1 यरूसलेम वैतौवैतौ ख्यु येरुसलेमन ङेह्‌मै जैतून धुरन रह्‌म्मन बेथफागे र्‌वापू स्वा ताप्पो। स्याह्‌लै येसुई चेला ङेह्पाकाङ्मोः झाःम र्‌वार्‌वा फेप्पो, 2 "ङेन धिङाःन नामग वया। नामग जाःलुङ्मीम ङेनजै पूँह्‌न तह्जा मा ङ्याबोई खीखी नाम्पा दोःनान ङ्याह्। मन ङेह्पाः फोलफोल ङन स्यीह् सह्‌रा। 3 यदि सुई ङेनकाङ्मोः ल्होई तयाः र्‌वाङिन ‘प्रभू अन त्वापा ङ्याह्’ र्‌वाःयो आलै नुई मनग तुरुन्तै फेन्नान।" 4 भबिस्यबक्ताजै पबित्रसास्त्रग सर्पान अन ल्होई पुरा राःयो र्‌वार्‌वाई झाःम रामः स्वापा जेङ्पा, 5 सियोन्न चमेः र्‌वा, "सेह्‌ना, ता ङेनकोन झली ङेन स्याह् स्वाङ, नु नम्र राह्‌राह्‌ पूँह् चपचप स्वाङ, नु पूँह्‌न तह्जान लाह्ः चपचप स्वाङ।"

6 मन चेलावजै वैवै येसुई कोह्पा लैमै खेबो। 7 ख्युई पूँह्‌न तह्जा मा ङ्याबोई वव्वै स्वाबो रे नुन ङिङाः जेँ-जेँन घोलाङ तीह्बो आलै येसु चप्पो। 8 सिमिवन मोङ किमदीजै जेँ-जेँन घोलाङव फोलफोल लमग तीह्बो। घङ हातिपाई चन तङ्पुलै स्याउलाव थुम्थुम वव्वै लमग तीह्बो। 9 येसुन धेँवछोँलै लेन्नान सिमि पुरून मोङवजै झाःम र्‌वाईर्‌वाई फाईरा खेमः जाःबो, "दाऊदन ङोह्जोन झयजक्‌कार राःयो! परमप्रभुन मिह्‌नग स्वानान कताःमन धन्न जेङ्पा! पुरून खेरे तोह्ः स्वर्गः ङिह्पान परमेस्वरन झयजक्‌कार राःयो!"✝

10 येसु यरूसलेमग जाःतौ सहरभरी फाईराकुईरा रह्पा रे सिमिवजै लोप्पो, "अन सु जेङ्पा?" 11 मोङग ङिह्पान सिमिवजै झब बिम्बो, "नु ता गालीलन नासरतलै स्वापान भबिस्यबक्ता येसु जेङ्पा।"

12 येसु आराधनालयग होई आलै स्याह् र्‌युच्‌चे खेखे पुरु छ्युङ्नानकाङ्मोः आराधनालयलै धाम्बो। नुई सोह्ङ फिन्नानवन तेबलव धिम्बो रे पुरेन र्‌युन्नानवन छ्युङ्पूव धिम्बो। 13 आलै नुई ख्युकाङ्मोः र्‌वाबो, "पबित्रसास्त्रग झाम सर्पा ङ्याह्, ‘ङन यिम सोअताप्नान्न यिम रात्वानान।’ जेङ्नै ङेनजै ता अनग च्यापावन अद्‌दा दोङ्पा ङ्याह्!"✝ 14 मन्न छाम्म काना रे लुल्याव आराधनालयग येसुन स्याह् स्वाबो। नुई ख्युकाङ्मोः ताःफाम्बो। 15 अन हालाईचेन धोनव रङरङ रे आराधनालयग वैचावजै फाईरा खेईखेई "दाऊदन ङोह्जोन झयजक्‌कार राःयो!" र्‌वापा ताह्ताह् ङोत्वा पुजारीव रे कानुन लन्नान्न सिमिव सुतूबो। 16 ख्युई येसू लोप्पो, "अन वैचावजै तै र्‌वाङ, नाई मताँयौ?" येसुई झब बिम्बो, "ताँ जेङ्नै हे प्रभु, होमा थुङ्नान्न वैचावन ङुरलै नाई प्रसङ्सा खेपा रा त्वानान र्‌वार्‌वा पबित्रसास्त्रग सर्पान ल्होई तै ङेनजै तोअपा मीपाऊ?" 17 आलै येसु यरूसलेम सहरलै गेग्गे ख्युकाङ्मोः ख्योवाख्योवा बेथानिया नामग होई रे छान्जे स्याह्ई छ्युङ्बो।

