल्‍यू, ताहां तियांहां तियीइ गोठी पोअ भरिवसू ने ओवू.

12 फाशुउ ईसु बिहीरा वेहोमेहें देखाअयू, तेहेलाम तियांमेर्‍याअ बेन सेला गांवोंअहें जाताते. 13 ते फाशा फिरीत आवया आन खबर आप्यी, पोन तियांपोअ बी तें विश्वास ने कोअयू.

14 आखाआ फासाड़ी, ईसु तियां ईग्यार सेलाहां बी जेहेलाम ते रोटू खाना बोठाते तेहेलाम देखाअयू. आन तो तियांहां बावराअयू, काहाके जियां तियाहा मोतो मेहें रोत जिवीत उठल्‍याहा देख्यूतो, तियाआ गोठी पोअ बी तियांहां भरिवसू ने ओतू आन तियांआं मोन वातड़ो ओत गोयोतो. 15 तिये तियांहां कोयो, "आखी दुन्यामेहें जात कोइत कोली मेहें रोनारा आखा माअहोंहों हाजी बातमीइं परसार कोआ.✝16:15 प्रेशित 1:8 16 जों भरिवसू कोए आन बाप्तिस्मा लेय तोज वासाय, पोन जों भरिवसू ने कोए तों दोशी ठरे; 17 भरिवसू कोअनारा मेहें ए निशाणी रोय, के तें माआं नावम पुते काडे, नोवी-नोवी बाशा गोगे, 18 तें हापोहो विसीत लेय, आन केहेलोह बी जेहर पीत लेय, तेबी तियांआं कीज नुकसान ने ओवे; तें मांदवाड़्यां पोअ आथ मिके, ताहां मांदवाड़्ये हुदरीत जाय."

19 मालिख ईसु तियाअरी गोठी कोअयी तिहीं रोत तो होरगाम विसाइत गोयू. आन देवोअ हाजाड़ीइ वोलेहे जात बोहीत गोयू.✝16:19 प्रेशित 1:9-11 20 आन तियां जात कोइत आखी जागे परसार कोअयू, आन मालिख तियांअरी काम कोअतू रोयू, आन तियीं निशाणी वाअहीं जे तियांअरी ओवतीते तियीं वाअहीं वसनोहों पाक्कू कोअतू रोयू.