1 मन्न भेलाः येसु नाह्‌न ल्हाः रुन्जन्न खेःवलम राह्‌राह्‌ वैयङ खेपा ङ्याह्। नुन चेलाव गुसिह्पा ङ्याह् रे रुन्जन्न नम चाह्ईचाह्ई झामः जाःबो। 2 जेङ्नै फरिसीवजै अन रङरङ येसू र्‌वाबो, "सेह्‌ना, नान चेलाव नाह्‌न ल्हाः कानुनजै खेचे नङ्पा र्‌वापान धोन यङ खेँ।"

3 जेङ्नै येसुई ख्युकाङ्मोः र्‌वाबो, "दाऊदजै, नु रे नुन फुरिव गुसितौ तै खेपा ङ्याह्, तै ङेनजै तोअपा मीपाऊ?✝12:3 १ सामू २१:१-६ 4 नुई परमेस्वरन भबन्न झिङ जाःजाः नू फुल्पान पबित्र रोता फुरीवन ङ्याबोई दीदी झबो। कानुन्न अन्सार पुजारी नङ्म घङ सुई यङ मन रोता झाचे लः मह्‌या। 5 आथबा तै कानुनग तोअपा मीपाऊ, कुजुई नाह्‌न ल्हाः पुजारीवजै आराधनालयग नाह्‌न लाह्‌न आग्या मङ्याङ्‌ङ, जेङ्नै निर्दोस थहरी राँ?"✝12:5 गन्ती २८:९-१० 6 "जेङ्नै ङा ङेनकाङ्मोः र्‌वाचे, आराधनालय खेरे किम यङ कान स्यीह् ङ्याह्। 7 जेङ्नै पबित्रसास्त्रग सर्पा ङ्याह्, ‘ङा बलिदान नङ्पा, दया चाहि खेनान’ र्‌वापान अर्थ तै जेङ्पा अन ङेनजै हाकोपा जेङ्न ङेनजै निर्दोसी दोस बिन्नान मह्‌या।✝12:7 मत्ती ९:१३; होसे ६:६ 8 तैङर्‌वाङिन सिमिन ङोह्जो नाह्‌न ल्हाःन प्रभु जेङ्पा।"

9 स्याह्‌लै गेग्गे येसु ख्युन आराधनालयग होई। 10 स्याह् ल्हा खार्पा सिमिदी ङ्याह्। ख्युई येसू दोस बिनसुमजै नू लोप्पो, "कानुन्न अन्सार तै नाह्‌न ल्हाः सुई ताःफान्चे लः ङ्याह्‌यौ?"

11 येसुई ख्युकाङ्मोः र्‌वाबो, "ङेन बर्ग सुई लूपादी ङ्याह्, रे नाह्‌न ल्हाः मन लुह्‌मग छार्ङिन, तै ना नू जुङजुङ खोलोः मछ्यूनान तै?✝12:11 लुक १४:५ 12 लूपा खेरे ता सिमि लैः कुम्म जेङ्पा। अन्नकारन कानुन अन्सार यङ नाह्‌न ल्हाः सिमिन भलो खेचे लः ठहरि राह्‌नान।" 13 तब नुई मन सिमी र्‌वाबो, "नान लाह् क्याँ।" नुई लाह् क्याङ्बो, रे मन घङ लाह् लैम लः रह्पा। 14 जेङ्नै फरिसीवजै खोलोः वैवै नू कुजुई सच्‌चे र्‌वार्‌वा नुन बिरोधग दीदी सल्‌ला खेमः जाःबो।

15 तब मन ल्होई क्युई राह्‌राह्‌ येसु स्याह्‌लै होई, रे सिमि लैः नुन ङिक जाःबो, रे नुई ख्यु पुरूग ताःफाम्बो, 16 जेङ्नै नुई ख्युकाङ्मोः अन्न भारेः सुई तये नर्‌वा, र्‌वानान्न चेतावनी बिम्बो। 17 झामखेखे परमेस्वरजै यसैया भबिस्यबक्तालम र्‌वापान अन ल्होई पुरा राचेन भिह्तुई अन रह्पा जेङ्पा, 18 "ङन राङ्पा सू ङै दम्पा ङिह्पा, ङन स्याङ्पा सुन ङ्याबो ङा किम्म ङिह्पा, ङा ङन आत्मा नुग फेन्नान ङ्युँ, रे नुई यहूदीन खोलोःन सिमिकाङ्मोः न्यायन ताह्फेन्नान ङ्याह्। 19 नु न ता याल खेनान ङ्याह् न मिह्दा फाईरा खेनान ङ्याह्, न ता सुई नुन केह्ः गल्‌लीवग ताह्‌नान ङ्याह्। 20 दिल्पान मि नुई क्युत्नान मह्‌या, रे सिमः जाःपान लज्युङ नुई सन्नान मह्‌या, रे अन्त्यग न्यायग क्याल्नान्न बेर साःनान ङ्याह्। 21 आलै नुनै मिह्‌नग सन्सारन सिमि पुरूवजै आस नान्नान ङ्याह्।"