18 नाप्चे नाह्पपर्मै यरूसलेम सहरक्याँ होल्तौ येसू गुसिह्बो। 19 लम्न नाः खोअन तङ्पु रङरङ फल ङिम कि र्‌वार्‌वा नु मन तङ्पुन रह्‌म्म होई, जेङ्नै मनग ल्हा नङ्म घङ तये मह्‌या। नुई मन तङ्पू र्‌वाबो, "तान धेरा नान स्याह् हातौयै फल नछ्याःयो। मन खोअन तङ्पु ता मन्नै भेला खार्बो।" 20 अन रङरङ चेलावजै हालाईलाई लोप्पो, "अकेः खम्म अन खोअन तङ्पु कुजुई खार्बो?" 21 येसुई झब बिम्बो, "तेम्माई ङा ङेनकाङ्मोः र्‌वाचे, ङेनजै ङाईदी यङ सङ्‌का मखेरे बिस्वास खेङिन खोअन तङ्पू ङै खेपालैम खे तैनान रे अकेः मात्र नङ्पा, ङेनजै अन धुरग ‘स्यीह्‌लै वैवै समुन्द्रग छारा’ र्‌वाङिनै उजुई राह्‌नान ङ्याह्। 22 यदि बिस्वास खेङिन सोअतापग तै तोल्नै ङेनजै मन देन्नान ङ्याह्।"

23 येसुई आराधनालयग लनयङ ङ्याह्। मन्तौ ङोत्वा पुजारीव रे घङ अगुवावजै नुन स्याह् स्वास्वा नू लोप्पो, "नाई खालै आङ देद्‌दे अन धोन खेनान? अन आङ नाः सुई बिम्बो?" 24 येसुई ख्युकाङ्मोः झब बिम्बो, "ङा यङ ङेनकाङ्मोः ल्होईदी लोच्‌चे, ङाः झब बिङ्‌ङिन ङै खालै आङ देद्‌दे अन धोन खेनान, मन ङेनकाङ्मोः र्‌वानान ङ्युँ। 25 ता र्‌वा, यूहन्नाई बप्‌तिस्मा बिन्नान्न आङ खालै देप्पो, स्वर्गन परमेस्वरलम कि सिमिलम?" अन ताह्ताह् ख्यु राह्ङराङ्साः झामखेखे ल्होई र्‌वामः जाःबो, "ता ङी तै झब बिन्चे? स्वर्गन परमेस्वरलम र्‌वाङिन ‘ङेनजै यूहन्नाः तैङ बिस्वास मखेपा न?’ र्‌वार्‌वा नुई लोन्नान ङ्याह्। 26 यदि सिमिलम र्‌वाङिन ङी सिमिकाङ्मोः ङिन्चे ङ्याह् तैङर्‌वाङिन पुरूजै यूहन्नाः भबिस्यबक्ता जेङ्पा र्‌वार्‌वा ङ्यान्नान।" 27 अन्नकारन ख्युई येसू र्‌वाबो, "च्या, ङी ता क्युई मीपा।" तब येसुई र्‌वाबो, "आन ङै खालै आङ देद्‌दे अन धोन खेँ, ङा रे ङेनकाङ्मोः मर्‌वा।"

28 ता, "ङेन तै छोए खेनान? सिमिदीन ङोह्जो ङेह् ङ्याह्। नुई कान्स्योवान स्याह् वैवै र्‌वाबो, ‘ए ङोह्जो, त्या नाई अङ्‌गुरन भारी वैवै धोन ख्या कोई।’ 29 ‘ङा मह्ई!’ जेङ्नै ङिक नुन सम फिप्पो रे धोनग होई। 30 आलै पाई वैवै घङ ङोह्जोः र्‌वार्‌वा उजुई र्‌वाबो। आलै नुई र्‌वाबो ‘लौ लौ पा, ङा वैच्योवा।’ जेङ्नै धोनग चन मवैबो। 31 ता अन ङोह्जो ङेह्‌न बर्ग कन चनजै पान इच्छ्या ङ्याम्बो?" ख्युई झब बिम्बो, "कान्स्योवा चनजै!" तब येसुई ख्युकाङ्मोः र्‌वाबो, "तेम्माई ङा ङेनकाङ्मोः र्‌वाचे, कर तुईनान रे पातार्निव ङेन खेरे ङू परमेस्वरन राज्यग जाःङ। 32 तैङर्‌वाङिन बप्‌तिस्मा बिन्नान्न यूहन्ना तेम्मा लम थम्मः ङेनकोन स्याह् स्वाबो, जेङ्नै ङेनजै बिस्वास मखेबो। बरु कर तुईनान रे पातार्निवजै चन बिस्वास खेबो। ङेनजै अन रङरङ यङ घ्योप्पा मखेबो रे नू बिस्वास मखेबो।"✝

