1 Pambila gha hyogha, ninguwaluwa nesu mumluwi Sapanga kwaikiva gha vila wanguvipala, mumyupi Sapanga, na muwayupili wandu waghangi na kumshukwile Sapanga hagha yagholwe kwaikiva gha wandu wogha, 2 Kwaikiva gha wankosi na wakulu wogha ili tupati kulikala kwa kuponga na kukotoho kuwela na maghaso kungalilu gha kumtundamila Sapanga na ndyangilu maha. 3 Mghalu hau wa maha na ungujumilwa kuulongolo gha Sapanga mlokola wa twenga, 4 yula kangupala wandu wogha walokolwi na wapati kuumanya uchakaka. 5 Avile Mundu mmonga mghola ndulumu paghati gha Sapanga na wandu, Mundu hayu ni Kilisito Yesu, 6 yula kajihumisa mweni kuwalokola wandu wogha. Hau uwelili uhighiliso lipindi lipalilwi palihikili, yiwa Sapanga angupala kuwalokola wandu wogha. 7 Na nenga nihaghuliwa nivile mtangasa na mndumindumi, ningulonga uchakaka na ng'ogha ughwangi ili kuwavula wandu Wayahudi ng'ogha wapati kumkwinila Sapanga na kuumanya uchakaka,

8 Hinaa kila mahala ningupala walumi wangughola yala angupala Sapanga wayupi wakiva wayinula mawoko yaghululwa kala wakotoho kuwela na lilaka hilahila wakotoho watatala. 9 Hilahila ningupala wadala wavali kwa utundamilu na waweli ndyangilu maha, ng'ogha kwa mitindu gha kuluka hwila, kulilemba kwa zahabu, au lulu au nguu zya mapesa ngoo, 10 Ila kulipamba kwa weni kungupalwa kuvile kwa matendu gha maha handa ingupalwa kwa wadala wayitikila kumkwinila Sapanga. 11 Wadala wangupalwa kulikala jii na kuhyoghanila lipindi lya kujivula. 12 Nenga nimleka ng'ogha mdala avuli au kumlongosa mlumi, hinu alikali jii hela. 13 Kwaikiva Adamu alumbilwi mtumbulo na kuulongolo Eva, 14 na ng'ogha Adamu angongilwi ila ni mdala ndiwa angongilwi akaghola sambi. 15 Hata nagha mdala atelokolwa kwa kulela kwaki ikiva ateyendelela kulikala kuukwinila, upalo na waweli ku mhaghulo wa Sapanga, pamonga na kuwela na kujilongosa mweni.