22 तब नुन स्याह्‌ मुई सेम्पा काना रे वाम्पा सिमिदी सप्पो। येसुई नू ताःफाम्बो, अकेह्थाल कि, स्याह्‌न वाम्पा सिमि ल्होई र्‌वा तैनान रे रङ तैनान रह्बो। 23 आलै सिमिन मोङ पुरूजै हालाईलाई र्‌वाबो, "तै अन दाऊदनै सन्तान जेङ्पाऊ?" 24 जेङ्नै अन ताह्ताह् फरिसीवजै र्‌वाबो, "अन सिमिजै मुन मालिक बालजिबुललम मात्र मुकाङ्मोः धाङ्‌ङ।" 25 जेङ्नै येसू ख्युन नावा क्युई राह्‌राह्‌ ख्युकाङ्मोः र्‌वाबो, "राह्ङराङ्साः बिरोधि रह्पान राज्य पुरू मीपा दोङ्नान ङ्याह्, रे सहर आथबा पयार पुरू जेँनै घूँ याल राङिन थुप्नान मह्‌या। 26 यदि सैतानजै सैतानग छ्यूङिन, नु जेँन बिरोधग भानान, रे आन नुन राज्य कुजुई थुप तैनान? 27 यदि ङै बालजिबुललम मुव धाङ्‌ङिन, ङेनकोन ङोह्जोवजै चन सुलम मन छ्यूङ? अन्नकारन ख्युई ङेनकोन न्यायकर्ता राह्‌नान ङ्याह्। 28 जेङ्नै यदि परमेस्वरन आत्मालम ङा मुव धान्नान र्‌वाङिन परमेस्वरन राज्य ङेन स्याह् स्वातपा ङ्याह्।" 29 आलै ह्‌याङ "ङू ङार्छेम सिमी मखीरे, नुन यिमन झिङ जाःजाः सुई नुन क्यु वव्वै वै तैनौ? मन ङार्छेम सिमी खीतामी मात्र नुन यिम खु तैनान।" 30 "सु ङन ङ्याबो मह्‌या, नुन ङन बिरोधग ङ्याह्, रे सुई ङन ङ्याबो मरूङ, नुई छरपस्त पारि खेँ। 31 अन्नैकारन ङा ङेनकाङ्मोः र्‌वाचे, सिमिवजै खेपान तीपा पुरू रे लान ल्हुई झपा माफ राह्‌नान ङ्याह्, जेङ्नै पबित्र आत्मान बिरोधग झपान ल्हुई माफ राह्‌नान मह्‌या। 32 सुई सिमिन ङोह्जोन बिरोधग तयाः र्‌वाङिन नू माफ राह्‌नान ङ्याह्, जेङ्नै सुई पबित्र आत्मान बिरोधग ल्होई र्‌वाङिन नू अन काल्बाग रे स्वानान्न काल्बागै माफ राह्‌नान मह्‌या।" 33 "कि तङ्पू लः धोँवा, रे नुन फल लः राह्‌नान ङ्याह्। कि तङ्पू अलः धोँवा रे नुन फल यङ अलः राह्‌नान ङ्याह्। तैङर्‌वाङिन माह्‌लमै तङ्पु स्योःनान।✝12:33 मत्ती ७:२०; लुक ६:४४ 34 ए भुलेन्न वैचा हो! ङेह् अलः ङ्याह्, ल्होई लः कुजुई र्‌वा तैनान? तैङर्‌वाङिन समग नाङ्पान ल्होईव यङ ङुरलम गेङ्‌ङ। 35 सिमि लःजै जेँन समग ङिह्पान ल्होई लःन भकारिलै ल्होई लःई छ्यूनान, जेङ्नै सिमि अलःजै ल्होई अलःन भकारिलै ल्होई अलःई छ्यूनान। 36 ङा ङेनकाङ्मोः र्‌वाचे, फान मराह्‌नान्न ल्होई पुरू कन सिमिव र्‌वाङ, ‘न्यायन दिनग ख्युई मन्न हिसाब बिनत्वानान ङ्याह्।’ 37 तैङर्‌वाङिन नान ल्होईवजै ना निर्दोस ठहरी राह्‌नान ङ्याह्, रे नान ल्होईवजै ना दोसी ठहरी राह्‌नान ङ्याह्।"

