Marcos 5

ईसु पुते लागला माहुंहूं हुदारत्लु

1 ईसु आन तियाआ सेला तालावोअ तियी वोगेहे गेरासेनेवालाआं मुलखो मेहें पोत्या. 2 आन जेहलामेहें ईसु नावड़ा मेहें रोत उतर्‍यू ताहां लगेज एक माहुंउं जियामेहें खाराब आत्मा ओती, तो माहणोमेहें रोत निहीत तियाहा मिल्यो. 3 तो माहणोअहीं रोतोतो आन कोडो तियाहा हाकले वाअहीं बी ने बांदीत सेकतोतो, 4 काहाके वारुज वाआ तियाआ आथेन गुडा हाकले वाअहीं बांद्याते, पोन तिये हाकलेहे बी तोड़ी देदीते, आन बेड़ीइ बोटकान- बोटका कोइ देदाते, आन तियाहा गाठाड़ीलोअ सेक्ती कोडाजमेहें ने ओती. 5 तो तालताल रातेन दिही माहणोमेहें आन डोगो मेहें आअड़ीतो फिरतोतो, आन तिया तियाआज डोणो वाअहीं वाडीत लेतोतो.

6 तो ईसुहू देखीत सेटेज रोत गुगद्‍यू, आन तियाआ पागे पोड़्यु. 7 आन जोरेबी आअड़ीत कोयो, "ईसु, आखाम रोत वोडा देवोअ बेटाह्हा, माअरी ताआ कि काम? आंय ताहूं देवोअ शप्पत आपीत कोहो, के माहूं डोंड मा आपीही." 8 काहाके ईसु तियाहा कोयोतो, "ए खाराब आत्मा, या माअहूंमेहें रोत निहीत आव."

9 ईसु तियाहा फुशो, "ताआ कि नाव होय?"

तिये माअहें कोयो, "माआं नाव सैन्य होय; काहाके आमू जाअखा होय." 10 आन तिये ईसुहू खुब रावणी कोअयी, "आमुहूं या मुलखोमेहें रोत बाअथे मा मोकलिही."

11 तिहीं डोगो पोअ भुंडड़ाआ एक वोडू गोवारु सोरतू तो. 12 आन तियां खाराब आत्मा ईसुहू रावणी कोइत कोयो, "आमुहूं फोलां भुंडड़ामेहें मोकली दे, के आमू तियांआं मांयते जांव." 13 ताहां ईसु तियांहां हुकूम आप्यू आन खाराब आत्में निहीत भुंडड़ामेहें फोहीत गोये आन तो गोवारु एक आंदास बेन हाजारोअ ओतू, टेकोपोअ रोत तालावोम पोड़्ये आन बुडीत मोये.

14 आन भुंडड़ाआ सारवाली गुगदिइताज सेरोमेहें आन गांवोंम खबर कोयी, आन जो ओवल्यो तो, माअहें तियाहा पाले आवये.