33 येसुई र्‌वाबो, "दे ता ङेन द्रिस्तान्तन रुपग घङ रुह्ङदी ङ्याना। तीरेप खेःन ताःपोदी ङ्याह्। नुई अङ्‌गुरन भारि पाःबो, लिब्रुङक्याँ राह्ः कह्बो आलै अङ्‌गुर पेलि खेमः सिङ्न कोल रे बारी सेह्‌म्म छ्युङ्पु दोङ्बो। स्याह्ई वन्नान सिमिकाङ्मोः जिम्मा बिमबिम जेँ चन प्रदेसराः होई।✝ 34 अङ्‌गुरन बारी रूचेन भेला रामी नुई जेँन राङ्पाकाङ्मोः जेँन कालाः स्वानान्न अङ्‌गुर तुईमः बारी स्याह्ई वप्पा सिमिवन स्याह् फेप्पो। 35 जेङ्नै मन बारी स्याह्ई वप्पा सिमिव दीदी राङ्पाकाङ्मोः फ्याङ्मः जाःबो, कानग फ्याङ्बो, कानग लुङ्जै फ्याङ्बो आलै कानग चन सह्प्पो। 36 ह्‌याङ बारीन ताःपोई ङून खेरे लैः राङ्पाव बारी स्याह्ई वप्पा सिमिवन स्याह् फेप्पो। जेङ्नै ख्युकाङ्मोः र्‌वार्‌वा बारी स्याई वप्पा सिमिवजै ङून सिमिकाङ्मोः लैम खेबो।" 37 "आखिर बारीन ताःपोई ‘ङन ङोह्जोः ता ख्युई तेम्माई सम्मान खेदरा’ र्‌वार्‌वा छुछु जेँनै ङोह्जोः बारी स्याह्ई वप्पा सिमिवन स्याह् फेप्पो।" 38 जेङ्नै मन बारी स्याह्ई वप्पा सिमिवजै ङोह्जो चनग रङ्लुङ्मीम सल्‌ला खेखे र्‌वाबो, "दे, मन ता बारीन ताःपोनै ङोह्जो जेङ्पा। स्वा, ङि नू सह्‌म्मता रे नुन क्युन आङ वम्मता।" 39 झाःम र्‌वार्‌वा ख्युई नू जुङजुङ अङ्‌गुरन भारिलै खोलोः वव्वै सह्प्पो। 40 येसुई लोप्पो, "दे र्‌वा, ता अङ्‌गुरन भारिन ताःपोई स्वास्वा मन बारी स्याह्ई वप्पा सिमी तै खेदरा?" 41 ख्युई झब बिम्बो, "नूँह् स्वास्वा मन अङ्‌गुरन भारी अलः सिमिकाङ्मोः सन्नान ङ्याह् आलै जेँजै देत्‌त्वानान्न स्याईन काला लः खेखे बिन्नान्न सिमिकाङ्मोः मन बारी स्याह्ई बिन्नान ङ्याह्।" 42 येसुई ख्युकाङ्मोः र्‌वाबो, "तै ङेनजै हातौयै पबित्रसास्त्र तोअपा मह्‌यायौ?"

खार्बावजै फान मत्वानान र्‌वार्‌वा पप्पान लूङै यिमन झग कातौ ङोत्वा लुङ रामः स्वाबो। उजु ता प्रभु परमेस्वर जेँजै राफाम्पा जेङ्पा, अन हातिन हालाईचेन धोन ङिम्न! 43 "मन्नैकारन ङा ङेनकाङ्मोः र्‌वाचे, परमेस्वरन राज्य ता ङेनलम तलतल फल छ्यानान्न यहूदीन खोलोःन सिमिदीग बिन्नान ङ्याह्। 44 मन लुङ्‌न लाह्ः घ्यानान पुरू राःपा राह्‌नान ङ्याह् आलै सुनै लाह्ः घ्याङिन नु चकनाचुर राह्‌नान ङ्याह्।" 45 येसुई र्‌वापान अन द्रिस्तान्तव ताह्ताह् ङोत्वा पुजारीव रे फरिसी र्‌वानान्न कठोर धार्मिक मोङन सिमिवजै अन ल्होई जेँगै र्‌वापा जेङ्पा र्‌वार्‌वा हाकोबो। 46 मन्नैकारन ख्युई नू जुङ्चे फाप्पो, जेङ्नै ख्यु सिमिवलम ङिह्‌म्बो तैङर्‌वाङिन सिमिवजै येसू भबिस्यबक्ता जेङ्पा र्‌वार्‌वा ङ्याङ्‌ङ।