1 Paahuya Yesu Bambu wa twenga, tutelikungula pamonga kuwela na mweni, hinu ninguwaluwa nesu nesu walongu wa nenga, 2 mkotoho kuyumbila kwa uyuyughu na vilavila mkotoho kutaywa holu na mpumulo yoyosi hata kwa lilando au lihamba yoyosi iwachilwa yiwa ihuma kwa twenga ingulongela yiwa lichuwa lya Bambu lihika kala. 3 Mkotoho kulongelwa uhwangi na mundu yoyosi kwa njila yoyosi hila. Kwaikiva lichuwa lila litehika ng'ogha mbaka kuhumili huti uhakata na yula mhyuka awoneki huti, hayu mwihu ghaki ni kuyalamiswa tukutuku. 4 Mweni atengingama na kujiyinula kunani gha kila kindu kila wangukikema yiwa ni mulungu au kingutundamilwa, ili kujivika kunani gha kulighuta lya Sapanga, akilitangasila mweni yiwa ni Sapanga.

5 Ghuli, mkumbwike ng'ogha yiwa niwalongelili hagha hyogha lipindi niwelili pamonga na mwenga? 6 Ila kuvile na kindu kingumlemesa hinaa, na mwenga mngukimanya kindu haki. Hinu, hayu muhakata atewoneka kwa lipindi lyaki. 7 Makakala zihighala zya yula mhakata zingughola lihengu mbaka hinaa, ila atewoneka ng'ogha mbaka yula mweni kumlemesa paahusiwi, 8 hinaa ndiwa yula mhyuka atehumila. Mundu hayu Bambu Yesu paahika atemkoma kwa kupumula kumlomu ghaki na kumyalamisa tukutuku kwa ukwilikihi wa kuhika kwa mweni. 9 Hayu Mhyuka atehika na makakala gha Lihyukana na kughola vilangihi na makangaso gha weka weka na maloloso gha uhwangi, 10 na kutumila uhwangi wa kila njila kwa wala wanguyaghamila kwaikiva walemili kupala uchakaka ili wapati kulokolwa. 11 Ndiwa kwaikiva Sapanga kawavika pahi gha makakala gha kubyodosa, ili wakwinili uhwangi, 12 na walamulwi wogha wala wakwinila ng'ogha chakaka, ila wakaihekelelela sambi.

13 Tungupalwa kumshukwile Sapanga machuwa yayendelela kwaikiva gha mwenga walongu, mwenga mngupalwa na Bambu, kwaikiva Sapanga awahaghulili mwenga kuhuma mtumbulo ili mlokolwi kupitila kughululwa na Mpumulo wa Sapanga kwa kukwinila chakaka. 14 Sapanga katumila kutangasa Habali Maha kwa twenga handa njila ghaki kuwakema mwenga ili mpati kupokela mahala kuukwilikihi wa Bambu Yesu Kilisito. 15 Hinu, walongu wa twenga, mgholoki maha na kuyakovekela yala mavulo tuwavulili kwa kupitila kuwatangasila na kuwayandikila lihamba.

16 Tungumluwa Bambu wa twenga Yesu kilisito na Tati wa twenga Sapanga yula atupalili na kwa manemu ghaki akatutaya moyu machuwa yayendelela na litumaini lyeni makakala, 17 awapeghi moyu na kuwagholosa maha ili muwesi machuwa yayendelela kughola na kulongela ghala gha maha.