1 Milando hai ni chakaka, ikiva mundu angupala kulongosa lipinga lya wandu wa Sapanga wamkwinila Kilisito, hayu angupala lihengu lya maha. 2 Kilongosi wa lipinga lya wandu wa Sapanga wamkwinila Kilisito angupalwa aweli mundu wakulongelwa ng'ogha mahakata aweli na mdala mmonga, aweli mweni kujilongosa mweni, mweni kutundamilwa, mpala wahenja na anguwesa kuvula, 3 Akotoho kuwela mlowela, avile ng'ogha na maghombi ila aweli kapola, na awelili ng'ogha mundu wa kupala mapesa. 4 Angupalwa aweli mweni kuwesa kulongosa na kuigholokela lighuta lyaki kwa umaheli na kuhighilisa yiwa wana ghaki wangumuyitikila na wanguwela na utundamilu kwa njila zyogha. 5 Kwaikiva ikiva mundu kamanya ng'ogha vila ingumpala agholokeli lighuta lyaki mweni, ghuli atewesa kuligholokela lipinga lya wandu wa Sapanga wamkwinila Kilisito? 6 Akotoho kuwela mundu kamkwinila Kilisito machuwa gha papehi, akotoho akaidumbila na akagua ku ulamula handa alamulilwi Lihyukana. 7 Ingumpala aweli mundu wa kuwoneka maha kwa wandu wavile ng'ogha wa lipinga lya wandu wavile ng'ogha wandu wa Kilisito, ili akotoho pughanywa na kuwomela kumtegho wa Lihyukana.

8 Vilavila watumikila kulipinga lya wandu wa Sapanga wamkwinila Kilisito wangupalwa wavile wandu wa kutundamilwa na wa mbindingu, wakotoho kuwela walowela, ng'ogha weni lumatamata lwa mapesa. 9 Inguwapala kukovekela mavulo gha uchakaka gha ukwinila na mawachilo gha maheli. 10 Wangupalwa wayeswi huti, pawawoneka yiwa wavile ng'ogha na mahakata hinu wagholi lihengu hali. 11 Wadala wa wandu hagha wangupalwa waweli weni kutundamilwa na wabaisila ng'ogha ila weni kujilongosa, weni kujumilwa kukila mghalu. 12 Mtumikila kulipinga lya wandu wa Sapanga wamkwinila kilisito ingumpala avile na mdala mmonga, na mweni kuwesa kulongosa maha wana ghaki na wandu wogha wawelili ku ukaya ghaki. 13 Watumikila wala wangutumikila maha kulihengu lyao wangupokela utundamilu na wanguwesa kulongela ukwinila ghao ku Kilisito Yesu ng'ogha holu.

14 Pamonga na yiwa nipala kuhika kwa wenga, ningukuyandikila malaghililo hagha, 15 ili paniwesa ng'ogha kuhika kwa kuloposela upati kumanya vila wangupalwa wandu kutama kulighuta lya Sapanga avile mkomu, livile ndiwa lipinga lya wandu wa Sapanga wamkwinila Kilisito, livile mghomba na kitamilo kya chakaka. 16 Kwa chakaka uhighu gha mighalu gha Sapanga ihighwa ni kulungwa:

awonikanili kunjimba handa mundu,

akahighiliswa na Mpumulo yiwa ni mlungwana,

akawoneka na mtumikila wa kundumba wa Sapanga.

atangasiliwi ku milima hyogha,

akajumilwa kumlimawogha,

akatolwa kunani kuukwilikihi.