1 Kumwihu walongu, mtuyupili ili lilando lya Bambu lilandali kwa kuloposela na kupokelwa kwa kutundamilwa handa vila ivile kwa mwenga. 2 Mtuyupili hilahila kwa Sapanga ili atulokoli na wandu wahakata na weni sambi, kwaikiva ng'ogha wandu wogha wanguukwinila ujumbi hau.

3 Ila Bambu Yesu yula angughola kila alaghilili. Mweni atewapegha makakala na kuwagholokela maha kwa yula mhakata. 4 Na mweni Bambu katupatila ukwinila mkulunga kwa mwenga na twahela holu yiwa mngughola na mnguyendelela kughola yala tuwalaghilili.

5 Bambu alongoli mioyu gha mwenga kuupalo wa Sapanga na kuufumilifu hula tungupeghwa na Kilisito.

6 Walongu, tunguwalaghila kwa lihina lya Bambu wa twenga Yesu Kilisito, mlekani na walongu wogha wala wavile wapweli na wala wogha wapala ng'ogha kukovekela malaghililo ghala tuwapeghili. 7 Mwenga mwaweni mngumanya yiwa mngupalwa kukovikela mlandano wa twenga. Twenga patuwelili na mwenga tuwelili ng'ogha wapweli, 8 twenga tulyegha ng'ogha mulyo kwa mundu yoyose yaghi yaghi. Tugholili lihengu kwa makakala nesu na tughasika nesu pamuhi na uhiku ili tukotoho kuwela mhighu kwa mundu yoyose paghati gha mwenga. 9 Tugholili nagha ng'ogha kwaikiva tupalwa ng'ogha kupokela mtanga kuhuma kwa mwenga ila kwaikiva tungupala kuwapegha mlandano wa kukovekela. 10 Patuwelili pamonga na mwenga tuwalaghilili yiwa, "Mundu yoyose kapala ng'ogha kughola lihengu, na akotoho kulyegha."

11 Tungulonga milandu hayi kwaikiva tuyoghanila yiwa paghati gha mwenga ni wapweli na waghola ng'ogha chochose, ila wandu weni kubyodosa mighalu gha wandu ghangi. 12 Kwa lihina lya Bambu wa twenga Yesu Kilisito tunguwalaghila na kuwakanisa wandu hagha wapongi na kughola lihengu ili wawesi kuipatila mulyo ghao weni baha.

13 Ila mwenga walongu, mkotoho kutoka kughola mighalu maha. 14 Ikiva mundu yoyose kakola ng'ogha hagha malaghililo gha twenga hagha gha mulihamba hai, mumloli nesu mundu hayu mkotoho kuwela na mweni pabehi ili aloli honi. 15 mkotoho kumvalangila mundu hayu handa mhakata, ila mumkanisi handa mlongu.

16 Hinu Bambu apala ng'ogha kutovana, awapeghi kulikala kwa kutovana ng'ogha machuwa hyogha kwa njila wekaweka, Bambu aweli na mwenga wogha.

17 Nenga Paulo, ninguyandika lijambuso hali kwa liwoku lya nenga baha. Haki ndiwa kilangihi kulihamba zyangu zyogha. Havi ndiwa ninguyandika.

18 Tunguwatakila mwenga wogha manemu gha Bambu wa twenga Yesu kilisito.