1 Ukotoho kumkalipila mgogolo ila ulongeli na mweni handa tati. Ulongeli na wasongolo wa kilumi handa walongo ghako, 2 Wadala wagogolo wagholeli handa wanyongo ghako hilahila na wadala wasongolo wagholeli handa wahacha ghako kwa utundamilu wogha.

3 Uwaviki maha wadala wahoviliwi na walumi ghao na wavile ng'ogha na yeyosi wa kuwatanga kwa kuwatanga. 4 Ila mdala ahovitiliwi na mlumi ghaki yula avile na wana au wahukulu, hagha wana au wahukulu wangupalwa wajivuli kughola lihengu lyao lya kumtundamila Sapanga kumatendu kwa walongu ghao ili wawahuyisilile walela ghao na wagogolo ghao kwaikiva hau ni mghalu ungumuhekelesa Sapanga. 5 Mdala ahovitiliwi na mlumi chakaka, ingumaanisa yula ahighalile weka yaki huvika ukwinila ghaki kwa Sapanga na mweni hulikala nesu kwa kuyupa uhiku na pamuhi akimyupa Sapanga ili amtangi. 6 Ila yula mdala ahovitiliwi na mlumi ghaki na angulikala kwa kuyananga mapesa hayu kahova kala. Pamonga na anguwoneka yiwa mkomu. 7 Uwapeghi wandu malaghilo hagha hilahila, ili pakotoho kuwela na mundu yoyosi wa kuwalalamikila. 8 Ikiva mundu anguwagholokela ng'ogha walongu ghaki, nesu nesu wala wa ukaya ghaki mweni, hayu kakanila ukwinila, na kangi ni mhakata apiti yula kakwinila ng'ogha.

9 Mdala yoyosi ahovitiliwi na mlumi ghaki akotoho kuvikwa kumvalangu wa wahovitiliwi mbaka mdala hayu atimili machuva isitini. Kangi awelili kaposwa lihanja limonga hela, 10 Na avile angumanyika kwa matendu maha, avile kawalela wana ghaki maheli, avile anguwapokela wahenja, awaghululile maghulu wandu wa Sapanga, yula awatangili wandu wavile na lung'ai, na mweni kulihumisa kughola yala hyogha maheli. 11 Ukotoho kuwayandikisa wadala wahongolo wahovitiliwi na walumi ghao, kwaikiva lumatamata lwao lwa higha paliyongoseka kupiti kujihumisa kughola lihengu lya Kilisito, watepala kuposwa kangi, 12 na weni watelamulwa handa vila walongelili kula mtumbulo yiwa watemtumikila Sapanga. 13 Na kupiti hagha, wadala wahovitiliwi na walumi handa hagha wangujivula kuwela waleli na wakitindila tindila lighuta kwa lighuta na wanguwela ng'ogha waleli weka ila hata kuwela wandu wa kusongesela kwa kulonga milando iwapala ng'ogha kulonga. 14 Hinu ningalipala wadala wahongolo wahovitiliwi na walumi ghao waposwi, wapati wana na wagholokeli lighuta ili wakotoho kuwapegha wahakata wa twenga njila gha kutulongela mighalu mihakata. 15 Kwaikiva wadala waghangi wahovitiliwi na walumi ghao wahyuka kala na kumkovekela Lihyukana. 16 Ila ikiva mdala mkwinila Kilisito kawela na wadala wahovilwa na walumi ghao ingumpala awatangi akotoho kuwalekela lipinga lya wandu wa Sapanga wamkwinila Kilisito mhighu hau, ili lipinga lya wandu wa Sapanga wamkwinila Kilisito liwesi kuwatanga wala wadala wahovitili na walumi wavile ng'ogha na mtanga.

17 Wala vilongosi wa lipinga lya wandu wa Sapanga wamkwinila kilisito walongosa wandu maha wangupalwa kupokela utundamilu nesu, nesu nesu wala wanguyangala kukutangasa na kukuvula. 18 Kwaikiva mayandiko yangulonga, "Ukotoho kumuwopa ng'ombi mlomo paapukutula mapemba", na kangi mayandiko yangulonga, "mghola lihengu angupalwa apokeli msahala ghaki." 19 Ukotoho kujumila masitaka gha wagogolo yayeghwa kwa wenga ila mbaka paweli na wandu waivili au waitatu wailolile kwa mihu. 20 Wala wanguyendelela kughola mahakata wakanilwi paluagha, ili wandu waghangi wawesi kutila.

21 Ningukulaghila kuulongolo gha Sapanga, kuulongolo gha Kilisito Yesu na kuulongolo gha watumikila wa kundumba wa Sapanga wala wahaghulwa na Sapanga, uyagholi malaghilo hagha na ukotoho kuleka hata limonga, na ukotoho kupala kumgholela mmonga nesu na ghangi isokombi kukila ukighola. 22 Ukotoho kughola kwa kuloposela kumhaghula mundu yoyosi kughola lihengu lya Bambu kwa kumvikila mawoko hata Ukotoho kukongine sambi zya waghangi ila uihighilisili kukotoho kughola sambi.

23 Kwaikiva gha uvina na mtima wa wenga ukotoho kunywegha masi hela ila unyweghi na divai mayaghani iwesi kukutanga.

24 Sambi zya wandu waghangi zinguwoneka paluagha, na sambi hasi zinguwalongola kuulamula, ila sambi zya wandu waghangi zitewoneka kuulongolo. 25 Hilahila matendu gha maha yavile paluagha, na hata ghala ghamaha ng'ogha yawesa ng'ogha kuhighwa.