1 Coríntios 9

တမန်တော်ရဲ့ ရပိုင်ခွမ့်န တာဝန်လေကြောန်း

1 ငါဟှာ လွတ်လပ်ဟှူလူဖြစ်ဟှယ် မှုဟှလော။ တမန်တော်တယော့-က်ဖြစ်ဟှယ် မှုဟှလော။ နို့လေရဲ့ ယေရှုခရစ်ဟှို ဗြင်ရဘီ မှုဟှလော။ နန်းနို့လေဟှာ သခင်ဘုရားရဲ့ မှုတော်ဟှို ငါစေခံလောက်ဆောန်ဇာဟှနေဘီး ရလာဟှူသီးပွမ့်လေ မှုဟှလော။ 2 ငါဟှာ တခြားသူလေထတ်မာ တမန်တော်ဖြစ်ဘဲနေဟှူလည်းဘဲ့ နန်းနို့လေတွပ် တမန်တော်ဖြစ်ဟှယ်။ ဖြားဖြစ်ကြောန့်နူးဆိုဟှာ ငါဟှာ သခင်ဘုရားရဲ့ တမန်တော်ဖြစ်ဟှယ် ဆိုဇာဟှို နန်းနို့လေဟှာ ဒဗဲ့တော်ဖြစ်ဟှူဇာအားဖြင့် ငါ့ဟှို တံဆိခတ်ဂေ့ဟှယ်။

3 ငါ့ဟှို စစ်ဆေးဝေဖန်ဟှူသူလေဟှို အယ်မျိုး ငါဖြေရှင်းပြောဆိုဟှယ်။ 4 နို့လေရဲ့ လောက်ဆောန်မှုအားဖြင့် နို့လေမာ စားသော့-က်ပိုင်ခွမ့် မှေ့ဟှလော။ 5 နို့လေဟှာ ကေဖန သခင်ဘုရားရဲ့ ညီတော်လေ တခြားတမန်တော်လေဟှူမျိုး နို့လေခရီးထွပ်ဟှူ ခီမာ ယောင်ကြည်သူညီမဖြစ်ဟှူ မယားဟှို ခေါ်ဆောန်ပိုင်ခွမ့် မှေ့ဟှလော။ 6 ငါန ဗာနဗဟှဘဲ့ လောက်မလောက်ဘဲ နေရဟှူခွမ့်မှေ့ဟှ ဆိုဘီး ပြောရလော။ 7 ဖယ်စစ်သားလေဟှ ကိုယ်စရိနကိုယ် စစ်မှုထမ်းရကြောန့်နူး။ ဖယ်သူဟှ ကိုယ်စိုက်ဟှားဟှူ စဗျစ်ခြံဟှစဗျစ်သီးဟှို မစားဘဲနေနူး။ ဖယ်သိုးထီးမားလေဟှာ ကိုယ်ထီးဟှူ သိုးလေဟှ သိုးနို့ဟှို မသောင်းဆောန်ဘဲနေဂေ့နူး။

8 ငါဟှာ အယ်ကြောန်းရာဟှို လူ့သဘောန ပြောနေဟှူဇာလော။ ပညတ်တရားဟှလည်း အယ်မျိုးပြောဟှားဟှယ် မှုဟှလော။ 9 ✝၉.၉ ၁ တိ ၅.၁၈မောရှေရဲ့ ပညတ္တိကျမ်းဟှ "ဗားနန်းဟှူ နွားရဲ့ဇပ်ပေါ့-က်ဟှို ချောက်တီးန" ဆိုဘီး လာဟှယ်။ အယ်မျိုး မိန့်တော်မူဟှူဇာဟှ ဘုရားသခင်ဟှာ နွားဟှိုဘဲ့ ပြောရှင်ဇာလော။ 10 အယ်မျိုးမှုဘဲနေဟှာ နို့လေတွပ်ဘဲ့ မိန့်တော်မူဟှားဇာလော။ တကယ်ဘဲ့ နို့လေတွပ် ရေးဟှားဇာ ဖြစ်ဟှယ်။ ဖြားဖြစ်ကြောန့်နူးဆိုဟှာ လယ်ထွန်မားန ရိသီးမားလေဟှာ ကိုယ့်ရဲ့ ရထိုက်ဟှူ လောက်ခဟှို မျှော်လင့်ဘီးဟှာ လောက်ဆောန်ဂေ့ဇာ ဖြစ်ဟှယ်။ 11 ✝၉.၁၁ ရော ၁၅.၂၇နို့လေဟှာ ဝိညာဉ်ပိုင်းဆိုင်ရာ မျိုးစေ့အားဖြင့် နန်းနို့ဟှို စိုက်ပျိုးဘီးဟှာ နန်းနို့နားဟှ ရောက်ပိုင်းဆိုင်ရာလေဟှို ရိသီးဟှူဇာဟှာ လွန်ရာက္လလော။ 12 နန်းနို့လေနားမာ တခြားသူလေ ခံယူပိုင်ခွမ့်ရှိဟှယ် ဆိုဟှာ နို့လေဟှာ ပိုဘီး ခံယူခွမ့်ရှိဟှယ် မှုဟှလော။