38 तब कानुन लन्नान्न सिमिव रे फरिसीवन बर्ग कान-कानजै नू र्‌वाबो, "गुरुज्यू, ङि नानलम ताह्दी सेनसुम ङिह्पा।"✝12:38 मत्ती १६:१; मर्क ८:११; लुक ११:१६ 39 येसुई ख्युकाङ्मोः झब बिम्बो, "अलः रे ब्यभिचारी पुस्ताई ताईलोवान धोन खेपा सेन्चे फान्नान। जेङ्नै अन पुस्ताः योना भबिस्यबक्ताः रह्पान ताह् नङ्म घङ ताईलोवान धोन बिन्नान मह्‌या।✝12:39 मत्ती १६:४; मर्क ८:१२ 40 तैङर्‌वाङिन कुजुई योना ङाह् किमन फौन झिङ ङिम सुमङी रे छान सुमङी लुईबो, उजुखेखेई सिमिन ङोह्जो यङ पिर्थीबिन फौग ङिम सुमङी रे छान सुमङी लुईनान ङ्याह्। 41 निनब्बेन सिमिव परमेस्वरन न्यायन दिनग अन पुस्तान ङ्याबो च्याङ्नान ङ्याह्, रे नू दोसी ठहर्याई खेनान ङ्याह्। तैङर्‌वाङिन ख्युई योनान ताह्फेःग घ्योप्पा खेपा ङ्याह्, जेङ्नै सेह्‌ना, योना खेरै किम सुई स्यीह् ङिह्पा।✝12:41 योना ३:५ 42 ज्याङन मकेकुकेन किम झलीमा न्यायन दिनग अन पुस्तान ङ्याबो च्याङ्नान ङ्याह्, रे अनग दोसी ठहर्याई खेनान ङ्याह्, तैङर्‌वाङिन नु पिर्थीबिन धिङाःन नाःलै सोलोमन्न बुद्धिन ल्होई ङ्यान्चेन भिह्तु स्वाबो। जेङ्नै सेह्‌ना, सोलोमन खेरे किम सुई स्यीह् ङ्याह्।✝12:42 १ झली १०:१-१०; २ इति ९:१-१२

43 "जब आत्मा बाःपा सिमिलम गेग्गे वैङ, नु नाह्पु फारैफारै ओबानो ठाउँराः तुह्ईतुह्ई ल्हेङ्‌ङ, जेङ्नै खारै मदेन्नान। 44 तब नुई र्‌वाङ, ‘खालै ङा गेग्गे स्वापा, स्याह्‌ई जेँन यिम ङा होलहोल वैनान ङ्युँ।’ होलहोल स्वातौ नुई यिम होङ, खामसाङ्म दोङदोङ नाङ्पा, रे छ्याईपा दोःनान। 45 तब नु वैङ रे जेँन खेरे हेँ अलः घङ नेह्पा थाम मुन आत्मा जेँन ङ्याबो सन्नान, रे झिङ जाःजाः ख्यु स्याह् छ्यूँ, रे मन सिमिन ङिस्योवान दसा ङूस्योवान खेरे हेँ अलः राँ। अन अलः पुस्ताः र्‌वार्‌वा उजुई राह्‌नान ङ्याह्।"

46 येसुई सिमिवन मोङग अन ल्होईव र्‌वातौर्‌वातौ नुन मा रे थिक्‌कोव स्याह् ताप्पो। ख्युई येसुन ङ्याबो ल्होई र्‌वाकोए ङिह्पा र्‌वार्‌वा जेँ खोलोःई छ्युङछ्युङ सिमिदीग येसू अन ल्होई स्याप्म फेप्पो। 47 तब तीपाई येसू र्‌वाबो, "सेह्‌ना, नान मा रे नान थिक्‌कोव खोलोः थाङथाङ छ्युङपा ङ्याह्, रे नान ङ्याबो ल्होई र्‌वासुम खेँ।" 48 जेङ्नै नुन ङ्याबो ल्होई र्‌वानान सिमी येसुई र्‌वाबो, "ङन मा सु जेङ्पा? ङन थिक्‌कोव सु जेङ्पा?" 49 आलै नुई जेँन लाह्जै चेलाकाङ्मोः थनैथनै र्‌वाबो, "सेह्‌ना ङन मा रे ङन थिक्‌कोव। 50 तैङर्‌वाङिन सुई स्वर्गः ङिह्पान ङन पान इच्छा ङ्याङ्‌ङ, नुई र्‌वार्‌वा ङन थिक्‌कोव, रे ङन बहिनी, रे ङन मा जेङ्पा।"