အယ်ဘေမဲ့လည်း နို့လေဟှာ အယ်မူခွမ့်ရေးဟှို ယူဂေ့ဟှ။ ခရစ်တော်ရဲ့ ဒန်းကောန်းဟှို ဆီးတားဖြစ်ဘဲအောန် တွိကြောင်ရဟှူ ခတ်ခဲလေဟှို ရာရာတိုင်းမာ သီးခံဘီး လောက်ဆောန်ဂေ့ဟှယ်။ 13 ဗိမာန်တော်ရဲ့ မှုကိစလေဟှို လောက်ဆောန်ဟှူ သူလေဟှာ ဗိမာန်တော်န ဆိုင်ဟှူဇာလေဟှို စားရဂေ့ဘီး၊ ယဇ်ပလ္လင်နှိုက် ထမ်းဆောန်ဟှူ သူလေဟှလည်း ယဇ်ပလ္လင်န ဆိုင်ဟှူဇာလေဟှို မျှဝီခံစားခွမ့် ရှိဟှယ် ဆိုဇာ နန်းနို့လေ သိဂေ့ဟှလော။ 14 ✝၉.၁၄ မ ၁၀.၁၀; လု ၁၀.၇အယ်မျိုးဘဲ့ ဒန်းကောန်းဟှို ဟောပြောသူလေလည်း ဒန်းကောန်းအားဖြင့် သတ်မွီးရမယ် ဆိုဘီး သခင်ဘုရား မိန့်မှာတော်မူဟှယ်။

15 အယ်ဘေမဲ့ နို့လေဟှာ အယ်ခွမ့်ရေးလေဟှို သောင်းဂေ့ဟှ။ အယ်မျိုးခွမ့်ဟှို တောန်းဆိုရှင်ကြောန့် အယ်စာဟှို ရေးဟှူဇာ မှုဟှ။ ဖြားဖြစ်ကြောန့်နူးဆိုဟှာ ငါ့ရဲ့ ဝါကြွားဇာကြောန်းဟှို သူများလေဟှ ချည်းနှီးဖြစ်စေရှင်းထတ် သေဟှားဇာဘဲ့ ပိုကောန်းဟှယ်! 16 ငါဟှာ ဒန်းကောန်းဟှို ဟောပြောရောင်မျှန ဝါကြွားဇာကြောန်း မှေ့သေးဟှ။ ဖြားဖြစ်ကြောန့်နူးဆိုဟှာ ဟောပြောဘဲန နေနိုင်ဟှ။ အယ်ဒန်းကောန်းဟှို ဟောပြောဘဲန နေမယ် ဆိုဟှာ အမင်္ဂလာရှိဟှယ်! 17 တကယ်ကြောန့် ငါဟှာ အယ်မှုတော်ဟှို ငါ့ရဲ့ ဆန္ဒတိုင်း ဆောန်ရွပ်မယ် ဆိုဟှာ ငါ့တွပ် ဆုလာဘ် ရှိဟှယ်။ အယ်ဘေမဲ့ ငါ့ရဲ့ ဆန္ဒတိုင်းမှုဘဲ ဆိုဟှာလည်း အယ်စီမံခန့်ခွဲမှုဟှို ငါ့နှိုက် ယောင်ကြည် အပ်ဟှားဘီး ဖြစ်ဟှယ်။ 18 အယ်မျိုးဆိုဟှာ ငါ့တွပ် ဖြားကျိုးရှိနူး။ ငါခံစားရဟှူ ကျိုးဟှ ဒန်းကောန်းဟှို ခယူဘဲ ဟောပြောဟှူ ခွမ့်န အယ်မျိုး ဟောပြောဟှို့တွပ် ရပိုင်ခွမ့်လေဟှို သောင်းပြုဘဲန နေနိုင်ခွမ့်လေဘဲ့ ဖြစ်ဟှယ်။

19 ငါဟှာ ဖယ်သူ့ကျွန်လည်းမှုဘဲ လွတ်လပ်ဟှူသူ တယော့-က် ဖြစ်ဟှူလည်းဘဲ့ ယောင်ကြည်လာဟှူ သူလေ ဘောင်ဂီးရဟှို့တွပ် လူတိုင်းရဲ့ ကျွန်ဖြစ်ဟှယ်။ 20 ငါဟှာ ယုဒလူမျိုးလေဟှို ရဟှို့တွပ် ယုဒလူမျိုးလေနားမာ ယုဒလူမျိုးလေမျိုး ဖြစ်ဟှယ်။ ငါကိုယ်တိုင် ပညတ်တရားအော့-က်မာ မှေ့ဘေမဲ့လည်း ပညတ်တရားအော့-က်မာ ရှိဟှူသူလေဟှို ရဟှို့တွပ် ပညတ်တရားအော့-က်မာ ရှိဟှူသူလေတွပ် ပညတ်တရားအော့-က်မာ ရှိဟှူသူမျိုးဘဲ့ ဖြစ်ဟှယ်။ 21 ငါဟှာ ဘုရားသခင်ရဲ့ ပညတ်တရားန ကင်းဝေးဟှူသူမှုဘဲ ခရစ်တော်ရဲ့ ပညတ်တရားအော့-က်မာ ရှိဟှူလည်းဘဲ့ ပညတ်တရားန ကင်း‌ဝေးဟှူ လူမျိုးခြားလေဟှို ရဟှို့တွပ် ပညတ်တရားန ကင်းဝေးဟှူ သူလေထဲမာ ပညတ်တရားန ကင်းဝေးဟှူ သူလေမျိုး ဖြစ်ဟှယ်။ 22 ငါဟှာ အားနဲဟှူသူဟှို ရဟှို့တွပ် အားနဲဟှူ သူလေထဲမာ အားနဲဟှူသူ ဖြစ်ဟှယ်။ လူတချို့ဟှို တနည်းနည်းန ကယ်တန်နိုင်ဟှို့တွပ် လူဘောန်းဇောင်ထဲမာ လူဘောန်းဇောင်မျိုးဘဲ့ ဖြစ်ဟှယ်။

23 ဒန်းကောန်းရဲ့ ကောန်းဂျီးမင်္ဂလာဟှို ဝီမျှနိုင်ဟှို့တွပ် ငါဟှာ ဒန်းကောန်းရဲ့ ကျိုးတွပ် အယ်မူဇာ ဂူလောင်းဟှို ပြုဟှူဇာ ဖြစ်ဟှယ်။ 24 ပ္လေးပြိုင်ပွဲမာ လူလေ ဘောင်ဂီး ဝမ်ပြိုင် ဘေမဲ့လည်း တယော့-က်ဟှားဘဲ့ ဆုဟှို ရဟှယ် ဆိုဇာဟှို နန်းနို့လေ သိဂေ့ဟှလော။ အယ်မျိုးဖြစ်ကြောန့် နန်းနို့လေ ဆုဟှို ရဟှို့တွပ် ပ္လေးဂေ့ပါ။ 25 ပြိုင်ပွဲဝမ်ဟှို့တွပ် လေ့ကျင့်ဟှူ အားကစားသမားလေဟှာ ရာရာတိုင်းဟှို ချောက်တီးတတ်ဟှယ်။ အယ်သူလေဟှာ ညှိုးဘီး ပျစ်စီးတတ်ဟှူ ပန်းဦးရစ် သရဖူဟှို ရဟှို့တွပ် အယ်မျိုး ပြုနေဂေ့ဟှယ်။ နို့လေဟှာ ညှိုးဘီး ပျစ်စီးတတ်ဘဲဟှူ ပန်းဦးရစ် သရဖူဟှို ရဟှို့တွပ် အယ်မျိုး ပြုနေဂေ့ဇာ ဖြစ်ဟှယ်။ 26 အယ်ကြောန့် ငါပ္လေးဟှူ ခီမာ ခေဦးတည့်ရာဟှို ပ္လေးဟှူဇာ မှုဟှ။ ငါဟှာ လတ်ဝှေ့ထိုးဟှူ ခီမာ ထိုးချစ်ဟှို ချည်းနှီးထိုးဘဲဟှူ လတ်ဝှေ့ထိုးမားမျိုး ဖြစ်ဟှယ်။ 27 သူများလေဟှို သွန်သန်ဘီးမှ ငါကိုယ်တိုင် က္လရှောင်းဟှူသူ ဖြစ်ဘဲနေအောင် ငါဟှာ ကိုယ့်ရဲ့ ကိုယ်ခန္ဓာဟှို နှိစစ်ဘီး ပြင်ဆင်လေဟှယ်။